31 May 2017, 14:20
ސަމާއައިލެންޑް ރިސޯޓުން ފުރައިގެން ދަތުރުކުރަނިކޮށް އެކްސިޑެންޓްވި ލޯންޗް ޖެހުނު ދޯނީގެ ކައްޕިއާ އެކު އެ ދޯނީގައި އެ ވަގުތު ތިބި ހަތަރު ފަޅުވެރިން ހައްޔަރުކޮށްފި އެވެ.
ފުލުހުން ބުނީ އެ ހަތަރު ފަޅުވެރިންނަކީ ބިދޭސީން ކަމަށާއި އެ މީހުންގެ ވިސާގެ މައްސަލައެއް އުޅޭތީ އިމިގްރޭޝަނާ ހަވާލުކޮށްފައިވާ ކަމަށެވެ. އަދި ބަންދުގައި ބަހައްޓައިގެން މައްސަލަ ތަހުގީގު ކުރުމަށް ލޯންޗް ކައްޕީގެ ބަންދުގެ މުއްދަތައް 10 ދުވަސް ޖަހާފައިވާ ކަމަށެވެ.
ރޭ 8:30 ހާއިރު އެ ނުރައްކާތެރި އެކްސިޑެންޓް ހިނގަން މެދުވެރިވީ، ރީތިރަށް ރިސޯޓް ކައިރީ ދޯނި މަޑުކޮށްގެން އޮތްއިރު، އޭގައި އެއްވެސް އަލިކަމެއް ފެންނަ ގޮތަށް ލައިޓެއް ދިއްލާފައި ނެތުމުން، ސަމާ އައިލެންޑުން ދަތުރުކުރި ލޯންޗްގައި އިން ކައްޕިއަށް އެ ދޯނި ނުފެނިގޮސް އޭގައި ޖެހިގެންނެވެ.
އެ އެކްސިޑެންޓްގައި 14 މީހަކަށް ޒަހަމްވެފައިވާ އިރު، 11 މީހަކަށް މިހާރުވެސް އަންނަނީ އޭޑީކޭގައި ފަރުވާދެމުންނެވެ.
އޭގެ ތެރެއިން ދެ މީހެއް ތިބީ ވެންޓިލޭޓަރުގެ އެހީގަ އެވެ. އެ ދެމީހުންގެ ތެރެއިން އެކަކުގެ އެތެރެހަށީގެ ގުނަވަންތަކަށް ލޭ އެޅިފައިވާ އިރު، ދެވަނަ މީހާގެ ބޮލަށް ލިބުނު ގެއްލުމަށް މިހާރު ވަނީ ސާޖަރީވެސް ހަދާފަ އެވެ.
ރޭގެ އެކްސިޑެންޓުގައި ލޯންޗްގެ ކުރީކޮޅު ވަނީ އެއްކޮށް ހަލާކުވެފަ އެވެ.
ކަނޑުމަތީގެ ގަވާއިދުގައިވާ ގޮތުންނަމަ ރޭގަނޑު ދަތުރުކުރާ އިރު ކޮންމެ އުޅަނދެއްގައި ނެވިގޭޝަން ލައިޓް ދިއްލާފައި ހުންނަން ޖެހޭއިރު، އަލިކަމެއް އޭގައި ހުންނަން ޖެހޭނެ އެވެ.