11 Jun 2017, 16:50
އުރީދޫ މޯލްޑިވްސްއާ ޔޫއެންޑީޕީ މޯލްޑިވްސް ގުޅިގެން، ރާއްޖޭގެ ތަރައްގީއަށް މަސައްކަތް ކުރުމުގައި ޓެކްނޮލޮޖީގެ ދައުރު ވަރުގަދަ ކުރުމަށާއި، އިޖްތިމާއީ އުފެއްދުންތެރިކަން އިތުރު ކުރުމުގެ މަގުސަދުގައި ސްޓްރެޓީޖިކް ޕާޓްނާޝިޕެއް ގާއިމްކޮށްފިއެވެ.
ހައުސިންގ ޑެވެލޮޕްމެންޓް ކޯޕަރޭޝަންގައި މިއަދު ބޭއްވި ރަސްމިއްޔާތެއްގައި ވަނީ، އުރީދުއާއި ޔޫއެންޑީޕީ ގުޅިގެން މަސައްކަތް ކުރުމަށް އެއްބަސްވެ، ރަސްމީކޮށް މި މަޝްރޫއު ފަށައިފައެވެ. އެގޮތުން އެޗްޑީސީގެ އެއްބާރުލުމާއެކު އުރީދޫއާ ޔޫއެންޑީޕީން މިއަދު ވަނީ، ހުޅުމާލޭ ސްމާޓް ސިޓީޒް ޕްރޮޖެކްޓް ވެސް ފަށައިފައެވެ.
މިއަދު ހުޅުމާލޭގައި ބޭއްވި ރަސްމިއްޔާތުގައި އުރީދޫ މޯލްޑިވްސްގެ ސީއީއޯ ނަޖީބް ޚާންއާއި ޔޫއެންޑީޕީ ރެސިޑެންޓް ކޯޑިނޭޓަރ އަދި ރާއްޖޭގައި ޔޫއެންޑީޕީގެ ރެސިޑެންޓް ރެޕްރެސެންޓޭޓިވްގެ މަޤާމުގައި ހުންނެވި ޝޯކޯ ނޯޑާ އަދި އެޗްޑީސީގެ އިސްވެރިން ބައިވެވަޑައިގަތެވެ.
އުރީދުއާއި ޔޫއެންޑީޕީ ގުޅިގެން ހުޅުމާލޭގައި ކުރިއަށް ގެންދާ ސްމާޓް ސިޓީޒް ޕްރޮޖެކްޓަކީ، އުފެއްދުންތެރި، ސްމާޓް ސޮލިއުޝަންތަކެއް މެދުވެރިކޮށް ދިރިރުޅުމުގެ ފެންވަރު ރަނގަޅުކުރުމަށް އިސްނަގައިގެން ކުރާ މަސައްކަތެކެވެ.
އުރީދޫ މޯލްޑިވްސްއާ ޔޫއެންޑީޕީ މޯލްޑިވްސް ގުޅިގެން، ރާއްޖޭގެ ތަރައްގީއަށް މަސައްކަތް ކުރުމަށް ސްޓްރެޓީޖިކް ޕާޓްނާޝިޕެއް ގާއިމްކުރުމަށް ބޭއްވި ޚާއްސަ ރަސްމިއްޔާތުގެ ތެރޭން -- ފޮޓޯ: އުރީދޫ
މި ޕްރޮޖެކްޓް ކުރިއަށްގެންދާނީ، ހުޅުމާލެ ސްމާޓް ސިޓީއެއް ގޮތުގައި ތަރައްގީކުރަމުންދާއިރު، ތައާރަފްކުރެވޭ ހުރިހާ ޓެކްނޮލޮޖީތަކާއި ސްމާޓް ހައްލުތަކަކީ ހުޅުމާލޭގެ ހުރިހާ ރައްޔިތުން ބައިވެރިކޮށްގެން ފޯރުކޮށްދެވޭ ހިދުމަތްތަކެއްކަން ޔަގީންކުރުމާ އެކުގައި ކަމަށް އެ ދެ ފަރާތުން މައުލޫމާތު ދެއެވެ.
އުރީދޫގެ ސީއީއޯ ނަޖީބް ޚާން ވިދާޅުވީ، ދުނިޔޭގެ އެކި ހިސާބުތަކުގައި، އިޖްތިމާއީ އަދި އިގްތިސާދީ ދާއިރާ ތަރައްގީކުރުމުގައި ސްމާޓް ޓެކްނޮލޮޖީގެ ދައުރުފުޅާވަމުންދާއިރު، ދެމެހެއްޓެނިވި ތަރައްގީގެ ލަނޑުދަނޑިތައް ހާސިލްކުރުމުގައި ޓެކްނޮލޮޖީގެ ދައުރު ވަރަށް މުހިންމު ކަމަށެވެ.
"ޔޫއެންޑީޕީއާ ގުޅިގެން، މިފަދަ ޓެކްނޮލޮޖީތައް މެދުވެރިކޮށް ހުޅުމާލޭގެ ރައްޔިތުން ބާރުވެރިކޮށް، އިތުރު ފުރުސަތުތަކެއް ގެނެސްދިނުމަށް މަސައްކަތް ކުރުމީ އަޅުގަނޑުމެންނަށް ލިބިގެންދާ ވަރަށް ބޮޑު އުފަލެއް. އަޅުގަނޑުމެންގެ އަމާޒަކީ، ޓެކްނޮލޮޖީ މެދުވެރިކޮށް ރައްޔިތުންގެ ޙަޔާތަށް އިތުރު ފުރިހަމަ ކަމެއް ގެނެސްދިނުން،" ނަޖީބް ޚާން ވިދާޅުވިއެވެ.
