30 May 2017, 12:42
ސަރުކާރާ ރައްޔިތުން ހިއްސާވާ އެންމެ ބޮޑު ވިޔަފާރި ކުންފުނި، އެސްޓީއޯގެ އަހަރީ ޢަންމު ޖަލްސާ މިރޭ އޮންނާނެ އެވެ.
އެސްޓީއޯ އިން މައުލޫމާތު ދީފައިވާ ގޮތުގައި، މިރޭ ބާއްވާ އެކުންފުނީގެ 2016 ވަނަ އަހަރުގެ އަހަރީ އަންމު ޖަލްސާ، އެހެން އަހަރުތަކުގެ ޖަލްސާތަކާ ތަފާތުވަނީ، ޓެކްނޮލޮޖީ ބޭނުންކޮށްގެން މުޅި ޖަލްސާ ވަރަށް ބޮޑަށް ޑިޖިޓަލައިޒް ކުރެވޭތީ އެވެ.
ޖަލްސާގައި އެޖެންޑާގައިވާ، ފެންނަ ނުފެންނަ ވޯޓު ނަގަންޖެހޭ ކަންކަމަށް ވޯޓު ނެގުން ކުރިޔަށްދާނީ، އެސްޓީއޯގެ މުވައްޒަފުން ޑިވެލޮޕްކޮށްފައިވާ އިލެކްޓްރޯނިކް ވޯޓިންގް ސިސްޓަމަކުންނެވެ. ޖަލްސާގައި ބައިވެރިވާ ކޮންމެ ހިއްސާދާރަކަށް ވެސް ދެ ކާޑެއް ލިބޭ އިރު، ޖަލްސާގައި ވޯޓަށް އަހާ އިރު އިލެކްޓްރޯނިކް ޑިވައިސެއްގައި ޖެހޭނީ ކާޑު ޖައްސާލާށެވެ.
މިރޭގެ ޖަލްސާ ފެށުމަށް ހަމަޖެހިފައި ވަނީ 10:00 ގައެވެ. ޖަލްސާ އޮންނާނީ ދަރުބާރުގޭ ރަންނަބަނޑޭރި މާލަމުގަ އެވެ.
އެސްޓީއޯގެ ބޯޑުން ނިންމާފައި ވަނީ، މިދިޔަ އަހަރުގެ ފައިދާއިން ހިއްސާއަކަށް 51 ރުފިޔާ ބެހުމަށެވެ.
މިރޭގެ ޖަލްސާގައި މިކަމަށް ވޯޓަށް އެހުމުގެ އިތުރުން، އެ ކުންފުނީގެ ބޯޑުގައި އާންމު ހިއްސާދާރުން ތަމްސީލުކުރުމަށް ހޮވާ ޑިރެކްޓަރަކު އިންތިޚާބުކުރުން ވެސް ކުރިޔަށް ދާނެ އެވެ. އާންމު ހިއްސާދާރުން ތަމްސީލުކުރާ ޑިރެކްޓަރުގެ މަގާމަށް ކުރިމަތިލާފައިވާ ތިން ކެންޑިޑޭޓުންނަކީ އާއިޝަތު ފަޒީނާ، އަހްމަދު އަބޫބަކުރު އަދި މިހާރު ވެސް ބޯޑުގައި އާންމު ހިއްސާދާރުން ތަމްސީލުކުރާ ޑިރެކްޓަރު ކަމުގައި ހުންނެވި މުހައްމަދު ފަރުސަތެވެ.
މީގެ އިތުރުން، އެސްޓީއޯގެ ހިއްސާދާރުންގެ ޚާއްސަ ވެބް ޕޯޓަލެއް ވެސް މިރޭ އިފްތިތާހުކުރާ ގޮތަށް ވަނީ ހަމަޖެހިފަ އެވެ.