22 Jun 2017, 12:12
ފަތިސް ނަމާދަށް ތިއްބައި ގއ. ކަނޑުހުޅުދޫ ކޯޓުގެ މެޖިސްޓްރޭޓް ހަސަން ދީދީ އާއި އެ ރަށު ސްކޫލްގެ ލީޑިން ޓީޗަރު އަޝްރަފް އަބްދުﷲގެ ސައިކަލްގައި ރޯކޮށްލައިފި އެވެ.
ކަނޑުހުޅުދޫ ކައުންސިލްގެ ނައިބު ރައީސް ޝިއުމާޒު އަބްދުއްސަމަދު މިއަދު "ސަން" އަށް ވިދާޅުވީ އެ ދެ ސައިކަލްގައި ރޯކޮށްލީ މިސްކިތު ބޭރު ދޮރު ކައިރީ ޕާކްކޮށްފައި ހުއްޓައި ފަތިހު 5:00 އެހާކަންހާއިރު ކަމަށެވެ.
"އެ ދެ ބޭފުޅުން ވެސް ފަތިސް ނަމާދަށް ތިއްބައި ސައިކަލްގައި ރޯކޮށްލާފައި ވަނީ،" ޝިއުމާޒު ވިދާޅުވި އެވެ.
ކަނޑުހުޅުދޫ މިސްކިތު ބޭރު ދޮރު ކައިރީ ޕާކްކޮށްފައި ހުރި ސައިކަލްގައި ރޯކޮށްލާފައި ---- ފޮޓޯ: ކަނޑުހުޅުދޫ ކައުންސިލް
ޝިއުމާޒު ވިދާޅުވީ ރޯކޮށްލި ދެ ސައިކަލްގެ ތެރެއިން އެއް ސައިކަލް ބޭނުންނުކުރެވޭ ވަރަށް އަނދާފައިވާ ކަމަށެވެ. އަދި އަނެއް ސައިކަލްގެ އެއްފަޅި އެއްކޮށް އަނދާފައިވާ ކަމަށް އޭނާ ވިދާޅުވި އެވެ.
ެއެކަންކުރިކަމަށް ޝައްކުކުރެވޭ ބަޔަކު އެބަތިބި ކަމަށާއި މިހާރު އެ މައުލޫމާތު ފުލުހުންނާ ހިއްސާކޮށްފައިވާ ކަމަށް ކައުންސިލްގެ ނައިބު ރައީސް ވިދާޅުވި އެވެ.
ފުލުހުންގެ މީޑިއާ އޮފިޝަލް ވިދާޅުވީ ރޭ 5:07ގައި ފުލުހުންނަށް ވަނީ އެ މައްސަލަ ރިޕޯޓްކޮށްފައި ކަމަށެވެ.
ފުލުހުން ބުނީ އެ އިދާރާ އަށް ރިޕޯޓްކޮށްފައިވާ ގޮތުގައި އަލިފާން ރޯކޮށްލީ މެޖިސްޓްރޭޓް ހަސަން ދީދީގެ ސައިކަލްގައި ކަމަށާއި އެ ސައިކަލްގައި ރޯކޮށްލި އަލިފާންގަނޑު ޖެހިގެން ހުރި ސައިކަލަށް ފެތުރުނީ ކަމަށެވެ.
"ފުލުހުން މިހާރު މި މައްސަލަ ތަހުގީގު ކުރަމުން މިގެންދަނީ،" އޮފިޝަލް ވިދާޅުވި އެވެ.