01 May 2017, 15:19
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ މިދިޔަ އަހަރުގެ ފައިދާ އިން ހިއްސާއަކަށް 24 ރުފިޔާ ބަހަން ނިންމައިފި އެވެ.
އެކުންފުނިން ބުނި ގޮތުގައި އިއްޔެ ބޭއްވި އެކުންފުނީގެ ބޯޑު މީޓިންގައި އެގޮތަށް ނިންމީ ޑިރެކްޓަރުންގެ އަގުލަބިއްޔަތުންނެވެ.
މިދިޔަ އަހަރުގެ ފުރަތަމަ ކުއާޓަރުގައި އެކުންފުންޏަށް ސާފު ފައިދާގެ ގޮތުގައި ލިބިފައި ވަނީ 29.8 މިލިއަން ރުފިޔާ އެވެ. ދެވަނަ ކުއާޓަރުގައި ލިބުނު އާމްދަނީ 29.3 މިލިއަންއަށް ދަށްވެ، ތިން ވަނަ ކުއާޓަރުގައި އެ އަދަދު 14.4 މިލިއަނަށް ވެއްޓުނެވެ. ނަމަވެސް އަހަރުގެ ފަހު ކުއާޓަރުގައި ކުންފުނީގެ ސާފު ފައިދާ ވަނީ 115.1 ޕަސެންޓު އިތުރުވެ 40.8 މިލިއަން ރުފިޔާއަށް އަރައިފަ އެވެ.
މިދިޔަ އަހަރު އެމްޓީސީސީ އިން 65 މަޝްރޫއެއްގެ މަސައްކަތް ފަށާފައިވާ އިރު، ހަ މަޝްރޫއެއްގެ މަސައްކަތް ވަނީ ނިންމާލައިފަ އެވެ. މިހާރު ވެސް 59 މަޝްރޫއެއް އެކުންފުނިން ކުރިއަށް ގެންދާކަމަށް އެމްޓީސީސީ އިން ބުނެ އެވެ.
އަހަރު ނިމުނު އިރު ކުންފުނީގެ ޖުމްލަ ސާފު ފައިދާ ހުރީ 104 މިލިއަން ރުފިޔާގަ އެވެ.