25 Apr 2017, 13:41
މާލޭ ލީގުގައި މިއަދު ހަވީރު ވިކްޓަރީއާ ދެކޮޅަށް މާޒިޔާ ނުކުންނަ އިރު، އޭއެފްސީ ކަޕްގައި އިންޑިއާގެ މޯހަން ބަގާން އަތުން މާޒިޔާ މޮޅުވެފައި އޮތުމަކީ މިއަދުގެ މެޗަށް ނިކުންނަ އިރު އެ ޓީމަށް އޮންނާނެ ވަރަށް ބޮޑު ހިތްހަމަ ޖެހުމަކަށް ވާނެ ކަމަށާއި ނަމަވެސް ވިކްޓަރީން ނުކުންނާނީ މާޒިޔާ ބަލިކޮށް ތިން ޕޮއިންޓްހޯދަން ކަަމަށް ވިކްޓަރީގެ ކޯޗް އަލީ ސުޒޭން ބުންޏެވެ.
މިއަދު ހަވީރު 16:00ގައި ގައުމީ ދަނޑުގައި މާޒިޔާ އަދި ވިކްޓަރީ ބައްދަލުކުރާ މެޗުގެ ކުރިން ވާހަކަ ދައްކަމުން، ވޭތުވެ ދިޔަ އަހަރު މާޒިޔާގެ ހެޑް ކޯޗެއްގެ ގޮތުގައި އެޓީމަށް ކާމިޔާބީތަކެއް ހޯދައިދީފައިވާ ސުޒޭން ބުނީ، މާޒިޔާގައި އޮތީ ވަރުގަދަ ސްކޮޑެއް ކަމަށާއި އެޓީމު މިވަގުތު އޮތީ ރަނގަޅު ފޯމެއްގައި ކަމުން އެ ކަމަށް ވަރަށް ބޮޑަށް ސަމާލުވާން ޖެހޭނެ ކަމަށެވެ.
އޭނާ ބުނީ މާޒިޔާގެ ކެޕްޓަން އަސަދުﷲ އަބްދުﷲ އަދި އެންމެ ފަހުން މާޒިޔާއިން ރަށުން ބޭރުގައި މޯހަން ބަގާންއާ ދެކޮޅަށް ކުޅުނު މެޗުގައި ރަނގަޅު ކުޅުމެއް ދައްކައި އެ މެޗުގައި ލަނޑެއް ކާމިޔާބުކުރި މުހައްމަދު އުމެއިރަށް ވަކިން ހާއްސަ ގޮތެއްގައި ވިކްޓަރީގެ ޑިފެންސުން ސަމާލުވާން ޖެހޭނެ ކަމަށެވެ.
" މާޒިޔާ އޮތީ ރަށުން ބޭރުގައި ހޯދި ކާމިޔާބީއާއެކު ވަރަށް ރަނގަޅު ފޯމެއްގައި. ވިކްޓަރީން ޖެހޭނެ ވަރަށް ބޮޑަށް މާޒިޔާއާ މެދު ސަމާލުވާން. ހާއްސަ ގޮތެއްގައި އެޓީމުގެ އަސަދުﷲ އަދި އުމޭރަށް ސަމާލުވާން ޖެހޭނެ،" ސުޒޭން ބުންޏެވެ.
އޭޕްރީލް 13، 2017: މާލޭ ލީގުގައި ނިއު ރޭޑިއަންޓް އާއި މާޒިޔާ ބައްދަލުކުރި މެޗުގެ ތެރެއިން: ފޯރިގަދަ ކުޅުމަކަށް ފަހު 2 - 1 ލަނޑުން މެޗު ކާމިޔާބު ކުރީ މާޒިޔާ -- ސަން ފޮޓޯ // ފަޔާޒު މޫސާ
މިއަދުގެ މެޗާ ގުޅޭގޮތުން، މި ސީޒަނުގައި މާލޭ ލީގުގައި ކުޅުނު އެއްވެސް މެޗަކުން ބަލިވެފައި ނުވާ، މާޒިޔާގެ ކޯޗް މަރްޔާން ސެކުލޮވްސްކީ ބުނީ ވަރުގަދަ މެޗެއް ކުޅުމަށް ފަހު މި މެޗަށް ނުކުންނައިރު ޓީމް އެވަރަށް ތައްޔާރު ނުވެވިދާނެތީ ކަންބޮޑުވާކަމަށާއި ވިކްޓަރީގައިވެސް އޮތީ ވަރުގަދަ ސްކޮޑެއްކަމުން މާޒިޔާއިން ކުޅެން ޖެހޭނީ ވަރަށް ވިސްނައިގެން ކަމަށެވެ.
އަދި ވިކްޓަރީ ފަދަ ޓީމެއް އަތުން މޮޅުވެވޭނީ ވަރަށް ރަނގަޅަށް މަސައްކަތް ކޮށްގެން ކަމަށާއި ވިކްޓަރީގައި މި ވަގުތު ހުރީ މޮޅު ކޯޗެއްކަންވެސް މާޒިޔާއިން ދަންނަން ޖެހޭނެ ކަމަށް ސެކުލޮވްސްކީ ބުންޏެވެ.
" ވިކްޓަރީ އަކީ މޮޅު ޓީމެއް. އެޓީމުގެ ކޯޗަކީވެސް މޮޅު ކޯޗެއް. އަހަރަމެން ބޮޑު މެޗެއް ކުޅެފަ އައިމަ އެބަޖެހޭ ކުޅުންތެރިން ފިޓް ތޯވެސް ބަލަން. ނަމަވެސް މަސައްކަތްކޮށްފިއްޔާ ކާމިޔާބުވާނެ،" ސެކުލޮވްސްކީ ބުންޏެވެ.