04 May 2017, 14:15
އެކަށީގެންވާ ބޯފެނުގެ ނިޒާމްގެ ޚިދުމަތް އެންމެހައި ރައްޔިތުންނަށް ފޯރުކޮށް ދިނުމުގެ ސިޔާސަތުގެ ދަށުން ފެނުގެ ނިޒާމް ގާއިމުކުރުމުގެ މަޝްރޫޢު ތިން ރަށަކަށް އަދި ނަރުދަމާ ނިޒާމު ހަ ރަށެއްގައި ގާއިމު ކުރުމުގެ މަސައްކަތް ބަޔަކާ ހަވާލުކޮށް އެއްބަސްވުމުގައި ސޮއި ކޮށްފިއެވެ.
އެންވަޔަރަމަންޓް މިނިސްޓްރީގައި މިއަދު ބޭއްވި ރަސްމިއްޔާތެއްގައި ދ. ކުޑަހުވަދޫ އާއި ތ. ގުރައިދޫ އަދި ގއ. ވިލިނގިލީގައި ފެނުގެ ނިޒާމް ގާއިމު ކުރުމުގެ މަސައްކަތް ހަވާލު ކުރީ ޖޮއިންޓް ވެންޗާ އެންޖެލިކް އިންޓާނޭޝަނަލް ލިިމިޓެޑް އެންޑް އަޔަން އެކްސްޗޭންޖް އިންޓަރނޭޝަނަލް ލިމިޓެޑާ އެވެ.
އެ އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ މިނިސްޓަރ އޮފް އެންވަޔަރަންމަންޓް އެންޑް އެނަޖީ އަލްފާޟިލް ޠާރިޤު އިބްރާހީމެވެ. އަދި ޖޮއިންޓް ވެންޗަރ އެންޖެލިކް އިންޓަރނޭޝަނަލް ލިމިޓެޑް އެންޑް އަޔަން އެކްސްޗޭންޖް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ ސީނިއާ ޖެނެރަލް މެނޭޖަރު އަނިލް އަރޯރާ އެވެ.
ތިން ރަށަކަށް ބޯފެން އަދި ހަ ރަށެއްގައި ނަރުދަމާ ގާއިމު ކުރުމަށް ކުންފުނިތަކަށް ހަވާލުކޮށް އެއްބަސްވުމުގައި ސޮއި ކުރުމަށް ބޭއްވި ރަސްމިއްޔާތުގެ ތެރެއިން--- ސަން ފޮޓޯ/ މުހައްމަދު އަފްރާހް
އޭގެ އިތުރުން ނަރުދަމާ ނިޒާމުގެ މަޝްރޫއުގެ މަސައްކަތް ހަ ރަށެއްގައި ގާއިމު ކުރުމަށް މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމް.އާރް.ޑީ.ސީ) އަދި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމް.ޓީ.ސީ.ސީ)އެކު މިއަދު ވަނީ އެއްބަސްވުމުގައި ސޮއިކޮށްފަ އެވެ.
އެގޮތުން ލ. މާވަށާއި އދ. ހަންޔާމީދޫ އަދި އެ އަތޮޅު އޮމަދޫގެ ނަރުދަމާގެ މަސައްކަތް ހަވާލުކޮށްފައި ވަނީ އެމްއާރްޑީސީއާ އެވެ. އެމްއާރްޑީސީގެ ފަރާތުން އެ އެއްބަސްވުމުގައި ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު ނިމާލެވެ.
ރ. ރަސްމާދޫ، ރ. މާކުރަތު، ފ. ފީއަލިގެ ނަރުދަމާގެ މަސައްކަތް އެމްޓީސީސީއާ ހަވާލުކޮށް ކުރިއަށް ގެންދިއުމަށް އެންވަޔަރަމަންޓު މިނިސްޓްރީން ވަނީ އެއްބަސްވެފަ އެވެ. އެމްޓީސީސީގެ ފަރާތުން އެއް ބަސްވުމުގައި ސޮއި ކުރެއްވީ ޑެޕިއުޓީ މެނޭޖިން ޑިރެކްޓަރު އަލްފާޟިލް އަހުމަދު ކުރިކް ރިޒާ އެވެ.
ތިން ރަށަކަށް ބޯފެން އަދި ހަ ރަށެއްގައި ނަރުދަމާ ގާއިމު ކުރުމަށް ކުންފުނިތަކަށް ހަވާލުކޮށް އެއްބަސްވުމުގައި ސޮއި ކުރުމަށް ބޭއްވި ރަސްމިއްޔާތުގައި މިނިސްޓަރު ވާހަކަފުޅު ދައްކަވަނީ--- ސަން ފޮޓޯ/ މުހައްމަދު އަފްރާހް
ސޮއި ކުރުމަށް ބޭއްވި ރަސްމިއްޔާތަށްފަހު ވާހަކަފުޅު ދައްކަވަމުން މިނިސްޓަރު ތާރިގު ވިދާޅުވީ، ފެނުގެ ނިޒާމް ގާއިމު ކުރުމަށް ހަވާލުކުރެވުނު ތިން ރަށުގެ އަމަލީ މަސައްކަތަށް 6.8 މިލިއަން ރުފިޔާ ހަރަދުވާނެ ކަމަށެވެ. އަދި އެ މަސައްކަތް 18 މަސް ދުވަހުގެ ތެރޭ އެއްކޮށް ނިމި ސާފު ބޯފެނުގެ ނިޒާމް އެ ތިން ރަށުގައި ގާއިމުވެފައި ހުންނާނެ ކަމަށް މިނިސްޓަރު ވިދާޅުވި އެވެ.
ތާރިގު ވިދާޅުވީ ނަރުދަމާގެ މަސައްކަތް ހަވާލު ކުރެވުނު ކުންފުނިން އެ މަސައްކަތް އެންމެ ފުރިހަމައަށް ކުރައްވާނެ ކަމަށް އުންމީދު ކުރައްވާ ކަމަށާއި ކައިރި މުސްތަގުބަލެއްގައި އެ ހަރަށުގެ ނަރުދަމާގެ މަަސައްކަތް ވެސް ނިންމާލެވޭނެ ކަމަށެވެ.
އެ ރަސްމިއްޔާތުގައި ވާހަކަދައްކަވަމުން ނިމާލް އަދި ރިޒާ ވިދާޅުވީ އެ މަަސައްކަތް އެންމެ ފުރިހަމައަށް ކުރިއަށް ގެންގޮސް ވަރަށް އަވަހަށް މަަސައްކަތް ނިންމާލެވޭނެ ކަމަށެވެ.