03 Apr 2017, 11:26
ލ. ފޮނަދޫގައި ތޫނުއެއްޗަކުން ހަމަލާދީ ބިދޭސީއަކު މަރާލި ކަމުގެ ތުހުމަތުގައި އިތުރު މީހަކު ހައްޔަރުކޮށްފިއެވެ.
ފުލުހުންގެ މީޑިއާ އޮފިޝަލް 'ސަން' އަށް ވިދާޅުވީ މިދިޔަ މަހުގެ 31 ވަނަ ދުވަހު އެ މައްސަލައާ ގުޅިގެން ހައްޔަރުކުރި ހަތަރު ވަނަ މީހާ އަކީ އުމުރުން 24 އަހަރުގެ ބިދޭސީއެއް ކަމަށެވެ.
އެ އެންމެންގެ ބަންދަށް ކޯޓުން 15 ދުވަސް އިތުރުކޮށްފައިވާ ކަމަށް އޮފިޝަލް ވިދާޅުވިއެވެ.
އެ މައްސަލައާ ގުޅިގެން ދެން ހައްޔަރުކޮށްފައި ވަނީ 35 އަހަރުގެ ދެ ބިދޭސީންނާއި 27 އަހަރުގެ ބިދޭސީއެއް ކަމަށް ފުލުހުން ބުންޏެވެ.
ފުލުހުންގެ މީޑިއާ އޮފިޝަލް ވިދާޅުވީ، އެ ބިދޭސީ މީހާ މަރުވެފައި އޮއްވައި ފެނުނީ މިދިޔަ މަހުގެ 30 ވަނަ ދުވަހުގެ މެންދުރު 12:45 އެހައިކަންހާއިރު ފޮނަދޫ ގޮނޑުދޮށުން ކަމަށެވެ.
ސަންއަށް އެނގިފައިވާ ގޮތުގައި، ބަންގުލަދޭޝަށް ނިސްބަތްވާ، އުމުރުން 27 އަހަރުގެ ހަސަން ނަމަކަށް ކިޔާ، އެމީހާ ފޮނަދޫގައި މަސައްކަތްކުރާން އުޅޭތާ ހަތަރުވަރަކަށް އަހަރު ވެދާނެއެވެ.
އެ ބިދޭސީ މީހާގެ މަރަކީ އާދައިގެ މަރެއްގެ ގޮތުގައި ނުބެލެވޭ ކަމަށް ފުލުހުން ވަނީ ބުނެފައެވެ.
ފުލުހުން ބުނީ، އެމައްސަލަ ތަހުގީގުކުރުމަށް ފުލުހުންގެ ސީރިއަސް އެންޑް އޮގަންއިޒްޑް ކްރައިމް ޑިޕާޓްމަންޓުގެ ބައެއް އޮފިސަރުން ފޮނަދޫއަށް ގޮސް އެރަށުގައި ތިބި ފުލުހުންނާ ގުޅިގެން ފުޅާދާއިރާއެއްގައި މިހާރު ތަހުގީގު ފަށާފައިވާ ކަމަށެވެ.