އުރީދޫއާ ޔޫއެންޑީޕީން ވަނީ، އޭޕްރިލް 27ގައި ވެސް ހާއްސަ އެމްއޯޔޫއެއްގައި ސޮއިކޮށްފައެވެ. އެގޮތުން ސްމާޓް ސިޓީޒްގެ ހަރަކާތްތަކުގެ އިތުރުން، މިންތީގެ ހަމަހަމަކަން ގާއިމްކޮށް، އަންހެނުން ބާރުވެރިކުރުމާއި، މޮބައިލް ޓެކޮނޮލޮޖީ މެދުވެރިކޮށް ދެމެހެއްޓެނިވި ތަރައްގީގެ ލަނޑުދަނޑިތައް ހާސިލްކުރުމަށް، މި އެއްބަސްވުމުގެ ދަށުން އުރީދޫއާ ޔޫއެންޑީޕީން ރާއްޖޭގައި މަސައްކަތް ކުރާނެއެވެ.
ޔޫއެންޑީޕީގެ ރެސިޑެންޓް ރެޕްރެޒެންޓޭޓިވް ޝޯކޯ ނޯޑާ ވިދާޅުވީ، ދުނިޔޭގެ ހުރިހާ ގައުމުތަކުން ހާސިލް ކުރުމަށްޓަކައި މަސައްކަތް ކުރަމުންދާ ދެމެހެއްޓެނިވި ތަރައްގީގެ ލަނޑުދަނޑިތަކުގެ ތެރޭގައި "ދެމެހެއްޓެނިވި ސިޓީތަކާއި މުޖުތަމައުތައް ގާއިމްކުރުން" ހިމެނިގެން ދިޔުމަކީ މުސްތަގުބަލުގައި ސްމާޓް ސިޓީތަކުގެ މުހިންމުކަން ދޭހަވާކަމެއް ކަމަށެވެ.
"ސަލާމަތާއި ރައްކާތެރިކަން އެންމެންނަށް ލިބިދޭ ދެމެހެއްޓެނިވި ދަތުރުފަތުރުގެ ނިޒާމެއް ގާއިމުކޮށް، މަގުމަތީގެ ރައްކާތެރިކަމާއި، ވައިގެ ސާފުކަން ހިފެހެއްޓުމުގެ އިތުރުން، ރައްކާތެރިގޮތުގައި ކުނި ނައްތާލުމުގެ ނިޒާމެއް ބިނާކޮށް، އަދި ހިންގުމުގެ ނިޒާމުގައި މުޖުތަމައުގެ ބައިވެރިވުން އިތުރުކުރުން މީގެ ތެރޭގައި ހިމެނޭ،" މިއަދުގެ ހަފްލާގައި ވާހަކަފުޅުދައްކަވަމުން، ޝޯކޯ ނޯޑާ ވިދާޅުވިއެވެ.
ހުޅުމާލޭ ސްމާޓް ސިޓީޒް ޕްރޮޖެކްޓް ދަށުން މިއަހަރު ތެރޭގައި ކުރުމަށް ރޭވިފައިވާ ބައެއް މަސައްކަތްތަކުގެ ތެރޭގައި، ހުޅުމާލޭގެ މުޖުތަމައު ތެރޭގައި އިތުރަށް ގުޅުން ބަދަހިކޮށް އިޖްތިމާއީ ރޫހު އާލާކުރުން، އަދި އޯޕަން ޑޭޓާ މެދުވެރިކޮށް ހުޅުމާލެ ތަރައްގީކުރުމުގައި ރައްޔިތުންގެ ބައިވެރިވުން އިތުރު ކުރުންވެސް ހިމެނެއެވެ.
އުރީދޫ އަކީ ދެމެހެއްޓެނިވި ތަރައްގީގެ ލަނޑުދަނޑިތައް ހާސިލްކުރުމަށް އެއްބަސްވެފައިވާ، ބައިނަލްއަގްވާމީ ޖަމިއްޔާކަމަށްވާ ޖީއެސްއެމްއޭގައި ހިމެނޭ މޮބައިލް އޮޕަރޭޓަރެކެވެ. މިގޮތުން، ވަކިން ހާއްޞަގޮތެއްގައި، ގޯލް 3 (ފުރިހަމަ ސިއްހަތާއި ދުޅަހެޔޮކަން)، ގޯލް 5 (މިންތީގެ ހަމަހަމަކަން) އަދި ގޯލް 9 (ސިނާއަތާއި، އާގޮތްތަކާއި، އުމްރާނީ ކުރިއެރުން) ހާސިލްކުރުމުގައި އެއްބާރުލުންދިނުމަށް އުރީދޫ މޯލްޑިވްސް އިންވަނީ އިސްނަގައިފައެވެ.
އިންސާނީ ތަރައްގީއާއި ދެމެހެއްޓެނިވި ކުރިއެރުމަށްޓަކައި، މީގެ ކުރީންވެސް އުރީދޫއާ ޔޫއެންޑީޕީ ގުޅިގެން ގިނަ ކަންތައްތަކެއް ކޮށްފައިވެއެވެ. އެގޮތުން 2016 ވަނަ އަހަރު، މި ދެފަރާތް ގުޅިގެން ވަނީ މިޔަހެލި ނަމުގައި ހިންގި ރާއްޖޭގެ ފުރަތަމަ ސޯޝަލް އިނޮވޭޝަން ކޭމްޕް ފާހަގަކޮށްލެވެއެވެ.