07 May 2017, 14:52
އެއްވެ އުޅުމުގެ ގާނޫނަށް ގެނައި އިސްލާހާ އެކު ލޯކަލް ކައުންސިލްތަކުގެ އިންތިހާބްގައި ވާދަކުރި ފަރާތްތަކަށް ކެމްޕޭނު ކުރުމުގައި ހުރަސްތަކެއް ކުރިމަތިވި ކަމަށް ޓްރާންސްޕޭރަންސީ މޯލްޑިވެސް އިން ބުނެފި އެވެ.
ލޯކަލް ކައުންސިލްތަކުގެ އިންތިހާބު އޮބްޒޯވްކުރެއްވުމަށް ފަހު ޓްރާންސްޕޭރަންސީއަށް ފާހަގަވިކަންކަން ހިއްސާކުރުމަށް މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެ ޖަމިއްޔާގެ އެގްޒެކެޓިވް ޑިރެކްޓަރު މަރިޔަމް ޝިއުނާ ވިދާޅުވީ އެއްވެ، އުޅުމުގެ ގާނޫނުގެ ދަށުން ކެނޑިޑޭޓުންނާއި ސިޔާސީ ޕާޓީތަކަށް ވެސް ހުރަސްތަކެއް ކުރިމަތިވި ކަމަށާއި އެންމެ ބޮޑު ގޮންޖެހުމަކާ ކުރިމަތިލާން ޖެހުނީ އިދިކޮޅު ފަރާތްތަކުން ކަމަށެވެ.
"އެއްވެއުޅުމުގެ ހައްގު ހަނިކުރެވިފައިވުމުން ފުރިހަމަ ގޮތުގައި ހުރިހާ ފަރާތްތަކަށް ކެމްޕޭނު ކުރުމުގައި ހުރަސް އެޅުނު ކަން ފާހަގަކުރަން. އަދި އެގާނޫނު ތަންފީޒުކުރުމުގައި އިދިކޮޅު ސިޔާސީ ޕާޓީތަކަށް ހަރުކަށި އުސޫލުތަކެއް ގެންގުޅޭކަން އެފަރާތްތަކުން އަޅުގަނޑުމެންނާ ހިއްސާކޮށްފައިވޭ،" އޭނާ ވިދާޅުވި އެވެ.
އިދިކޮޅު ފަރާތްތަކުން ފާހަގަކުރި ކަންކަމުގެ ތެރޭގައި ކެމްޕޭން ޖަލްސާތަކަށް ތަން ދޫކުރުމާއި މަގުމަތީ ހަރަކާތްތައް ކުރިއަށް ގެންދިއުމުގައި އެ ފަރާތްތަކަށް ފުރުސަތު ހަނިކޮށްފައިވާ ކަނަށް ފާހަގަ ކުރި ކަމަށް ޝިއުނާ ވިދާޅުވި އެވެ.
އެއްވެ އުޅުމުގެ ގާނޫނަށް ގެނައި އިސްލާހުގެ އިތުރުން އަބުރުރައްކާތެރިކުރުމާއި ހިޔާލުފާޅުކުރުމުގެ މިނިވަންކަން ރައްކާތެރިކުރުމުގެ ގާނޫނުގެ ސަބަބުން ވެސް ކެމްޕޭނު ކުރުމާއި ކެމްޕޭނު މެސެޖުތައް ފޯރުކޮށްދިނުމުގައި ދަތިތަކެއް ކުރިމަތިވި ކަމަށް ފާހަގަކުރި އެވެ. އަދި ކުރީގެ އިންތިހާބްތަކެކޭ އެއްގޮތަށް މިފަހަރުގެ އިންތިހާބުގައި ވެސް އަންހެން ކެނޑިޑޭޓުން މަދުކަން ޓްރާންސްޕޭރަންސީން ފާހަގަކުރި އެވެ.
"ސިޔާސީ އިސް މަގާމުތަކަށް އަންހެނުންގެ ބައިވެރިވުން އިތުރުކުރުމަށް އެކަށީގެންވާ މަސަތްކަތްތަކެއް ދައުލަތުންނާއި ސިޔާސީ ޕާޓީތަކުން ވެސް ކުރެވިފައިނުވާކަން ފާހަގަކުރަން،" ޝިއުނާ ވިދާޅުވި އެވެ.
ވޯޓްލުމުގެ ވަގުތު ކުއްލިއަކަށް އިތުރުކުރިކަން ފާހަގަކޮށް ޝިއުނާ ވިދާޅުވީ އެކުމުގެ ސަބަބުން ދުވަހުގެ އިދާރީ ކަންކަމަށް އަސަރުކުރިކަން ފާހަގަވެގެން ދިޔަ ކަމަށެވެ.