02 Jul 2017, 12:59
މި އަހަރުގެ މިހާތަނަށް ދުނިޔޭގެ ނަން ހިނގާ ސްމާޓް ފޯނު ކުންފުނިތަކުން ވަނީ އެމީހުންގެ އެންމެ ފަހުގެ ފޯނުތައް ދުނިޔޭގެ ބާޒާރަށް ނެރެ ވިއްކަން ފަށައިފަ އެވެ. މީގެ ތެރެއިން އެންމެ ފާހަގަ ކޮށްލެވެނީ ސެމްސަންގްގެ ގެލެކްސީ އެސް 8 އަދި އެސް 8 ޕްލަސްގެ ފޯނުތައް ކަމުގައިވާ އިރު އަހަރުގެ ބާކީ އޮތް ތަނުގައި ވެސް ފާހަގަ ކޮށްލެވޭ ފޯނުތަކެއް ނިކުންނަން ހަމަޖެހިފައިވެ އެވެ.
އެގޮތުން މިފަހަރު މިބަލާލަނީ ބާކީ އޮތް ހަ މަސް ތެރޭ ދުނިޔޭގެ ބާޒާރުން ފެނިދާނެ ކަމަށް ބެލެވޭ އަދި ޝެޑިއުލް ކޮށްފައިވާ ސްމާޓްފޯނުތަކަށެވެ.
ޖުލައި - ސެޕްޓެމްބަރު
ސެމްސަންގް ގެލެކްސީ ނޯޓް 8
ރިލީޒް ކުރާނެ ތާރީހެއް އަދި ކަނޑައެޅިގެން ނޭނގުނު ކަމުގައި ވިޔަސް ސެމްސަންގް އިން މިއަހަރު ދެން ނެރޭނީ އެމީހުންގެ ސެމްސަންގް ގެލެކްސީ ނޯޓް 8 އެއް ކަމުގައި ރިޕޯޓު ކޮށްފައިވެ އެވެ. ފޯނު ރިލީޒްވާނެ ކަމަށް ބޮޑަށް ލަފާކުރެވެނީ އޯގަސްޓް މަހުގަ އެވެ.
އެކުންފުނީގެ ނޯޓް 8ގެ ޑިޒައިން ގާތްގަނޑަކަށް ގެލެކްސީ އެސް 8 އާ އެއްގޮތަށް ހުންނާނެ ކަމަަށް ހަބަރުތައް ލިބޭއިރު އެމީހުންގެ ނޯޓް ސީރީޒްގައި ބޭނުންކުރާ އެސް ޕެން މިފޯނުގައި ވެސް ހިމެނޭނެ ކަމަށްވެ އެވެ.
އެޕަލް އައިފޯން 7 އެސް އަދި 7 އެސް ޕްލަސް ނުވަތަ އައިފޯން 8
ދުނިޔޭގެ އެންމެ ކާމިޔާބު ސިންގިއުލާ ފްލެގްޝިޕް މޮޑެލް ފޯނު އުފައްދާ ކުންފުނި އެޕަލް އިން ދެން ނެރެން ހަމަޖެހިފައި ވަނީ އެމީހުންގެ 7 އެސް އަދި 7 އެސް ޕްލަސް ކަމަށް ބައެއް ޓެކްނޮލޮޖީ ހަބަރުތައް ގެނެސްދޭ ނޫސްތަކުން ރިޕޯޓު ކުރިކަމުގައި ވިޔަސް އެމީހުންގެ ފޯނުތަކުގެ ނަމްބަރިންގް ސީކުއެންސަށް ބަދަލެއް ގެންނާނެކަމަށް ދެކެވޭ ވާހަކަތައް މިފަހަކަށް އައިސްވަނީ ގިނަވެފަ އެވެ.
