05 Jun 2017, 14:27
ތ. ވަންދޫ ގިރާ ސަރަހައްދު ހިމާޔަތް ކުރުމުގެ މަސައްކަތް ފެށޭނީ ކޮން ދުވަހަކުންތޯ ސާފު ކުރުމަށް އެންވަޔަރަމެންޓް މިނިސްޓަރު ތޯރިގް އިބްރާހިމާ ސުވާލު ކުރުމަށް މާދަމާ މަޖިލީހުގެ ޖަލްސާއަށް އެޖެންޑާ ކޮށްފި އެވެ.
ވަޒީރަކު މަޖިލީހަށް ހާޒިރުކޮށް ސުވާލު ކުރުމަށް ތާވަލު އެކުރީ އަހަރެއްހާ ދުވަސް ފަހުންނެވެ.
އެޖެންޑާގައި ވާގޮތުން ވަންދޫ ގިރާ ސަރަހައްދު ހިމާޔަތް ކުރަން ފަށާނެ ދުވަހެއް ސާފު ކުރުމަށް މަޖިލީހަށް މިނިސްޓަރު ތޯރިގް ހާޒިރުކޮށްދޭން އެދުނީ ކިނބިދޫ ދާއިރާގެ މެމްބަރު އަދި ކުރީގެ ޕޮލިސް ކޮމިޝަނަރު އަބްދުﷲ ރިޔާޒު އެވެ.
މަޖިލީހުގެ ތަޅުމަށް ހާޒިރުކޮށް ވަޒީރުންނާއި ސުވާލު ކުރުމުގެ ފުރުސަތަށް މިވީ އެއް އަހަރު ދުވަހުގެ ތެރޭގައި އެކި ފަހަރު މަތިން މެމްބަރުން އެދުނު ނަމަވެސް އެކަމަށް މަޖިލީހުގެ ރައީސް އިޖާބަދެއްވާފައެއްނުވެ އެވެ.
ނަމަވެސް ކޮމިޓީ މަރުހަލާގައި ބައެއް މައްސަލަތަކުގައި ވަޒީރުން ހާޒިރުކޮށް ސުވާލުކޮށްފައި އެބަހުއްޓެވެ.
އަބްދުﷲ ރިޔާޒު ހުށަހެޅުއްވި ސުވާލަކަށް މިނިސްޓަރު ހާޒިރު ކުރި ނަމަވެސް މިނިސްޓްރީން ހިންގާ އެހެން މަޝްރޫއުތަކާ ގުޅިގެން ސުވާލު ކުރުމުގެ ފުރުސަތު މެމްބަރުންނަށް ލިބޭނެ އެވެ.