09 Apr 2017, 12:32
ސިއްހީ ދާއިރާއިން އިލްމު އުނގެނުމާއި ފެތުރުމުގެ ރާއްޖޭގެ އެންމެ ބޮޑު ޕްރައިވެޓް ހޮސްޕިޓަލް، އޭޑީކޭގެ ސްކޫލް އޮފް ހެލްތު ސައިންސާއި ރާއްޖޭގެ ގައުމީ ޔުނިވާސިޓީ (އެމްއެންޔޫ)އާ ދެމެދު އެއްބަސްވުމެއްގައި ސޮއިކޮށްފި އެވެ.
ގައުމީ ޔުނިވާސިޓީގައި މިއަދު ބޭއްވި ރަސްމިއްޔާތުގައި އެމްއެންޔޫގެ ފަރާތުން އެއްބަސްވުމުގައި ސޮއިކުރެއްވީ އެ ޔުނިވާސިޓީގެ ވައިސް ޗާންސެލަރު ޑރ. ފަވާޒު ޝަރީފެވެ. އަދި އޭޑީކޭގެ ފަރާތުން ސޮއިކުރެއްވީ އެ ހޮސްޕިޓަލްގެ މެނޭޖިން ޑިރެކްޓަރު އަހުމަދު އައްފާލެވެ.
އޭޑީކޭ ހޮސްޕިޓަލަކީ ސިއްހީ ދާއިރާގެ ވަރަށް ބޮޑެތި އިސްނެގުންތަކެއް ނަގާ ހޮސްޕިޓަލެއްކަން ފާހަގަކުރައްވާ ރަސްމިއްޔާތުގައި ވާހަކަފުޅުދައްކަވަމުން ވައިސް ޗާންސެލަރު ފަވާޒު ވިދާޅުވީ، މިއަދުު ސޮއިކުރި އެއްބަސްވުމުގެ ދަށުން ރާއްޖޭގައި ހުރި ސިއްހީ މައްސަލަތަކާއި ކަންތައްތަކަށް ދެ ފަރާތް ގުޅިގެން ދިރާސާތައް ހެދިގެންދާނެ ކަމަށެވެ.
ދިރާސާކުރުމުގެ ދާއިރާގެ އިތުރުން ކިޔަވައިދިނުމުގެ ދާއިރާއިން ވެސް މިއަދު ސޮއިކުރި އެއްބަސްވުމުގެ ދަށުން މަސައްކަތްތަކެއް ކުރެވިގެންދާނެ ކަމަށް ވެސް ފަވާޒު ވިދާޅުވި އެވެ.
އޭޑީކޭ ހޮސްޕިޓަލާއި އެމްއެންޔޫއާ ދެމެދު މިއަދު ސޮއިކުރި އެއްބަސްވުމަކީ ތިން އަހަރު ދުވަހުގެ އެއްބަސްވުމެކެވެ. އެ އެއްބަސްވުމުގެ ދަށުން ދެ ފަރާތް ގުޅިގެން ބާއްވާ ފުރަތަމަ ހަރަކާތް އޮންނާނީ އަންނަ ހުކުރު އަދި ހޮނިހިރު ދުވަހު އެވެ.
ހަރަކާތުގެ މައުލޫމާތު ދެއްވަމުން އޭޑީކޭގެ އެމްޑީ އައްފާލު ވިދާޅުވީ، އެ ހަރަކާތަކީ ރާއްޖެއާއި ރާއްޖޭން ބޭރުގެ ޑޮކްޓަރުން ބައިވެރިވެގެން ބާއްވާ ސްޕައިން ކޮންފަރެންސެއް ކަމަށެވެ. އެ ކޮންފަރެންސަކީ ރާއްޖޭގައި ބާއްވާ އެފަދަ ފުރަތަމަ ކޮންފަރެންސް ކަމަށް ވެސް އައްފާލް ވިދާޅުވި އެވެ.
އަދި އެ ކޮންފަރެންސްގައި އޭޑީކޭ ހޮސްޕިޓަލުގައި ހަދާ ސްޕައިން ސާޖަރީއެއް ވަގުތުން ލައިވް ކުރެވޭނެ ކަމަށް ވެސް އޭނާ ވިދާޅުވި އެވެ.