07 Jun 2017, 21:39

ޖެނީވާގައި މިއަދު ބޭއްވި އދގެ އިންސާނީ ހައްގުތަކާ ބެހޭ ކައުންސިލުގެ 35 ވަނަ ބައްދަލުވުމުގައި އިނގިރޭސި ވިލާތުން ރާއްޖެއާ ދެކޮޅަށް ދިން ބަޔާނުން މަސައްކަތް ކޮށްފައި ވަނީ ރާއްޖެއާ ބެހޭ ހަގީގަތް އޮޅުވާލައިގެން ދެއްކުމަށް ކަމަށް ޖެނީވާގައި ހުންނަވާ ރާއްޖޭގެ ދާއިމީ މަންދޫބު ހާލާ ހަމީދު ވިދާޅުވެއްޖެ އެވެ.

ގިނަ ގައުމުތަކެއްގެ ފަރާތުން ރާއްޖެއާ ދެކޮޅަށް ބަޔާނެއް ދިނުން

ޖެނީވާގައި މިހާރު ކުރިޔަށްދާ އދގެ ހިއުމަން ރައިޓްސް ކައުންސިލުގެ 35 ވަނަ ބައްދަލުވުމުގައި، ދުނިޔޭގެ 30 އަށް ވުރެ ގިނަ ގައުމުގެ ފަރާތުން އިނގިރޭސި ވިލާތުން ވަނީ، ރާއްޖެއާ ދެކޮޅަށް ބަޔާނެއް ދީފައެވެ.

އިނގިރޭސި ވިލާތުން އެ ބަޔާން އިއްވީ އެގައުމުގެ އިތުރުން އޮސްޓްރިއާ، އޮސްޓްރޭލިއާ، ބެލްޖިއަމް، ބަލްގޭރިއާ، ކެނެޑާ، ކްރޮއޭޝިއާ، ޗެކް ރިޕަބްލިކް، ސައިޕްރަސް، ޑެންމާކް، އެސްޓޯނިއާ، ފިންލެންޑް، ފްރާންސް، ޖޯޖިއާ، ޖަރުމަނު ވިލާތް، ގްރީސް، އައިސްލެންޑް، އަޔަލެންޑް، އިސްރާއީލު، ލެޓްވިއާ، ލިކްޓެންސްޓައިން، ލިތުއޭނިއާ، ލަގްޒަމްބާގް، މޯލްޓާ، ނެދަލެންޑްސް، ނިއުޒިލެންޑް، ޕޮލެންޑް، ސްލޮވާކިއާ، ސްލޮވޭނިއާ، ސްވީޑެން، ސްވިޓްޒަލެންޑް، ޔޫކްރެއިން އަދި އެމެރިކާގެ ފަރާތުންނެވެ.

އެ ބަޔާނުގައި އިނގިރޭސި ވިލާތުން ވަނީ ބްލޮގަރ ޔާމީން ރަޝީދު މަރާލި މައްސަލައަށް ކަންބޮޑުވުން ފާޅުކޮށް، މީގެ ކުރިން ޔާމީން އެ ކައުންސިލަށް ހާޒިރުވެ، ރާއްޖޭގައި ޚިޔާލު ފާޅުކުރުމުގެ މިނިވަންކަން ނެތިދާ މިންވަރުގެ މައުލުމާތު އެ ކައުންސިލަށް ހިއްސާކޮށްފައިވާކަން ފާހަގަކޮށްފައެވެ. އަދި ރާއްޖޭގައި އިންސާނީ ހައްގުތަކަށް މަސައްކަތްކުރާ ފަރާތްތަކަށް ބިރުދެއްކުމާއި، ހައްދުފަހަނައެޅި ހަރަކާތްތައް ހިންގާ ފަރާތްތައް ހުއްޓުވަން މަސައްކަތް ކުރުމަށް ރާއްޖެއަށް ގޮވާލިއެވެ.

މީގެ އިތުުރން ރާއްޖޭގައި އިދިކޮޅު ސިޔާސީ ހަރަކާތް ހިންގުމަށާއި އިދިކޮޅު ފިކުރުތަކުގެ ފަރާތްތަކުން ޚިޔާލު ފާޅުކުރުމުގެ މިނިވަންކަން ދޭންޖެހޭ ކަމަށާއި، ރާއްޖޭގެ ޝަރުއީ ދާއިރާ މިނިވަންކޮށް، އެހެނިހެން މުއައްސަސާތައް ވެސް ހަރުދަނާ ކުރުމަށް އިނގިރޭސިވިލާތުން ރާއްޖެއަށް ގޮވާލިއެވެ.

ހިއުމަން ރައިޓްސް ކައުންސިލުން ރާއްޖެއަށް ޒިޔާރަތް ކުރުމަށް އެދިފައިވާ ގިނަ ރިކުއެސްޓްތަކަށް ހުއްދަ ދިނުމަށް ބާރު އަޅައި، އިނގިރޭސި ވިލާތުން ބުނީ ރާއްޖޭގެ އިންސާނީ ހައްގުތަކާ ބެހޭ ހާލަތް ހަރުދަނާ ކުރުމަށް ބައިނަލްއަގުވާމީ މުޖުތަމަޢާ ގުޅިގެން ރާއްޖެއިން މަސައްކަތް ކުރާނެ ކަމަށް އުންމީދުކުރާ ކަމަށެވެ.

