31 May 2017, 13:43
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަދި ރައީސް މައުމޫނުގެ ދަރިކަލުން ފާރިސް މައުމޫނުގެ ބޮޑުދައިތަގެ ހާލު ވަރަށް ނާޒުކު ކަމަށާއި އެހެންކަމުން ފުލުހުންގެ ބެލުމުގެ ދަށުން ނަމަވެސް ރާއްޖޭން ބޭރަށް ދާން ހުއްދަ ދެއްވުމަށް ފާރިސް އެދިވަޑައިގެންފި އެވެ.
ފާރިސްގެ ޕާސްޕޯޓް ފުލުހުން ހިފަހައްޓާފައި ވަނީ ފުލުހުން ތަހުގީގު ކުރަމުންދާ މައްސަލައެއްގެ ތަހުގީގަށް ފިލަން މަސައްކަތް ކޮށްފާނެ ކަމަށް ބުނެ އެވެ.
އެކަމާ ގުޅިގެން ފާރިސް ރޭ ނެރުނު ބަޔާނެއްގައި ބުނެފައި ވަނީ ކޯޓު އަމުރެއްގެ ދަށުން އޭނާގެ ޕާސްޕޯޓް ހިފަހައްޓާފައި އޮތް އޮތުން ނިމުމަމަށް ގެނައުމުގެ ބަދަލުގައި ޓްރެވަލް ޑޮކިއުމެންޓެއްގައި ފުރޭނެ ގޮތް ހަމަ ޖައްސައިދިނުމަށް އެދިފައިވާނެ ކަަމަށެވެ.
އަދި ފާރިސް އާ އެކު ފުލުހުން ފޮނުވާ ނަމަ އެބޭފުޅުންގެ ހަރަދު ވެސް ދޭނެ ކަމަށް ފާރިސްގެ ބަޔާނުގައި ވަނީ ވިދާޅުވެފަ އެވެ. އަދި ވިދާޅުވެފައި ވަނީ އެއީ ތަހުގީގަށް ފިލާނޭ މީހަކު ހުށަހަޅާނެ ހުށަހެޅުންތަކެއް ނޫން ކަމަށެވެ.
"ފުލުހުންގެ ތަހުގީގަށް ބޭނުންވާ މީހަކު މޯލްޑިވްސް ޕޮލިސް ސާވިސް އަށް ހާޒިރުކުރުމަށް އަޅުގަނޑާއި، އަޅުގަނޑުގެ އާއިލާ އިން، ހުރަސް އަޅަމުން ގެންދާ ކަމަށް މިނިސްޓްރީ އޮފް ހޯމް އެފެއާޒް އިން ނެރުއްވާފައިވާ ނޫސްބަޔާނުގައި ބުނެފައިވާ ބުނުމަކީ ކަނޑައެޅިގެން ހަގީގަތާ ހިލާފަށް އަޅުގަނޑުގެ މައްޗަށް ކޮށްފައިވާ ޖިނާއީ ތުހުމަތެއް،" ފާރިސްގެ ބަޔާނުގައި ވިދާޅުވެފައިވެ އެވެ.
އެއްވެސް ގޮތަކަށް ފިލަން މަސައްކަތް ނުކުރާ ކަމަށް ފާރިސް ތަކުރާރުކޮށް ބަޔާނުގައި ވަނީ ވިދާޅުވެފަ އެވެ. އަދި ރާއްޖޭން ބޭރަށް ފުރުނު ކަމަށް ވިޔަސް ތުހުމަތު ކުރެވޭ މައްސަލާގައި ޖަވާބު ދާރީވުމަށް ފުލުހުން ބުނާ ތާރީހަކަށް ރާއްޖެ އަންނާނެ ކަމަށް ވެސް ފާރިސްގެ ބަޔާނުގައި ވިދާޅުވެފައިވެ އެވެ.
ހޯމް މިނިސްޓްރީ އިން އިއްޔެ ބުނެފައި ވަނީ ފާރިސް އާ ގުޅޭ ގޮތުން ފުލުހުންނަށް ހުށަހަޅާފައިވާ މައްސަލައެއްގައި އެމަނިކުފާނު ފުލުހުންގެ އިދާރާއަށް ހާޒިރުކުރި ނަމަވެސް، ތަހުގީގަށް އެންމެ އެކަށީގެންވާ އެއްބާރުލުން އެމަނިކުފާނުގެ ފަރާތުން ފުލުހުންނަށް ލިބިފައިނުވާ ކަމަށެވެ.
ފާރިސްގެ ޕާސްޕޯޓް ހިފަހައްޓާފައި ވަނީ ވެސް އެމަނިކުފާނު ރާއްޖެ އިން ބޭރަށް ވަޑައިގެންފި ނަމަ، ތަހުގީގަށް ހުރަސް އެޅުމުގެ ގޮތުން އެމަނިކުފާނު ވެސް އެނބުރިވަޑައިނުގެން ރާއްޖެ އިން ބޭރުގައި މަޑުކުރެއްވުމަކީ އެކަށީގެންވާ ކަމަކަށް ވާތީ ކަމަށް ހޯމް މިނިސްޓްރީގެ ބަޔާނުގައިވެ އެވެ.