10 Apr 2017, 09:24
ބޮލީވުޑުގައި މިވަގުތު ފިޔަޖަހަމުން އަންނަ ހުނަރުވެރި ބަތަލާ އާލިއާ ބަޓް އަށް އޭނާގެ ބައްޕަ، އަދި ކާމިޔާބު ޑައިރެކްޓަރު/ޕްރޮޑިއުސަރު މަހޭޝް ބަޓް ވަރަށް ބޮޑަށް ތައުރީފުކޮށް ވާހަކަ ދައްކައިފި އެވެ.
މަހޭޝް ޕްރޮޑިއުސް ކޮށްފައިވާ ފިލްމު 'ބޭގަމް ޖާން' އާ ގުޅޭގޮތުން ޓައިމްސް އޮފް އިންޑިއާ ނޫހަށް ދިން އިންޓަވިއު އެއްގައި މަހޭޝް ބުނެފައި ވަނީ އޭނާ އަށް ސިނަމާ ގައި ގިނަ 'މާސްޓަޕީސް' ތަކެއް އުފެއްދިފައިވާ ކަމަށެވެ. ނަމަވެސް އޭނާގެ ދަރިފުޅަކީ އޭނާގެ ހަގީގީ ދިރިއުޅުމުގެ މާސްޓަޕީސް ކަމަށާއި، މަހޭޝްގެ ފިލްމު ތަކާއި އާލިއާ އަޅާވެސް ނުކިޔޭނެ ކަމަށެވެ.
"އަހަރެން މި ހުންނަނީ އަޖައިބުވެ އަންތަރީސްވެފަ އާލިއާ ކުރާ ބުރަ މަސައްކަތާއި، އޭނާގެ މަސައްކަތުން ހާސިލް ކޮށްފައިވާ ކާމިޔާބީތަކުގެ ސަބަބުން. އަހަރެންގެ ސިނެމެޓިކް މާސްޓަޕީސް ތަކުގެ ވާހަކަ ދައްކާ އިރު (ނޫސްވެރިން)، އާލިއާ އަކީ އަހަރެންގެ އަސްލު ދިރިއުޅުމުގެ މާސްޓަޕީސް. އަހަރެންގެ ސިނަމާއަށް އާލިއާ އާއި ކައިރި ވެސް ނުވެވޭނެ،" މަހޭޝް ބަޓް ބުނެފައިވެ އެވެ.
އިންޓަވިއުގައި ނޫސްވެރިޔާ ވަނީ އާލިއާގެ ފިލްމެއް ޑައިރެކްޓު ކުރަން ނުވަތަ ޕްރޮޑިއުސް ކުރުމަށް މަހޭޝްގެ ވިސްނުން ހުރިތޯ ސުވާލު ކޮށްފައެވެ. މަހޭޝް ބުނީ އޭނާ ކުރިއަށް އޮތް ތަނުގައި އެއްވެސް ފިލްމެއް ޑައިރެކްޓު ނުކުރާނެ ކަމަށެވެ. އަދި އާލިއާގެ ފިލްމެއް ނަމަވެސް، އޭނާގެ ނިންމުން ބަދަލު ނުކުރާނެ ކަމަށް މަހޭޝް ބުންޏެވެ.
މަހޭޝް ބުނީ ކާމިޔާބީއާ ދޭތެރޭ އުފާކުރުމަށް އާލިއާއަށް ނަސޭހަތްތެރިވާ ކަމަށާއި، ނަމަވެސް ކާމިޔާބީގެ ސަބަބުން އަމިއްލަ މީހާ އާމެދު މާބޮޑަށް ފަޚުރުވެރި ނުވުމަށް ވެސް ނަސޭހަތްތެރިވާ ކަމަށެވެ.
ދެހާސް ބާރަ ވަނަ އަހަރު 'ސްޓުޑެންޓް އޮފް ދަ އިޔަރ' އިން ބޮލީވުޑަށް ތައާރަފުވި އާލިއާ ވަނީ މިހާތަނަށް ގިނަ ހިޓް ފިލްމުތަކަކުން ބެލުންތެރިންނަށް ފެނިގެން ގޮސްފައެވެ. އަދި ކޮންމެ ފިލްމެއްގައި ވެސް އާލިއާ އަދާކޮށްފައިވާ ތަފާތު ރޯލާއި ދައްކާ މޮޅު އެކްޓިން އަށް ބޮޑު ތަރުހީބެއް ލިބެ އެވެ.
އުމުރުން 24 އަހަރުގެ އާލިއާ ވަނީ މިދިޔަ އަހަރު ނުކުތް ފިލްމު 'އުޅްތާ ޕަންޖާބް' އިން ފިލްމުފެއާ އެންމެ މޮޅު ބަތަލާގެ އެވޯޑު ވެސް ހާސިލްކޮށްފައެވެ.