ރާއްޖޭގެ ރައްދު: ޔޫކޭގެ ބަޔާނުން ރާއްޖޭގެ ހަގީގަތް އޮޅުވާލަނީ

އިނގިރޭސި ވިލާތާއި 32 ގައުމުގެ ފަރާތުން ދިން މި ބަޔާނަށް ރައްދު ދެއްވައި، ޖެނީވާގައި ހުންނަވާ ރާއްޖޭގެ ދާއިމީ މަންދޫބު ހާލާ ހަމީދު ވިދާޅުވީ އެ ބަޔާނަކީ ބިނާކުރުވަނިވި ބަޔާނެއް ނޫން ކަމަށާއި، އެ ބަޔާނުން ހާމަކޮށްދެނީ ރާއްޖެއާ ބެހޭ ހަގީގީ މަންޒަރެއް ނޫން ކަމަށެވެ.

ސަފީރު ވިދާޅުވީ އެ ބަޔާނުގެ ޒަރިއްޔާއިން މަސައްކަތް ކުރަމުން ދަނީ ރާއްޖޭގެ ދާޚިލީ ސިޔާސަތުތަކަށް ކޮންމެވެސް ކަހަލަ ނުފޫޒުތަކެއް ފޯރުވުމަށް ކަމަށެވެ.

ސަފީރު ވިދާޅުވީ ރާއްޖެ ފަދަ، ވަސީލަތްތައް މަދު ކުޑަ ގައުމަކުން އިންށާނީ ހައްގުތައް ކަށަވަރުކުރުމަށް ބޮޑެތި ގޮންޖެހުންތަކަކާ ކުރިމަތިލައެވެ. އަދި ރާއްޖޭގައި ޑިމޮކްރަސީއަށް ރައްކާތެރި މާހައުލެއް ގާއިމުކުރުމަށް ކުރާ މަސައްކަތްތަކަށް ބޭރުގެ ފަރާތްތަކުން ފާހަގަކުރުމުގެ ބަދަލުގައި ދަނީ "އޮޅުވާލަމުން" ކަމަށް ހާލާ ތުހުމަތު ކުރެއްވިއެވެ.

ރާއްޖޭގެ އިންސާނީ ހައްގުތަކުގެ ހާލަތާ ބެހޭގޮތުން އިނގިރޭސި ވިލާތުން ބަޔާން ދިނުމުން ހާލާ ވަނީ އިނގިރޭސި ވިލާތުގައި ވެސް އިންސާނީ ހައްގުތައް ނެތެމުންދާ ކަމަށް، ސުލްހަވެރިކަމާއެކު އެއްވެ އުޅުމުގެ މިނިވަންކަމާއި ހައްގާ ބެހޭ ޚާއްސަ ރެޕެޓުއާއާ ހަވާލައިދީ ވިދާޅުވެ، އެގައުމަށް ބަހުގެ ހަމަލާތަކެއް ރައްދުކުރައްވައިފައެވެ.

ހާލާ ވިދާޅުވީ ރާއްޖޭގައި ހިނގަމުންދާ ކަންކަމަކީ ހަމައެކަނި ރާއްޖޭގައިވާ ކަންކަން ނޫން ކަމަށާއި، އިނގިރޭސި ވިލާތުގއިވެސް އެކަންކަން ހިނގަމުންދާ ކަމަށެވެ. އެގޮތުން، އިނގިރޭސިވިލާތުގެ ސަރުކާރުން އެޅި ބައެއް ފިޔަވަޅުތަކަކާ ގުޅިގެން އެގައުމުގައި އެއްވެ އުޅުމުގެ މިނިވަންކަން ހަނިވެ، މަދަނީ ޖަމިއްޔާތައް ހަރަކާތްތެރިވުމަށް ހުރަސްތަކެއް އެޅިފައިވާކަން އދގެ ރެޕެޓުއާ ފާހަގަކުރެއްވިކަމަށް ހާލާ ވިދާޅުވިއެވެ.

މީގެ އިތުރުން ހާލާ ވަނީ، ބްލޮގަރ ޔާމީން ރަޝީދު މަރާލި މައްސަލަ ސިޔާސީ ކުރުމަށް ބައެއް ފަރާތްތަކުން މަސައްކަތް ކުރާ ކަމަށް ވިދާޅުވެފައެވެ. އަދި ޔާމީންގެ މަރުގެ މައްސަލައާ މެދު ރާއްޖެއިންވެސް ކަންބޮޑުވާކަން ހާމަކުރައްވައި، ހާލާ ވަނީ އެ މައްސަލާގައި ތުހުމަތުކުރެވޭ އެންމެން ހައްޔަރުކޮށްފައިވާ ކަންވެސް އިންސާނީ ހައްގުތަކާ ބެހޭ ކައުންސިލާ ހިއްސާ ކުރައްވައިފައެވެ.