23 Apr 2017, 23:47
އަންހެނުންގެ ބާރުވެރިކަން ދެނެގަތުމަށްޓަކައި ވިމެންސް އޮން ބޯޑްސް އިން ހިންގި ސާވޭގެ ރިޕޯޓް ނެރެފި އެވެ.
އެ ރިޕޯޓު ނެރެދެއްވާފައި ވަނީ މިނިސްޓާ އޮފް ސްޓޭޓް ފޯ ހެލްތު، ދުންޔާ މައުމޫނެވެ.
އިއްޔެ ހެނދުނު ޗަންޕާ ސެންޓްރަލް ހޮޓެލްގައި އެކަމަށް ހާއްސަކޮއްގެން ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން ދުންޔާ ވިދާޅުވީ ވަޒީފާގެ މައިދާނަށް ނުކުތުމުގައި ރަސްމީ ހުރަސްތަކެއް ނެތް ކަމަށާއި ނަމަވެސް އިސް މަގާމުތަކަށް ކުރިމަތިލުމަށް އަންހެނުންނަށް އިޖްތިމާއީ އަދި ސަގާފީ ހުރަސްތަކެއް އެބަހުރި ކަމަށެވެ.
ވިމެންސް އޮން ބޯޑްސް އިން ބޭއްވި ރަސްމިއްޔާތުގައި ދުންޔާ ވާހަކަފުޅު ދައްކަވަނީ --- ފޮޓޯ/ ވޮމެންސް އޮން ބޯޑް
"އިގްތިސާދީ ގޮތުން ބާރުވެރި ކުރުވުމުމަށް ކަނބަލުން އިސް މަގާމުތަކުގައި ހަރަކާތްތެރިވުން ވަރަށް މުހިންމު،" ދުންޔާ ވިދާޅުވި އެވެ.
ރަސްމިއްޔާތުގައި ވާހަކަފުޅު ދައްކަވަމުން ވިމެން އޮން ބޯޑުގެ ނާއިބު ރައީސް ޑރ. އައިޝަތު މުނީޒާ ވިދާޅުވީ އެ ޖަމިއްޔާގެ އެންމެ ބޮޑުބޭނުމަކީ އަންހެނުން ބާރުވެރި ކުރުވުން ކަމުގައެވެ.
ވިމެންސް އޮން ބޯޑަކީ އިގްތިސާދީ ގޮތުން އަންހެނުން މާރުވެރިކުރުވުމުގެ ގޮތުން އުފައްދާފައިވާ ޖަމިއްޔާއެކެވެ.
އެ ރަސްމިއްޔާތުގައި ސިވިލް ސާވިސް ކޮމިޝަންގެ ރައީސް ޑރ.އަލީ ޝަމީމާއި، ރަޖިސްޓްރާ އޮފް ކޮންޕެނީސް މަރިޔަމް ވިޝާމް ބައިވެރިވެވަޑައިގެންފައިވެ އެވެ.