03 Apr 2017, 18:20
ބަނގުލަދޭޝްގައި މަރުވެފައި އޮއްވައި ފެނުން ރައުދާ އާތިފްގެ މަރުގެ ހަގީގަތް ދެނެގަތުމަށް ދިވެހި ސަރުކާރުން ކުރެވެން އޮތްހާ މަސައްކަތެއް ކުރާނެ ކަމަށް ހޯމް މިނިސްޓަރު އަޒްލީން އަހުމަދު ވިދާޅުވެއްޖެއެވެ.
އަޒްލީން މިއަދު ސަން އަށް ވިދާޅުވީ، ރައުދާ މަރުވުމަކީ ދިވެހި ސަރުކާރުން އިންތިހާއަށް ހިތާމަކުރާ އަދި ކަންބޮޑުވާ ކަމެއްކަމަށާއި ސަރުކާރުން އެ އާއިލާއަށް ފުރިހަމަ އެއްބާރުލުން ދޭނެ ކަމަށެވެ.
ރައުދާގެ މަރުގެ ތަހުގީގަށް ފުލުހުންގެ ޚާއްސަޓީމެއް މިއަދު ބަންގުލަދޭޝަށް ގޮސްފައިވާއިރު އެމަރުގެ ހަގީގަތް ދެނެގަތުމަށް އެތައް ގޮތަކުން މަސައްކަތް ކުރައްވާނެ ކަމަށް މިނިސްޓަރު ވިދާޅުވުއެވެ.
"މިހާރު މިވާހަކަ ދެކެވެނީ އެކި ގޮތްގޮތަށް. ރައުދާ މަރާލީތޯ، ގުދުރަތީ މަރެއްތޯ ނޫނީ އަމިއްލައަށް މަރުވީތޯ މިކަންކަން ބަލާނަން. ރައުދާގެ މަރަކީ ސަރުކާރުން އިންތިހާއަށް ކަންބޮޑުވާ ކަމެއް،" މިނިސްޓަރު އަޒްލީން ވިދާޅުވިއެވެ.
ހޯމް މިނިސްޓަރު މިހެން ވިދާޅުވެފައި ވާއިރު، ފުލުހުން މިއަދު ނެރުނު ބަޔާނެއްގައި ބުނީ، ރައުދާގެ މަރުގެ މައްސަލައިގެ މައުލޫމާތު ހޯދުމަށާއި، ރައުދާގެ އާއިލާއަށް އެހީތެރިވެދިނުމަށް ބަންގްލަދޭޝަށް ފުލުހުންގެ އިސް ދެ އޮފިސަރަކު މިއަދު ދިއުމަށް ފުރާފައިވާ ކަމަށެވެ.
އެނގިފައިވާ ގޮތުގައި، ބަންގްލަދޭޝަށް ގޮސްފައިވަނީ މޯލްޑިވްސް ޕޮލިސް ސާވިސްގެ ޗީފް ސުޕްރިންޓެންޑެންޓަކާއި، އިންސްޕެކްޓަރެކެވެ.
މިއަދު ފޮރިން މިނިސްޓްރީން ނެރުނު ބަޔާނެއްގައިވެސް ބުނެފައިވާ ގޮތުން، މިނިސްޓްރީގެ އިތުރުން ދާކާގައި ހުންނަ ދިވެހި އެމްބަސީން ދަނީ ރައުދާގެ އާއިލާއިން އެދުނު ހުރިހާ އެހީތެރިކަމެއް ފުރިހަމައަށް ފޯރުކޮށްދީ، އެއްބާރުލުން ދެމުންނެވެ.