17 Jun 2017, 13:52
ނެޝެނަލް ސެންޓަ ފޯ ދި އާޓްސް( އެންސީއޭ)ގެ ކޯޑިނޭޓަރު އަދި މަޝްހޫރު ފިލްމީ ތަރި އަބްދުﷲ މުއާޒް ފުލުހުންގެ ބެލުމުގެ ދަށަށް ގެންގޮސްފި އެވެ.
ސަން އަށް މައުލޫމާތު ލިބިފައިވާ ގޮތުގައި މުއާ ފުލުހުންގެ ބެލުމުގެ ދަށަށް ގެންދިޔައީ ރޭ 4:50 އެހާކަންހާ އިރު މަސްތުވާތަކެތީގެ މައްސަލައަކާ ގުޅިގެންނެވެ.
އަދި ރޭ މުއާ ހައްރުކޮށްފައި ވަނީ މައްޗަންގޯޅި ގޮމަށިގެއިން އިތުރު ދެ އަންހެނުންނާއި ދެ ފިރިހެނުންނާ އެއްކޮށްކަން ވެސް ސަންއަށް ވަނީ އެނގިފަ އެވެ. ނަމަވެސް މުއާގެ އިތުރުން ދެން ހައްޔަރުކުރީ ކޮން ބައެއްކަން އަދިވަނީ ކަށަވަރުވާގޮތް ނުވެފަ އެވެ.
މީގެ އިތުރުން ރޭ ހައްޔަރު ކުރި ފަސްމީހުން ތިބި ތަނުން ފުލުހުން ވަނީ ބަނގުރާ ކަަމަށް ޝައްކު ކުރެވޭ އެއްޗެއް ހުރި ހަތަރު ފުޅި ވެސް ހޯދާފައެވެ.
ނަމަވެސް މިއިން އެއްވެސް ކަމެއް އަދި ރަސްމީކޮށް ފުލުހުން ކަށަވަރުކޮށްދީފައެއް ނުވެ އެވެ.
އެ މައްސަލައާ ގުޅޭ ގޮތުން ފުލުހުންގެ މީޑިއާ އޮފިސަރު ވިދާޅުވީ މުއާ އެފަދަ މައްސަލައަކާ ގުޅިގެން ހައްޔަރުކޮށްފައިވާ ކަމަށާއި ނަމަވެސް އިތުރު ތަފްސީލެއް ދެވެން ނެތް ކަމަށެވެ.
އެ މައްސަލައާ ގުޅިގެން މިއަދު މެންދުރުފަހުން މުއާ ކޯޓަށް މުއްދަތު ޖެހުމަށް ހާޒިރު ކުރާނެ ކަމުގެ މައުލޫމާތު ލިބުނު ނަމަވެސް ފުލުހުން އެކަން ކަށަވަރުކޮށްދީފައެއްނުވެ އެވެ.
ޔޫތު މިނިސްޓްރީގެ ދަށުން ހިންގަމުން އަންނަ އެންސީއޭގެ ކޯޑިނޭޓަރުގެ މަގާމުން މީގެ ދެ އަހަރު ކުރިން ވަކިކޮށްފައި ހުރުމަށް ފަހު އަނެއްކާ ވެސް އެނާ ވަނީ ވަރަށް ފަހުން ހަމަ އެ މަގާމަށް އައްޔަން ކޮށްފަ އެވެ.