03 May 2017, 15:42
ޔާމީން ރަޝީދު މަރާލާފައި ވަނީ ފުލުހުންގެ އިހުމާލުން ކަމަށް ބުނެ، ފުލުހުންނާ ދެކޮޅަށް ސިވިލް ކޯޓަށް މައްސަލައެއް ހުށަހަޅައިފި އެވެ.
އާއިލާގެ ފަރާތުން އެ މައްސަލަ ސިވިލް ކޯޓަށް ހުށަހެޅުއްވީ ކުރީގެ ބަންޑާރަ ނައިބު އަދި މަޝްހޫރު ގާނޫނީ ވަކީލު ހުސްނުއްސުއޫދެވެ.
ސުއޫދު ވިދާޅުވީ 2010 ވަނަ އަހަރުން ފެށިގެން އެކި ފަރާތްތަކުން ޔާމީނަށް މަރުގެ އިންޒާރު ދީފައިވާ ކަމަށާއި އެކަން ފުލުހުންގެ ސަމާލު ކަމަށް ގެނައިކަން ޔާމީން ރަޝީދުގެ ޓްވިޓާއިން ފެންނަން އޮތް ކަމަށެވެ.
"އިންޒާރުތަކުން ހިމާޔަތް ލިބިގަތުމަށް ފުލުހުންނަށް ވަނީ މައްސަލަ ހުށަހަޅާފައި. އަދި 2014 ވަނަ އަހަރު އެ މައްސަލަ ވަނީ ފުލުސް އޮފީހަށް ރިޕޯޓްކޮށްފައި. އޭގެ ފަހުން 2016 ވަނަ އަހަރު އަނެއްކާ ވެސް ޑިސެމްބަރު މަހުގެ ތެރޭގައި މިވަނީ ރިޕޯޓްކޮށްފައި،" އޭނާ ވިދާޅުވިއެވެ.
ސުއޫދު ވިދާޅުވީ ޔާމީން ރަޝީދަށް ދެމުން ގެންދިޔަ މަރުގެ އިންޒާރުތައް ފުލުހުންނަށް ރިޕޯޓް ކުރަމުން ދިޔަ ނަމަވެސް ފުލުހުންގެ ފަރާތުން އަދާކުރަން ޖެހޭ ޒިންމާ އަދާނުކުރުމުގެ ސަބަބުންނާއި އެ މައްސަލަ ތަހުގީގު ކުރަންޖެހޭ ވަރަށް ތަހުގީގު ނުކުރުމުން ޔާމީން ރަޝީދު ވަނީ މަރާލާފައި ކަމަށެވެ.
"އެހެންވީމަ މިކަން ހިނގާފައި ވަނީ ފުލުހުންގެ އިހްމާލުން ކަމަށް ސާބިތު ކުރުމަށް އަޅުގަނޑުމެން މިއަދު މައްސަލަ ހުށަހެޅީ. ފުލުހުން އަދާކުރަންޖެހޭ ގާނޫނީ މައްސޫލިއްޔަތު އަދާކުރެވުނު ނަމަ އެ މައްސަލަ، މި މަރުވުން ނުވާނެ ކަމެއް ކަމަށް އަޅުގަނޑުމެން ދެކެނީ،" އޭނާ ވިދާޅުވިއެވެ.
ސުއޫދު ވިދާޅުވީ ފުލުހުންގެ ވާޖިބަކީ ދިވެހި ކޮންމެ ރައްޔިތަކަށް ހިމާޔަތް ފޯރުކޮށްދިނުން ކަމަށާއި މީހަކަށް މަރުގެ އިންޒާރު ދީފިނަމަ އެކަން ތަހުގީގު ކުރުމަކީ ވެސް ފުލުހުން ކޮންމެހެން ކުރަން ޖެހޭނެ ކަމެއް ކަމަށެވެ.
ޔާމީން ރަޝީދުގެ މަރުގެ މައްސަލާގެ ފޯކަސް ބަދަލުކުރުމަށް އާއިލާއިން މަސަތްކަތް ނުކުރުމަށް ފުލުހުން އިއްޔެ ބުނެފައިވާތީވެ އެކަމަށް ރައްދު ދެއްވައި ސުއޫދު ވިދާޅުވީ އާއިލާއިން އެފަދަ ވިސްނުމެއް ނުގެންގުޅޭ ކަމަށާއި އާއިލާއިން ބޭނުންވަނީ އެ މައްސަލަ މިނިވަންކަމާ އެކު ތަހުގީގު ކޮށްދިނުމަށް ކަމަށެވެ.
"އާއިލާއިން ވެސް ބޭނުންވަނީ މިކަމުގެ ފޯކަސް ނުވަތަ މޯޓިވް ބަދަލުވިޔަ ނުދީ ހަމަ ސީދާ ރަނގަޅު ތަހުގީގެއް ކުރެވި މިނިވަން ތަހުގީގެއް ކުރެވި އިތުބާރު ކުރެވޭނެ ތަހުގީގެއް ކުރެވި މި ކުށް ކުރި ފަރާތް ގާނޫނުގެ ކުރި މައްޗަށް ހާޒިރު ކުރުވުން ނުވަތަ ގާނޫނޫގެ ކުރިމަތީގައި ޒިންމާ އުފުލުން،" އޭނާ ވުދާޅުވިއެވެ.
ސުއޫދު ވަނީ ޔާމީންގެ މަރުގެ މައްސަލާގައި "ތުންތުން މަތިން" ބޮޑެތި ކަންބޮޑުވުންތަކެއް ހުރި ވާހަކަތަކެއް ރަށު ތެރޭގައި ދެކެވެމުންދާ ކަމަށް ފާހަގަކޮޮށް އެފަދަ ވާހަކަތައް ހުއްޓުވުމަށް ނުވަތަ އެދެކެވޭ ވާހަކަތަކުގެ ހަގީގަތް ހާމަކޮށްދިނުމަށް ފުލުހުންގެ ކިބައިން އެދިފައެވެ.
ފުލުހުން މީގެ ކުރިން ބުނެފައި ވަނީ އެ މައްސަލާގައި ތުހުމަތުކުރެވޭ މީހުންނާ ސުވާލުކޮށް ހެދި ކަމަށެވެ. ނަމަވެސް އެއްވެސް މީހަކަށް ފިޔަވަޅު އެޅިކަމެއް ފުލުހުން ހާމައެއް ނުކުރެއެވެ.