09 May 2017, 20:40
އައިލެންޑް އޭވިއޭޝަން އިން އިސްނަގައިގެން ބާއްވާ ފުރަތަމަ ޤުރުއާން މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.
ކީރިތި ޤުރުއާނަށް ލޯބި ޖައްސައި ދަރިންގެ ހިތްތަކުގައި ޤުރުއާން ކިޔެވުމުގެ ރޫހް އާލާކޮށް އިތުރުކުރުމުގެ އިތުރުން ތަޖުވީދުގެ ހަމަތަކާއި ރީތި ރާގުގައި ޤުރުއާން ކިޔަވާ ދިވެހި ދަރިންތަކެއް އުފެއްދުމުގެ މަގުސަދުގައި ބާއްވާ އެ މުބާރާތަކީ އުމުރުން ހަ އަހަރުން ދަށުގެ އުމުރުފުރައިގެ ކުދިންނަށް އާއްމުކޮށް ހުޅުވާލައިގެން ބާއްވާ މުބާރާތެކެވެ.
އިސްލާމިކް މިނިސްޓްރީ އާއި ޒުވާނުންގެ މަރުކަޒު ގުޅިގެން މިމަހުގެ ތެރޭގައި ބާއްވާ އެ މުބާރާތް ބަހާލާފައި ވަނީ ބަލައިގެން ކިޔެވުމުގެ ބަޔަށާއި ނުބަލައި ކިޔެވުމުގެ ބަޔަށެވެ.
އައިލެންޑް އޭވިއޭޝަނުން ބުނީ، މުބާރާތް ބޭއްވުމަށް އަދި ވަކި ތާރީހެއް ކަނޑައަޅާފައި އަދި ނުވާ ކަމަށެވެ. ނަމަވެސް މުބާރާތުގައި ބައިވެރިވުމަށް އެދޭ ފޯމާއި މުބާރާތުގެ ގަވާއިދު މިހާރު ވެސް ކުންފުނީގެ ކޯޕަރޭޓް ހެޑް އޮފީހުންނާއި ކުންފުނީގެ ވެބްސައިޓުން ލިބޭނެ ކަމަށެވެ.
މުބާރާތުގައި ބައިވެރިވުމަށް އެދޭ ފޯމު ހުށަހެޅުމުގެ އެންމެ ފަހު ތާރީހަކީ އަންނަ އާދީއްތަ ދުވަހުގެ މެންދުރުފަހު 2:30 އެވެ. ފޯމް ހުށަހަޅަންޖެހެނީ ކުންފުނީގެ ކޯޕަރޭޓް ހެޑް އޮފީހަށެވެ.
މުބާރާތުގައި ވަނަތައް ހޮވުމަށް ހަމަޖެހިފައި ވަނީ ދެ ގޮފި ވަކިންނެވެ. އެގޮތުން މުބާރާތުގެ ބަލައިގެންނާއި ނުބަލާ ކިޔެވުމުގެ ގޮފިން އެންމެ މޮޅު 10 ދަރިވަރުންނާއި ކޮންމެ ގޮއްޕަކުން އެއްވަނަ ދެ ވަނަ އަދި ތިން ވަނަ ހޮވާނެއެވެ.
ނަމަވެސް ވަނަތަކަށް ހޮވޭ ދަރިވަރުންނަށް ދޭނެ އިނާމު އަދި އައިލެންޑް އޭވިއޭޝަނުން ނިންމާފައި ނުވި ނަމަވެސް، ފައިސާގެ އިނާމަކާއި ޓްރޮފީ ދޭނެ ކަމަށް އެ ކުންފުނިން ބުނެއެވެ.