03 Jul 2017, 19:56
އެމެރިކާގެ މިސައިލް ޑިސްޓްރޯޔާ ޗައިނާގެ ކަނޑުގެ ސަރަހައްދަށް ވަނުމަކީ އެމެރިކާ އިން ހެދި ވަރަށް ބޮޑު ގޯހެއް ކަމަށާއި އަދި އެއީ ސިޔާސީ އަދި މިލިޓަރީ ގޮތުން ވެސް ދެވުނު ވަރަށް ނުރަނގަޅު މެސެޖެއް ކަމަށް ޗައިނާ އިން ބުނެފި އެވެ.
އެމެރިކާގެ މަނަވަރުތައް ވަދެގަންފައި ވަނީ ދެކުނު ޗައިނާ ކަނޑުގައި މިލްކުވެރިކަމާ މެދު މައްސަލަޖެހިފައިވާ ރައްތަކުގެ ތެރެއިން ޓްރިންޓަން ހިމެނޭ ސަރަހައްދުގެ ތެރެއަށެވެ. މި ސަރަހައްދުގެ ތެރެއަށް އެމެރިކާ އިން ވަދެފައި ވަނީ އެމެރިކާ އިން ހިންގާ "ފްރީޑަމް އެންޑް ނެވިގޭޝަން"ގެ ޕްރޮގްރާމްގެ ދަށުންނެވެ.
އެ ޕްރޮގްރާމަކީ އދ. އިން އެކުލަވައިލައިފައިވާ ކަނޑުގެ ގަވައިދުތަކަށް ގައުމުތަކަށް އަމަލުކުރޭތޯ ބެލުމުގެ ގޮތުން ހިންގާ ޕްރޮގްރާމެކެވެ. ދެކުނު ޗައިނާ ކަނޑުގައި ޗައިނާ އިން ހަދަމުންދާ ރައްތަކުގެ މިލްކުވެރިކަމުގައި ވަރަށް ބޮޑަށް މައްސަލަޖެހިފައެވެ. އަދި އެހެން ގައުމުތަކުން ވެސް ދަނީ މި ރައްތަކުގެ މިލްކުވެރިކަމުގައި ދައުވާ ކުރަމުންނެވެ.
ޗައިނާގެ ފޮރިން މިނިސްޓްރީގެ ސްޕޯކްސްޕާސަން ލޫ އާ ހަވާލާދީ ބުނެފައިވާ ގޮތުގައި ޗައިނާއިން ވަގުތުން ރައްދުގައި ވަނީ މަނަވަރުތަކާއި ފައިޓަރ ޖެޓްތައް އެސަރަހައްދުގައި ވަގުތުން ރުކުރުވާލާފައެވެ.
"ޗައިނާގެ ގާނޫނުތަކުގައި ކަނޑައެޅިގެން އޮންނާނެ ބޭރުގެ އުޅަނދުތައް ޗައިނާގެ ކަނޑުގެ ސަރަހައްދައް ވަދެވޭނީ ވަކި ގަވައިދެއްގެ ދަށުންކަން" ފޮރިން މިނިސްޓްރީގެ ސްޕޯކްސްޕާސަން ވިދާޅުވިއެވެ.
ލޫ އިތުރަށް ވިދާޅުވި ގޮތުގައި އާސިއާންގެ އެހެން ގައުމުތަކުން ވެސް ވަނީ ދެކުނު ޗާއިނާ ކަނޑުގެ މިލްކުވެރިކަމުގައި އުފެދިފައިވާ މިލްކުވެރިކަމުގެ މައްސަލައިގައި ވާހަކަ ދައްކައި މައްސަލަ ހައްލުކުރަން މަސައްކަތްކުރަމުންނެވެ. ނަމަވެސް އެމެރިކާއިން ގެންގުޅެނީ މަސްރަހު އިތުރަށް ހޫނުކޮށް ޖެއްސުންކުރުމުގެ ސިޔާސަތެއް ކަމަށް ތުހުމަތު ކުރައްވާފަ އެވެ.