07 May 2017, 08:34
ގައުމީ އެއާލައިން މޯލްޑިވިއަނުން ބައިނަލްއަގުވާމީ ދަތުރުތައް ކުރަން ބޭނުންކުރާ އެއާބަސް އޭ321 މަރުކާގެ އާ މަތިންދާބޯޓު މިއަހަރު ލިބޭނެ ކަމަށް އެ އެއާލައިނުން ބުނެފި އެވެ.
މޯލްޑިވިއަން ހިންގާ އައިލެންޑް އޭވިއޭޝަން ސާވިސެސްއިން މިދިޔަ މާޗްމަހު ވަނީ އޭ321 މަރުކާގެ ބޯޓެއް ކުއްޔަށް ހިފުމަށް އެދި އިއުލާނެއް ކޮށްފަ އެވެ. އެ އިއުލާނުގައި ބުނެފައިވާ ގޮތުގައި، އޭ321 މަރުކާގެ ބޯޓެއް މޯލްޑިވިއަނުން ކުއްޔަށް ހިފާނީ މަދުވެގެން ހަ އަހަރުގެ މުއްދަތަކަށެވެ.
އޭ321 މަރުކާގެ މަތިންދާބޯޓަކީ 200 ފަސިންޖަރުންގެ ޖާގައިގެ ބޯޓެކެވެ. މޯލްޑިވިއަނުން މިހާރު ވެސް އޭ321 މަރުކާގެ ބޯޓެއް އޮޕަރޭޓު ކުރެއެވެ. އޭގެ އިތުރުން، 152 މީހުންގެ ޖާގައިގެ، އެއާބަސް އޭ320 މަރުކާގެ ބޯޓެއް ވެސް މޯލްޑިވިއަނުން އޮޕަރޭޓު ކުރެއެވެ. އެ ބޯޓުތައް ބޭނުން ކުރަނީ ބައިނަލްއަގުވާމީ ދަތުރުތައް ކުރުމަށެވެ.
މޯލްޑިވިއަން ހިންގާ އައިލެންޑް އޭވިއޭޝަންގެ މެނޭޖިން ޑިރެކްޓަރު އަބްދުލް ހާރިސް ސަން އަށް ވިދާޅުވީ، އެ ބޯޓު ގެނައުމަށް ކުންފުންޏަކާ އެކު މިހާރު މަޝްވަރާކުރަމުން އަންނަ ކަމަށާއި މިއަހަރު ތެރޭގައި އާ ބޯޓު ރާއްޖެއަށް ގެނެވޭނެ ކަމަށެވެ. ނަމަވެސް ސީދާ ތާރީހެއް ދަންނަވަން ދަތިކަމަށް ހާރިސް ވިދާޅުވި އެވެ.
ހާރިސް ވިދާޅުވީ، އެ ބޯޓު ގެނައުމާ އެކު އިންޑިއާގެ ޓްރިވެންޑްރަމް އަށް އިތުރު ފްލައިޓްތައް ބާއްވާނެ ކަމަށެވެ. އަދި ޗައިނާގެ އިތުރު މަންޒިލްތަކަށް ދަތުރުތައް ފަށާނެ ކަމަށާއި ބެންކޮކަށް ވެސް އިތުރު ދަތުރުތަކެއް ބާއްވާނެ ކަމަށް ހާރިސް ވިދާޅުވި އެވެ.
މޯލްޑިވިއަންގެ ބައިނަލްއަގުވާމީ މަންޒިލުތަކުގެ ތެރޭގައި ޗައިނާގެ ޝިއާން، ވޫހަން، ނަންޖިންގް، ޗޮންގްޗިންގް، ޗެންގްދޫ އަދި ޗަންޝާ ހިމެނެއެވެ.
އަދި ތައިލެންޑުގެ ބެންކޮކް، އިންޑިއާގެ ޗެންނާއީ، ބަންގްލަދޭޝްގެ ދާކާގެ އިތުރުން އިންޑިއާގެ ޓްރިވެންޑްރަމަށް ވެސް މޯލްޑިވިއަނުން ދަތުރު ކުރެއެވެ.