01 Jun 2017, 16:42
އާސެނަލްގެ ކޯޗު ކަމުގައި އިތުރު ދެއަހަރު ދުވަހު އާސެން ވެންގާ ބަހައްޓަން އެ ކްލަބުން ނިންމުމަކީ ހައިރާންވާ ވަރުގެ ކަމެއް ނޫން ކަމަށް އެ ކްލަބުގެ ކުރީގެ ފޯވާޑް ތިއެރީ އޮންރީ ބުނެފިއެވެ.
އޮންރީ ބުނީ، ވެންގާ އިތުރު ދެ އަހަރު ދުވަހު ކްލަބުގައި ބަހައްޓަން ބުދަދުވަހު އާސެނަލުން ނިންމި ނިންމުމަކީ ހައިރާންވާވަރުގެ ޚަބަރެއް ނޫންކަމަށާއި އޭނާ ކްލަބު ދޫކޮށް ދާން ނިންމި ނަމަ އެއީ ޚަބަރަކަށް ވީސް ކަމަށެވެ. އަދި ކްލަބުގެ އެ ނިންމުމަކީ ރަނގަޅު ނިންމުމެއްތޯ ނުވަތަ ނޫންތޯ ބުނެދޭނީ "ވަގުތާއި ހާލަތު" ކަމަށްވެސް އޭނާ ބުންޏެވެ.
އޮންރީ ބުނީ، ޕްރިމިއަރ ލީގު ޓްރޮފީއެއް ހޯދުމަށް އާސެނަލުން ފެންބޮވައިގެންފައިވާތާ 13 އަހަރު ވެއްޖެ ކަމަށާއި، އެކަން ހާސިލްކޮށްދިނުމަކީ ވެންގާއަށް މިހާރު މަޖުބޫރު ކަމެއްކަމަށެވެ.
"ދެހަފްތާ ކުރީން އަހަރެން ބުނިން ކްލަބު ދޫކޮށްފަ އޭނަ ނުދާނެއޭ. އަހަރެންގެ އެ ބުނުން ދޮގެއް ނުވި،" ސްކައި ސްޕޯޓްސްއަށް އޮންރީ ބުންޏެވެ.
"މީހުން އަހަރެން ކައިރީ އެބަ ވާހަކަ ދައްކާ މިއަދުގެ އެ ޚަބަރާ ގުޅޭގޮތުން. އެއީ ޚަބަރަކަށް ވީހީ އޭނަ ކްލަބު ދޫކޮށް ދިޔަނަމަ.
"އެކަމަކު އޭނާ ނުދިޔަ، ކްލަބުގެ ބޯޑުން ބަލާފައިވަނީ، އެއީ ކްލަބަށް އެންމެ ރަނގަޅު ނިންމުންތޯ. އެކަމުގަ އަހަންނަށް އަދި އާސެނަލަށްވެސް އާކަމެއް ނެތް. 21 އަހަރު އަދި މިހާރު 22 ދެން 23 އަހަރު، އޭނަ މިތާ މަޑުކުރާނެ."
އާސެނަލުން ވެންގާގެ ކޮންޓްރެކްޓް އިތުރު ދެ އަހަރު ދުވަހަށް އާކުރުމުން، 1996 ވަނަ އަހަރުގެ ސެޕްޓެމްބަރު މަހު އެ ކްލަބާ ހަވާލުވި ކޯޗު، 23 އަހަރު ދުވަސްވަންދެން ކްލަބުގައި މަޑުކުރާނެއެވެ.
އޮންރީ ބުނީ، "އާސެނަލްގެ ފޭނެއްގެ ހައިސިއްޔަތުން އަދި ކުރީން ވެންގާ ކޯޗުކޮށްދިން ކުޅުންތެރިއެއްގެ ހައިސިއްޔަތުން އަހަރެން ވެންގާއަށް ވަރަށް ބޮޑަށް އިހްތިރާމް ކުރަން" ކަމަށެވެ.
އާސެނަލްގެ ކޯޗަކަށް ވެންގާ ހުންނާތީ އުފާކުރާ ކަމަށާއި އެހެން ނަމަވެސް ކްލަބުގެ ނިންމުމަކީ ރަނގަޅު ނިންމުމެއްކަން އަދި ނޫންކަންވެސް ވަގުތުފާއިތުވަމުން ދާވަރަކުން އެނގިގެން ދާނޭ ކަމަށްވެސް އާސެނަލްގެ ފްރާންސް ލެޖެންޑު ބުންޏެވެ.
ލީގު ޗެމްޕިއަން ބަލިކޮށް އެފްއޭއެކަޕްގެ ޓްރޮފީ ހޯދި އާސެނަލުން ސީޒަން ނިންމާލީ ވަރުގަދަ ކްލަބެއްގެ ގޮތުގައި އޮވެ ކަމަށާއި، މެޗަކުން ޓީމެއް ބަލިކުރެވުނު ކަމުގައިވީ ނަމަވެސް 38 މެޗުން އެ ނަތީޖާ ނެރުމަތީ ތަފާތު ވާހަކައެއް ކަމަށްވެސް އޮންރީ ބުންޏެވެ.
"އެންމެންވެސް އިންތިޒާރުކުރަމުން ދަނީ، ޓައިޓަލްއަށް. އޭގެ ތެރޭގައި ކްލަބުގެ ސަޕޯޓަރުން، ކުޅުންތެރީން، އަދި ޚޮދު ވެންގާވެސް ހިމެނޭ." ބެލްޖިއަމް ގައުމީ ޓީމުގެ އެސިސްޓެންޓް ކޯޗުގެ މަގާމުގައި ހުރި އޮންރީ ބުންޏެވެ.
"އެއީ އަހަރެން ދެކެން ބޭނުންވާ މަންޒަރަކީ، އެންމެ މެޗެއްގައި މޮޅު ކުޅުމެއް ދެއްކުމަކީ ތަފާތިކަމެއް. އެހެން ނަމަވެސް އަހަރެމެން އެންމެންވެސް މިތިބީ، 38 މެޗުން އެ ނަތީޖާ ނެރޭނޭ ދުވަހެއްގެ އިންތިޒާރުގައި."
އާސެނަލުން އެންމެ ފަހުން ޕްރިމިއަރ ލީގު ޓްރޮފީގައި ބީހިލުމުގެ އުފާ ހާސިލްކުރި އަހަރު އޮންރީ ވަނީ މުހިއްމު ދައުރެއް އަދާކޮށްފައެވެ. އެގޮތުން އޮންރީގެ ފަރާތުން 30 ލަނޑު ފެނިގެން ދިޔަ، 2003/04 ސީޒަންގައި އާސެނަލުން ލީގު ކާމިޔާބުކުރީ އެއްވެސް މެޗަކުން ބަލިނުވެ ރެކޯޑަކާއެކުއެވެ.