02 Jul 2017, 22:40
ރެއިންބޯއިން މިއަހަރުގެ ރޯދަމަހާ ދިމާކޮށް ކުރިއަށް ގެންދިޔަ "ރަމަޟާން ސޭލް" ޕްރޮމޯޝަނުގެ ނަސީބުވެރިން ހޮވައިފި އެވެ.
ރެއިންބޯ ބިލްޑްވެއާ ޝޯރޫމުގައި މިރޭ ނެގި ގުރުއަތުނެގުމުން ތިން ވަނަ އަށް ހޮވުނީ 47313 ނަމްބަރު ކޫޕަނުގެ ވެރިފަރާތް، ނާޒިމާ އެވެ. އޭނާ އަށް ލިބޭ އިނާމަކީ އެލްޖީ ބްރޭންޑުގެ އޮޓޯމެޓިކް ދޮންނަ މެޝިނެކެވެ. ދެވަނަ އަށް 34129 ނަމްބަރުގެ ވެރި ފަރާތް، އަހުމަދު އާތިފެވެ. އޭނާ އަށް ލިބޭ އިނާމަކީ ސޯފާ ސެޓެކެވެ.
އެއް ވަނަ އަށް ހޮވޭ ފަރާތަށް ހުށަހަޅާފައިވާ ބެޑްރޫމް ސެޓު ލިބުނީ 69601 ނަމްބަރު ކޫޕަނުގެ ވެރި ފަރާތް ކަމުގައިވާ އާމިނަތު އަލްޔާ އަށެވެ.
ރެއިންބޯ "ރަމަޟާން ސޭލް"ގެ ނަސީބުވެރިން -- ސަންފޮޓޯ: މުހައްމަދު އަފްރާހު
ރެއިންބޯ އިން ބުނި ގޮތުގައި އެ އިނާމުތައް ލިބޭ ފަރާތްތައް ވެރިފައިކޮށް މާދަމާގެ ވަގުތެއްގައި އެ ކުންފުނީގެ ފޭސްބުކް ޕޭޖުގައި އާންމު ކުރާނެ ކަމަށެވެ. އަދި އެއަށްފަހު އިނާމުތައް ހައްގުވެރި ފަރާތާ ހަވާލު ކުރާނެ ކަމަށްވެސް އެކުންފުނިން ބުންޏެވެ.
އެ ޕްރޮމޯޝަނަކީ ކޮންމެ އަހަރަކުވެސް ރޯދަމަހާ ދިމާކޮށް ރެއިންބޯއިން ކުރިއަށް ގެންދާ ސޭލެކެވެ. އެގޮތުން މިއަހަރުގެ ސޭލް ފެށީ އޭޕްރީލް އެއްވަނަ ދުވަހުން ފެށިގެން ޖޫން 10 ގެ ނިޔަލަށެވެ. ސޭލުގެ މުއްދަތުގައި ރެއިންބޯގެ އަތޮޅު ތެރޭގެ ފިހާރަތަކުންވެސް އެކި ބާވަތްތަކުގެ ތަކެތިން ޑިސްކައުންޓު ދީފައިވެއެވެ.
އެ ކުންފުނިން ބުނީ މިއަހަރުގެ ޕްރޮމޯޝަނަށް ވެސް އާންމުގެ ބޮޑު ތަރުހީބެއް ލިބިފައިވާ ކަމަށެވެ.