24 May 2017, 10:12
ޓެލްއަވީވް (މޭ 24) : އެމެރިކާގެ ރައީސް ޓްރަމްޕްގެ ސަރުކާރުން އަރަބިންނާއި އިސްރާއީލާ ހަމަހަމަގޮތެއްގައި މުއާމަލާތް ކުރާނެ ކަމަށް ހީކުރުމަކީ ގޯހެއްކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
އިސްރާއީލުން ފުރާވަޑައިގަތުމުގެ ކުރިން ބޭއްވި ނޫސްކޮންފަރެންސެއްގައި ޓްރަމްޕް ވިދާޅުވީ އޭނާގެ ސަރުކާރުން އިސްރާއީލަށް ޚާއްސަ ކަމެއްދޭނީ އެކަމާ އަރަބިން ދެކޭގޮތަށް ބެލުމެއްނެތި ކަމުގަ އެވެ. އަރަބިންނާއި އިސްރާއީލާ އެއް ހަމައައެއްގައި އޭނާގެ ސަރުކާރުން މުއާމަލާތް ކުރާނެ ކަމަށް ދުށުމަކީ ގޯހެއް ކަމަށް ވެސް ޓްރަމްޕް ވިދާޅުވި އެވެ. ޓްރަމްޕް ވިދާޅުވީ އޭނާގެ ވެރިކަމެއްގައި އިސްރާއީލަށް ރޮކެޓް ހަމަލާތައް ދޭން ހަމާސް ޖަމާއަތަށް ވެސް އަދި ހިޒްބުﷲ ޖަމާއަތަށް ވެސް ނުކެރޭނެ ކަމަށާއި އިސްރާއީލު ނައްތާލުމަށް ނޫނީ އިސްރާއީލަކީ ޣައިރު ގާނޫނީ ދައިލަތެއްކަމަށް ގޮވާލަން އީރާނަށް ވެސް ދެން ނުކެރޭނެ ކަމަށް ޓްރަމްޕް ވިދާޅުވި އެވެ.
ޓްރަމްޕް ވަނީ ސައޫދީ އަށް ކުރެއްވި ދަތުރުފުޅުގައި އެމެރިކާގެ އިގްތިސާދު ރަނގަނޅުކޮށް އެމެރިކާގެ ރައްޔިތުންނަށް ވަޒީފާގެ ފުރުސަތުތައް އިތުރުކުރުމަށް ބޭނުންވާ ފައިސާ ހޯދުމަށް ޓަކައި 460 ބިލިޔަން ޑޮލަރުގެ ހަތިޔާރު ސައޫދީ އަށް ވިއްކުމުގެ އެއްބަސްވުންތަކެއްގައި ސޮއިކުރައްވާފަ އެވެ. މި ފައިސާގެ ބައެއް އެމެރިކާގެ ބައުވެފައިވާ އިންފްރާސްޓްރަކްޗާ ޒަމާނީކުރުމަށް ޓަކައި ޚަރަދުކުރާނެ ކަމަށް ވެސް ޓްރަމްޕް ވިދާޅުވެފައިވެ އެވެ. ޓްރަމްޕް ވަނީ އިސްރާއީލުގެ ޓެލްއަވީވްގައި ހުންނަ އެމެރިކާގެ އެންބަސީ އިސްރާއީލު ގަދަބާރުން ހިފާފައިވާ ގުދްސަށް ބަދަލުކުރުމަށް ވެސް ވައުދުވެފަ އެވެ.
ނަމަވެސް ގަލްފުގެ މުއްސަނދި އަރަބި ގައުމުތަކަށް ހަތިޔާރު ވިއްކުމުގެ އެއްބަސްވުންތަކުގައި ސޮއިކޮށްގެން އެގައުމުތަކުން ބިލިޔަން ޑޮލަރުގެ ނަފާހޯދުމަށް ޓަކައި މިކަންކުރުން އަދި ވަނީ މަޑުޖައްސާލާފަ އެވެ. ޓްރަމްޕް ސައޫދީއަށް ކުރެއްވި ދަތުރުފުޅުގައި ސައޫދީއާއި އެމެރިކާގެ ބަހުގެ ހަމަލާތައް އެންމެ ބޮޑަށް ރައްދުކޮށްފައި ވަނީ އިސްރާއީލުގެ އަނިޔާވެރިކަމާ ދެކޮޅަށް އެންމެ ބޮޑަށް އަޑުއުފުލާ އިސްލާމީ ގައުމު ކަމަށްވާ އީރާނަށެވެ. ޓްރަމްޕް ސައޫދީގައި އިސްލާމީ ގައުމުތަކުގެ ވެރިން އެއްކޮށްގެން ސައްލާކުރީ ވެސް ޓެރަރިސްޓް ޖަމާއަތްތަކާ ދެކޮޅަށާއި އީރާނާދެކޮޅަށެވެ. އީރާނަކީ މުސްލިމުންގެ އެންމެ ބޮޑުދުޝްމަންގެ ގޮތުގައި ހަދައިގެންނެވެ. މިއާއެކު ޓްރަމްޕް ވަނީ އިސްރާއީލާ ދެކޮޅަށް މިނިވަންކަމުގެ ޖިހާދުކުރާ ފަލަސްތީނުގެ ހަމާސް ޖަމާއަތަކީ ވެސް ނުރައްކާތެރި ޓެރަރިސްޓް ޖަމާއަތެއްކަމަށް އަރަބި އިސްލާމީ ލީޑަރުންގެ ކުރިމަތީގައި ސިފަކުރައްވާފަ އެވެ. ނަމަވެސް އެއްވެސް ލީޑަރަކު މިކަމާ އަޅާލައްވާފައެއް ނުވެ އެވެ.
ސައޫދީ ގައި ބޭއްވި އަރަބި އިސްލާމީ އެމެރިކަން ސަމިޓްގައި ފަލަސްތީނުގެ މައްސަލައަށް އިޝާރާތް ވެސް ކޮށްލާފައެއް ނުވެ އެވެ. އަދި އިސްރާއީލުގެ އަޅުވެތިކަމުގެ ދަށުގައިވާ މާތްވެގެންވާ މަސްޖިދުލްއަގްސާގެ މިނިވަންކަމަށް ވެސް އިޝާރާތްކޮށްފައެއް ނުވެ އެވެ. ޓްރަމްޕް ސައޫދީ ގައި ހުންނެވިއިރު އިސްރާއީލުގެ ޖަލުތަކުގައި ތިބި ފަލަސްތީނުގެ އަސީރުން ކުރަމުންގެންދާ ހައިހޫނު ކަމުގެ ހަޅުތާލަށް 30 ދުވަސްވެފައިވީ ނަމަވެސް އަސީރުންގެ ހައްގުތަކާބެހޭ ގޮތުން ވެސް އަރަބި އިސްލާމީ އެމެރިކަން ސަމިޓްގައި އެއްވެސް ވަރަކަށް އިޝާރާތް ކޮށްފައެއް ނުވެ އެވެ. (ނޫސްއެޖެންސީތައް)