02 May 2017, 08:20
މޯލްޑިވްސް ޓްރާންސްޕޯޓު އެންޑް ކޮންޓްރެކްޓިންގް ކޮމްޕެނީ ޕލކ (އެމްޓީސީސީ)ގެ ޑިރެކްޓަރުންގެ ބޯޑުގައި ހިމެނޭ ޑިރެކްޓަރުންގެ އަދަދު މަދުކުރުމަށް ހުށަހަޅަން ނިންމައިފި އެވެ.
އެމްޓީސީސީގެ ހިންގާ ގަވާއިދު ބުނާ ގޮތުގައި، އެ ކުންފުނީގެ ޑިރެކްޓަރުންގެ ބޯޑުގައި ތިބެން ޖެހެނީ 10 ޑިރެކްޓަރެކެވެ. އެއީ ސަރުކާރުން އައްޔަނުކުރާ ހަ މެމްބަރަކާއި، އާންމު ހިއްސާދާރުން ތަމްސީލުކުރުމަށް ހިއްސާދާރުން އިންތިހާބުކުރާ ހަތަރު މެމްބަރެކެވެ.
އެހެން ނަމަވެސް ހިއްސާދާރުންގެ އަދަދު ހަތަކަށް ދަށްކުރުމަށް ހުށަހަޅަން ވަނީ ނިންމައިފައެވެ. ހިންގާ ގަވައިދަށް ހުށަހަޅާ އިސްލާހު ބުނާ ގޮތުގައި، އެ ކުންފުނީގެ ޑިރެކްޓަރުންގެ ބޯޑުގެ ގާނޫނީ އަދަދަކީ ހަތެކެވެ. އެއީ ކުންފުނީގެ 100 ޕަސަންޓު ހިއްސާގެ ތެރެއިން ކޮންމެ 14.29 ޕަސަންޓު ހިއްސާ ތަމްސީލުކުރުމަށް އެއް ޑިރެކްޓަރެވެ.
އެމްޓީސީސީގެ ހިއްސާ މިހާރު ބެހިގެންވާ ގޮތަށް ބަލާއިރު، އެމްޓީސީސީގައި އޮންނަނީ ދިވެހި ސަރުކާރުގެ 47.8 ޕަސަންޓު ހިއްސާ، މޯލްޑިވްސް ނޭޝަނަލް ޝިޕިންގް ލައިން (އެމްއެންއެސްއެލް)ގެ 7.5 ޕަސަންޓު ހިއްސާ، އަދި އާންމުންގެ 44.7 ޕަސަންޓު ހިއްސާއެވެ.
އެހެންކަމުން މި އިސްލާހު ފާސްވެއްޖެ ނަމަ، ހިއްސާ މިހާރު ބެހިގެންވާ ގޮތަށް ބަލާއިރު އެމްޓީސީސީގެ ޑިރެކްޓަރުންގެ ބޯޑުގައި ތިބޭނީ މެނޭޖިންގް ޑިރެކްޓަރުވެސް ހިމެނޭ ގޮތަށް ސަރުކާރުން އައްޔަނުކުރާ ހަތަރު ޑިރެކްޓަރުންނާއި، އާންމު ހިއްސާދާރުން އިންތިޚާބުކުރާ ތިން ޑިރެކްޓަރުންނެވެ.
މި އިސްލާހުގެ އިތުރުން އިތުރު އިސްލާހުތަކެއް ހިންގާ ގަވައިދާއި އަސާސީ ގަވައިދަށް ވެސް ހުށަހަޅާފައިވާ އިރު، މި އިސްލާހުތައް ފާސްކުރުމަށްޓަކައި އެމްޓީސީސީގެ "ޚާއްސަގޮތުން ކުރާ އާންމު ޖަލްސާ" ނުވަތަަ އެކްސްޓްރާ އޯޑިނަރީ ޖެނެރަލް މީޓިންގެއް މި މަހުގެ ތެރޭގައި ބޭއްވުމަށް ވަނީ ނިންމައިފައެވެ. މެއި 15 ވާ ހޯމަ ދުވަހުގެ ރޭ، ހޮޓެލް ޖެންގައެވެ.
އެ ޖަލްސާގައި ހުށަހަޅާ އިތުރު އިސްލާހުތަކަށް ބަލާއިރު، ހިއްސާގެ މޫނުމަތީ އަގު ދަށްކޮށް، ރައިޓްސް އިޝޫކުރުމަށް ކުންފުނީގެ އަސާސީ ގަވައިދަށް ބަދަލު ގެނައުމަށް ފާސްކުރުމުގެ އިތުރުން، ސާކިއުލާ މެދުވެރިކޮށް ބޯޑު ޑިރެކްޓަރުން ގަރާރުތައް ފާސްކުރުމާއި، އަހަރީ އާންމު ޖަލްސާތަކުގައި ޕްރޮކްސީންނަށް ތަމްސީލުކުރެވޭ ހިއްސާދާރުންގެ އަދަދު 500 އިން 100 އަށް މަދުކުރުމަށް ހިންގާ ގަވައިދަށް ހުށަހެޅުން ހިމެނެއެވެ.