އައިފޯން 7 އަދި 7 ޕްލަސް ފޯނުތަކެއް --- ފޮޓޯ: ޕޮކެޓްލިންކް
ހަބަރުތައް ލިބޭ ގޮތުގައި އައިފޯން 8 އަދި 8 ޕްލަސްގައި ހޯމް ބަޓަން ފޯނުގެ ކުރިމަތީގައި ނީންނާނެ އެވެ. ފޯނުގެ މޫނުމަތީ ފަރާތުގައި މުޅި ސްކްރީން އެއްކޮށް ފޯނުގެ ދިގުމިނާއި ފުޅާމިނަށް ފިޓްކުރެވިފައި އިންނާނެ އެވެ. މީގެ އިތުރުން ފިންގާ ސްކޭނާ ނުވަތަ ސެންސަރް މިފަހަރު އިންނާނީ ފޯނުގެ ފުރަގަހުގަ އެވެ.
އެ ކުންފުނީގެ އެޕަލް 8 އަދި 8 ޕްލަސްގެ ފޯނުތައް ވެސް އެހެން އަހަރުތަކެކޭ އެއްފަދައިން މިއަހަރު ވެސް ސެޕްޓެމްބަރު މަހު ރިލީޒް ކުރެވޭނެ ކަމަށް އެއްބަޔަކު ދެކޭއިރު ޓެކް ސައިޓްތަކުން ހަބަރުތައް ދެނީ މިއަހަރުގެ އައިފޯނު ރިލީޒްވާނީ އޮކްޓޯބަރު މަހުގައި ކަމަށެވެ.
އޮކްޓޫބަރު-ޑިސެމްބަރު
ގޫގްލް ޕިކްސެލް 2 އަދި ޕިކްސެލް 2 ޕްލަސް
މިދިޔަ އަހަރު ގޫގްލްއިން ވަނީ އެންޑްރޮއިޑް ޕްލެޓްފޯމުގެ އެންމެ ފުރިހަމަ އަދި ސްމާޓްފޯނެއްގައި ބޭނުންކުރެވެނު އެންމެ މޮޅު ކެމެރާ ހިމަނައިގެން އެމީހުންގެ ޕިކްސެލް ފްލެގްޝިޕްގެ ފޯނުތައް ދުނިޔޭގެ ބާޒާރަށް ނެރެފަ އެވެ.
މިއަހަރު އެމީހުން މިވަނީ އޭގެ އެންމެ ފަހުގެ ފޯނު ނެރުމަށް ތައްޔާރުވެފަ އެވެ.
ގޫގްލް ޕިކްސެލް ފޯނު --- ފޮޓޯ: ޕޮކެޓްލިންކް
ގޫގްލްގެ ޕިކްސެލް 2 އަދި ޕކްސެލް 2 ޕްލަސް ފޯނުތަކުގެ ޑިޒައިން އާއި އަދި ފޯނުގެ ކޮލިޓީ އަދި އެޑިވައިސްގައި ހިމެނޭ ކަންތައްތަކުގެ ހަބަރުތައް ޓެކް ހަބަރު ފޯރުކޮށްދޭ އެއްވެސް ބަޔަކަށް އަދި ވަނީ ލިބޭ ގޮތް ނުވެފަ އެވެ. އެ ކުންފުންޏަކީ އެމީހުންގެ އެފަދަ ޕްރޮޖެކްޓްތައް ވަރަށް ސިއްރިއްޔާތުގައި ކުރާ ބަޔަކަށްވުމުން އޭގެ ތަފްސީލް ލިބޭނެ ކަމަށް ބެލެވެނީ އެ ކުންފުނިން ފޯނު ރިލީޒް ކުރާ ދުވަހުގަ އެވެ.
އެހެން އަހަރު ތަކެކޭ ވެސް އެއްފަދައިން މިއަހަރު ވެސް ނޮވެމްބަރު އަދި ޑިސެމްބަރު މަހުގައި ބޮޑެތި ފޯނުތަށް ރިލީޒް ވާނެ ކަމަކަށް ނުބެލެވެ އެވެ.
މަސްދަރު: އެންޑްރޮއިޑް އޮތޯރިޓީ، ޕޮކެޓް-ލިންކް