07 Apr 2017, 20:34
ރަންބީރު ކަޕޫރު އަދި ކެޓްރީނާ ކައިފްގެ ލޯބީގެ ގުޅުން ނިމުމަކަށް އައުމުގެ ސަބަބުން އެކަމުގެ އެންމެ ބޮޑު އަސަރެއް ހަމަ ގައިމުވެސް ކުރަމުން ދަނީ ދެ މީހުން އެކުގައި ފެނިގެންދާ އަނޫރާގް ކަޝްޔަޕްގެ ފިލްމު، 'ޖައްގާ ޖާސޫސް' އަށެވެ.
ދެ މީހުން ވަކިވެ، ކެޓްރީނާ ވަނީ ރަންބީރު އާއެކު ޝޫޓު ނުކުރުމަށް އުޒުރު ދައްކައިފަ އެވެ. އެކަމުގެ ސަބަބުން ފިލްމުގެ ޝޫޓިން ނުނިމި، ފިލްމު ރިލީޒް ކުރަން ކަނޑައެޅި ތިން ތާރީޚުގައި ވެސް ފިލްމު ރިލީޒް ކުރެވިފައެއް ނުވެ އެވެ.
އަދި މިހާރު ފިލްމު ރިލީޒް ކުރާނެ ވަކި ދުވަހެއް ހާމަކޮށްފައެއް ވެސް ނުވެ އެވެ.
ފިލްމު ރިލީޒް ކުރަން ތަފާތު ގޮންޖެހުންތައް ދިމާވަމުން ގޮސް މިހާރު މި ވަނީ ކެޓްރީނާ އާއި ޑައިރެކްޓަރު އަނޫރާގު ކަޝްޔަޕްއާ ދެމީހުން މައްސަލަ ޖެހިފަ އެވެ. ރަންބީރު އާއެކު ފިލްމު ޕްރޮމޯޓް ނުކުރަން ނިންމައިގެން ހުރި ކެޓްރީނާ އާއި ޑައިރެކްޓަރާ ދެމެދު މިފަހަރު މައްސަލަ ޖެހުނީ ފިލްމުގެ ޕޯސްޓަރަކާ ގުޅިގެންނެވެ.
ޚަބަރުތައް ބުނާ ގޮތުން ކެޓްރީނާ ހިތްހަމަ ނުޖެހުނީ އެއީ ރަންބީރު އާ ދެމީހުންގެ ގައިގޯޅި ޕޯސްޓަރަކަށް ވީމަ އެވެ. އަދި ކެޓްރީނާ ވަނީ އެ ޕޯސްޓަރު ރިލީޒް ކުރުމަށް ދެކޮޅު ހަދައިފަ އެވެ.
އޭގެ އިތުރުން ފިލްމުގެ އެއްވެސް ޕޯސްޓަރެއް ރިލީޒް ކުރުމުގެ ކުރިން އޭނާ އަށް ދައްކަން ޖެހޭނެ ކަމަށް ބުނެފައިވާ ކަމަށް ވެސް ޚަބަރުތައް ބުނެ އެވެ.
ޚަބަރުތައް ބުނާގޮތުން ކެޓްރީނާ މިހާރު އުޅޭގޮތުން އަނޫރާގް ކަޝްޔަޕް ހުރީ ވަރަށް ބޮޑަށް ހިތްހަމަ ނުޖެހިފަ އެވެ.