31 May 2017, 15:36
ފަތުރުވެރިކަމުގެ މަސައްކަތް ކުރުމަށްޓަކައި، ބިޑު ކުރުމެއް ނެތި ކުއްޔަށް ދޭ ރަށްރަށާއި ފަޅުތަކުގެ ލިސްޓަށް ތިން ފަޅުރަށެއް އިތުރުކޮށްފި އެވެ. މިއީ މި އަހަރު އެ ލިސްޓަށް ގެނައި ދެވަނަ އިސްލާހެވެ.
ޓުއަރިޒަމް މިނިސްޓްރީން މިއަދު ނެރުނު ބަޔާނެއްގައި ބުނީ ފަތުރުވެރިކަމާ ބެހޭ ކަންކަމަށް ދޫކުރާނެ ރަށްރަށާއި ފަޅުތަކުގެ އަދަދާއި، އެތަންތަނާ ބެހޭ މަޢުލޫމާތު ހިމެނޭ ގޮތަށް މި އަހަރަށް ކަނޑައަޅާފައިވާ ލިސްޓަށް ތިން ރަށެއް އިތުރުކޮށް، އެ ލިސްޓު އިސްލާހުކޮށްފައިވާ ކަމަށެވެ.
އެ ތިން ރަށަކީ މާލެ އަތޮޅު އުތުރުކޮޅުގައި އޮންނަ 2.50 ހެކްޓަރުގެ ކ. ކަގިއާއި، އދ. ހަންޏާމީދޫގެ އުތުރުން އޮންނަ 2.40 ހެކްޓަރުގެ އދ. ބޮޑުކާށިހުރާ، އަދި އދ. މާފުށިވަރުގެ ދެކުނުން އޮންނަ 2.10 ހެކްޓަރުގެ ފަޅުރަށް، "ދެ ހަސަނު ލޮނުބުއި ހުރާ" އެވެ.
މި ރަށްތަކުގެ ތެރެއިން އަންދާޒާކުރެވޭ އެކުއިޒިޝަން ކޮސްޓް އެންމެ ބޮޑީ ކ. ކަގީގެ އެވެ. ކ. ކަގީގެ އެކުއިޒިޝަންގެ ގޮތުގައި ޖަހާފައިވަނީ 2.1 މިލިޔަން ޑޮލަރެވެ. އދ. ބޮޑުކާށިހުރާގެ އެކުއިޒިޝަން ކޮސްޓަކީ 1.7 މިލިޔަން ޑޮލަރެވެ. އަދި ދެ ހަސަނު ލޮނުބުއި ހުރާގެ އެކުއިޒިޝަން ކޮސްޓަކީ 1.55 މިލިޔަން ޑޮލަރެވެ.
މިއަހަރުގެ ޖެނުއަރީ މަހުގެ ތެރޭގައި ވެސް ވަނީ ތިން ރަށެއް ލިސްޓަށް އިތުރުކޮށްފައެވެ. އެއީނ. ކުންނުމަލި،ތ. ގާލީއަދި ގދ. ބައުޅަގައްލަ އެވެ.