13 Jul 2017, 13:01
ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އަދި ޕީޕީއެމް ޕީޖީ ގްރޫޕުގެ ޑެޕިއުޓީ ލީޑަރު އިބުރާހިމް ފަލާހުއަށް 32 މިލިއަން ރުފިޔާ އިދިކޮޅު ފަރާތްތަކުން ހުށަހެޅި ކަމަށް ވިދާޅުވެ، އޭނާ ދެއްކެވި ވާހަކަ ފުޅަށް ޕީޕީއެމް ޕީޖީ ގްރޫޕުގެ ޑެޕިއުޓީ ލީޑަރު، ވިލުފުށީ ދާއިރާގެ މެމްބަރު ރިޔާޒު ރަޝީދު ވަރުގަދަ ރައްދެއް ދެއްވައިފި އެވެ.
މީގެ ދެ ދުވަސް ކުރިން ޕީޕީއެމްގެ ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުމެއްގައި ފަލާހު ވިދާޅުވީ އިދިކޮޅު ފަރާތްތަކުން އޭނާއަށް 32 މިލިއަން ރުފިޔާ މަސީހާ ދެކޮޅަށް ސޮއި ކުރުމަށް އެދި ހުށަހެޅި ކަމަށެވެ. އެ މައްސަލަ ރިޕޯޓް ކުރިންތޯ ނޫސްވެރިން ސުވާލު ކުރުމުން އެދުވަހު ފަލާހު ވިދާޅުވީ "އަންގަން ޖެހޭ ފަރާތްތަކަށް ވާނީ އަންގާފައި" ކަމަށެވެ.
ފަލާހުގެ އެވާހަކަތަކާ ގުޅިގެން ރިޔާޒު މިއަދު ސަން އަށް ވިދާޅުވީ ރިޝްވަތުގެ ވާހަކައަކީ ހަބަރެއް ހަދަން ނޫނީ އަމިއްލަ މަންފާއަކަށް ދަންކަން ޖެހޭ ވާހަކައެއް ނޫން ކަމަށެވެ. އަދި ރިޝްވަތު ހުށަހަޅައިފި ނަމަ އަވަހަށް ރިޕޯޓު ކުރަން ޖެހޭނެ ކަމަށް ރިޔާޒު ވިދާޅުވި އެވެ.
"އެވާހަކަ އެދެކެވުނީ އަމިއްލަ މަންފާއަކަށް ނޫނީ ހަބަރެއް ހަދާލުމުގެ ބޭނުމުގައި ކަމަށްވާ ނަމަ އެއީ ވަރަށް ދެރަ ކަމެއް. މަޖިލިސް މެމްބަރުންނަށް ރިޝްވަތު ހުށަހެޅުމާއި ރިޝްވަތުގައި ހިފުމަކީ 17 ވަނަ ރައްޔިތުންގެ މަޖިލީހުން ފެށިގެން ވެސް ކުރާ ކަމެއް. މައްސަލައަކީ ރިޕޯޓު ނުކުރާތީ،" ރިޔާޒު ރަޝީދު ވިދާޅުވި އެވެ.
ކޮރަޕްޝަން ހުއްޓުވުމާއި މަނާ ކުރުމުގެ ގާނޫނުގެ ނުވަވަނަ މާއްދާގެ (ހ) އާ ހަވާލީ ރިޔާޒު ވިދާޅުވީ ރިޝްވަތު ހުށަހެޅީމާ އެވާހަކަ ކަމާ ގުޅުން ހުރި މުއައްސަސާތަކާ ހިއްސާ ނުކުރުމަކީ ކުށެއް ކަމަށެވެ.
ކޮރަޕްޝަން ހުއްޓުވުމާއި މަނާ ކުރުމުގެ ގާނޫނުގެ ނުވަވަނަ މާއްދާގެ (ހ)
- މިގާނޫނުގައި ބަޔާންކޮށްފައިވާ އެއްވެސް މީހަކު ރިޝްވަތު ހިފައިވިކަން ނުވަތަ ހިފަން އުޅެފިކަން ނުވަތަ އެއްވެސް މީހަކު ރިޝްވަތު ދީފިކަން ނުވަތަ ދޭން އުޅޭކަން އެނގިއްޖެ ނަމަ ނުވަތަ ރިޝްވުތު ހިފައިފިކަން ހިފަން އުޅޭކަން ނުވަތަ ދީފިކަން ދޭން އުޅޭ ކަމަށް ގަބޫލުކުރެވޭ ފަދަ ހާލަތެއް ދިމާވެއްޖެ ނަމަ ކަމާބެހޭ ތަފްސީލާއި އެ އަމަލެއް ހިންގަން އުޅުނު ބައެއްގެ މައުލޫމާތާ އެކު އޭސީސީއާ ހިއްސާ ކުރަންވާނެ އެވެ. އަދި އެކަށީގެންވާ ދިގު މުއްދަތެއްގައި އެކަން ނާންގައި ހުރުމަކީ ކުށެކެވެ.
އެ ގާނޫނުގައި ބުނެފައިވާ ގޮތުން އެ މައުލޫމާތު ހިއްސާ ނުކުރާ މީހަކަށް ދެ އަހަރުގެ ޖަލު ހުކުމެއް އަންނާނެ އެވެ.
ފުޓުބޯޅަ ކްލަބުތަކުގެ ޓްރާންސްފާ މާކެޓްގައި ކުޅުންތެރިންގެ އަގުތައް ހުންނަ ގޮތަށް މިސާލު ޖައްސަވަމުން ރިޔާޒު ވިދާޅުވީ އިދިކޮޅުން އަގެއް ހުށަނޭޅި ނަމަވެސް ނުވަތަ ކުޑަ އަގެއް ހުށަހެޅި ނަމަވެސް ބޮޑު އަގެއް ކިޔައި އެހެން މީހުންގެ ފަރާތުން މަންފާއެއް ހޯދަން މަސައްކަތް ކުރުމަކީ ރަނގަޅު ގޮތެއް ނޫން ކަމަށެވެ.
ނޫސްވެރިންގެ ބައްދަލުވުމުގައި ފަލާޙު އެ ވާހަކަ ދެއްކެވުމުގެ ކުރިން ފަލާޙަށް ރިޝްވަތު ހުށަހެޅުއްވި ވާހަކައެއް އެނގިވަޑައިގެންފައި ނުވާ ކަމަށް ރިޔާޒު ވިދާޅުވި އެވެ.
އެވާހަކަތަކާ ގުޅިގެން ފަލާހު ވިދާޅުވީ އެއްވެސް ޖަވާބެއް މިވަގުތު ދޭން ބޭނުން ނުވާ ކަމަށެވެ. އަދި އެއްވެސް މުއައްސަސާއަކަށް މައްސަލަ ހުށަހެޅުއްވިންތޯ އެހުމުންވެސް ދެއްވީ ހަމަ އެ ޖަވާބެވެ.