17 Apr 2017, 11:32
މ. އަތޮޅު މުލީގައި ދިވެހި ފިރިހެނަކު ދަންޖެހިގެން މަރުވެފައި ހުއްޓައި ފެނިއްޖެ އެވެ.
ފުލުހުންގެ މީޑިއާ އޮފިޝަލް މިއަދު ސަން އަށް ވިދާޅުވީ، މުލީގައި ދަންޖެހިގެން މަރުވެފައި ހުއްޓައި ފެނިފައި ވަނީ ލ. މާމެންދޫ އަށް ނިސްބަތްވާ 35 އަހަރުގެ ފިރިހެނެއް ކަމަށާއި އޭނާ މަރުވެފައި ހުރި ކަމަށް ފުލުހުންނަށް ރިޕޯޓުކޮށްފައި ވަނީ ރޭ 11 ޖަހާއެހާކަންހާއިރު ކަމަށެވެ.
ފުލުހުން ބުނި ގޮތުގައި އޭނާ ހޮސްޕިޓަލަށް ގެންދިޔަ އިރު ވެސް ވަނީ މަރުވެފަ އެވެ.
އޭނާ ދަންޖެހުނު ސަބަބެއް ނޭނގޭ ކަމަށާއި، މައްސަލަ އިތުރަށް ތަހުގީގު ކުރަމުން ދާ ކަމަށް ފުލުހުން ބުންޏެވެ.
އަމިއްލަ އަށް މަރުވުމުގެ މައްސަލަތައް އިންތިހާ އަށް އިތުރުވަމުން އަންނަ އިރު މިއީ އަހަރެމެންގެ މާތްވެގެންވާ އިސްލާމްދީނުގައި ވަރަށް ބޮޑު ހަރާމް ކަމެކެވެ. އައްޝެއިޚް އަހުމަދު ފަހުމީ ދީދީ ވިދާޅުވި ގޮތުގައި އަމިއްލަ އަށް މަރުވުން ނުވަތަ މަރުވާ ފަދަ ކަމެއް ކުރުން ނުވަތަ އަމިއްލަ ހަށިގަނޑަށް ގެއްލުންދިނުމަކީ އިސްލާމް ދީނުގައި ހަރާމް ކުރައްވާފައިވާ ބޮޑު ފާފައެކެވެ.
ގާނޫނުލްއުގޫބާތުގައި ބުނެފައިވާ ގޮތުން އަމިއްލައަށް މަރުވާން އުޅުމަކީ ވެސް ކުށެކެވެ. އަދި އަމިލަޔަށް މަރުވާން އުޅުނުކަން ސާބިތުވެއްޖެ ނަމަ ދެވޭ އެންމެ ބޮޑު އަދަބެއްގެ ގޮތުން ގާނޫނުލް އުގޫބާތުގައި ކަނޑައަޅާފައި ވަނީ އެއް އަހަރު ދުވަހުގެ ޖަލު ހުކުމެކެވެ.