19 Apr 2017, 17:17
ބަންގީގެ އަޑަށް، ސުޕަސްޓަރ ސަލްމާން ޚާން، އޭނާގެ އިވެންޓެއް ހުއްޓުވި މަންޒަރު ފެންނަ ވީޑިއޯ އެއް ސޯޝަލް މީޑިގައި މިވަނީ ދައުރުވާން ފަށައިފި އެވެ.
ދެހާސް ސާދަ ވަނަ އަހަރުގެ އެ ވީޑިއޯ މިހާރު ދައުރުވަމުން އަންނަނީ ބަންގި އާ ގުޅޭގޮތުން ބޮލީވުޑުގެ ލަވަކިޔުންތެރިޔަކު ދެއްކި ވާހަކަތަކެއްގެ ސަބަބުންނެވެ. އެއީ ސަލްމާން ހުށަހަޅާ ދޭ ރިއަލިޓީ ޝޯވ 'ބިގް ބޯސް' ގެ އަށް ވަނަ ސީޒަން ލޯންޗު ކުރުމަށް ބޭއްވި ހަފްލާގެ ތެރެއިން ނަގާފައިވާ ވީޑިއޯ އެކެވެ.
އެ ވީޑިއޯއިން ފެންނަ ގޮތުން، ބަންގީގެ އަޑު އިވެނީ ހަފްލާގައި އެހެން މީހަކު ވާހަކަ ދައްކަން ހުއްޓައެވެ. އޭރު އޭނާގެ ގާތުގައި ސަލްމާން ހުރެއެވެ. އަދި ބަންގީގެ އަޑު އިވުމުން ވެސް އެ މީހާ ވާހަކަ ދެއްކުން ހުއްޓާނުލުމުން ސަލްމާން ވަނީ އޭނާއަށް ވާހަކަ މެދުކަނޑާލުމަށް އިޝާރާތް ކޮށްފައެވެ. އެއަށްފަހު ދެވަނަ ފަހަރަށް ވެސް އޭނާ ވާހަކަ ދައްކަން ފަށައެވެ.
ނަމަވެސް ސަލްމާން ބަލަހައްޓައިގެން ހުރި ގޮތުން އޭނާ ވަނީ ވާހަކަ މެދުކަނޑާލައިފައެވެ. ސަލްމާން ވަނީ ބަންގި ނިމެންދެން ޕްރެސް ހުއްޓުވައިފައެވެ. އިތުރަށް ޕްރެސް ކޮންފަރެންސް ކުރިއަށް ދިޔައީ ބަންގީގެ ފަހުންނެވެ.
ބަންގި ނިމުމުން ސަލްމާން ވަނީ ވާހަކަ ކުރިއަށް ގެންދިއުމަށް ބުނެފައެވެ. އެކަމުގެ ސަބަބުން ގިނަ ބަޔަކު ވަނީ ސަލްމާންއަށް ވަރަށް ބޮޑަށް ތައުރީފު ކޮށްފައެވެ. އަދި ސަލްމާނަށް ކުރާ އިހުތިރާމު އެތައް ގުނައެއް އުފުލިފައިވާ ކަމަށް ވެސް މީހުން އަންނަނީ ބުނަމުންނެވެ.
މީގެ އަހަރެއްހާ ދުވަސް ކުރީން އިންޑިއާގެ ބޮޑު ވަޒީރު ނަރެންދުރަ މޯދީވެސް ވަނީ، އެމަނިކުފާނު ސިޔާސީ ރެލީއެއްގައި ވާހަކަފުޅު ދައްކަވަމުން ގެންދަވަނިކޮށް މިސްކިތަކުން ބަންގި ގޮވާ އަޑު އިވިވަޑައިގެންނެވުމާ އެކު ވާހަކަފުޅު މެދުކަނޑުއްވާލައްވައިފައެވެ.
ބަންގީގެ އަޑު އިވިވަޑައިގެންނެވުމާ އެކު ވާހަކަފުޅު ދެއްކެވުން މޯދީ މެދުކަނޑާލެއްވީ އިންޑިއާގެ ވެސްޓް ބެންގާލުގައި ކުރިއަށް ގެންދިޔަ ސިޔާސީ ކެމްޕެއިން ރެލީއެއްގައެވެ. ތަގުރީރުގެ މެދުތެރެއިން ބަންގީގެ އަޑަށް ވާހަކަފުޅު ހުއްޓަވާލެއްވުމަށް ފަހު، އަތުގެ އިޝާރާތުން މޯދީ ވަނީ އަޑު މަޑު ކުރެއްވުމަށް ވިދާޅުވެފައެވެ.
ބަންގި ގޮވައި ނިންމުމުން، މޯދީގެ ތަގުރީރުގައި ވިދާޅުވީ އެއްވެސް މީހެއްގެ އަޅުކަމަކަށް އޭނާގެ ސަބަބުން ހުރަސް އެޅެން ބޭނުންފުޅު ނުވާ ކަމަށެވެ.