02 Apr 2017, 08:48
އިސްމާއިލް ޝަފީގާއި ކުޅަދާނަ ބަތަލާ ނިއުމާ މުހައްމަދު ޕްރޮޑިއުސްކޮށް ޔޫސުފް ޝަފީއު (ޔޫއްޕެ) ޑައިރެކްޓްކުރާ ކޮމެޑީ ފިލްމު "ނޯޓީ 40"ގެ މުހިއްމު ރޯލުތަކުން ފެނިގެންދާ ބައެއް ތަރިންގެ ބަރުދަން ލުއިކޮށް،ފިޓްނަސް ރަނގަޅުކޮށް، ޒުވާން ރޯލުތަކަށް ތައްޔާރުވުމުގެ މަސައްކަތް ފަށައިފި އެވެ.
ފިލްމުގެ ނުވަދިހަ ޕަސެންޓް ށ. މިލަންދޫގައި ޝޫޓްކޮށް ނިމިފައިވާއިރު އެ ފިލްމުގެ ބައެއް ތަރިންގެ ދެއުމުރެއްގެ މަންޒަރުތަކެއް ދައްކުވައިދޭނެ އެވެ. އެއީ އެތަރިންގެ ސާޅީސް އަހަރުން މަތީގެ އުމުރާއި ޒުވާން އުމުރުގެ މަންޒަރުތަކެވެ.
ފިލްމީ ތަރި މުހައްމަދު މަނިކު ޖިމްގައި -- ފޮޓޯ: ނޯޓީ 40
ފިލްމުގެ ބޮޑުބައި ޝޫޓް ކުރުމަށް ފަހު ފިލްމުގެ ކުރޫ އެއްކޮށް މާލެ އައިސް މިހާރު ދަނީ ފިލްމުގެ މާލޭގައި ޝޫޓް ކުރަން ހަމަޖެހިފައިވާ މަންޒަރުތަކަށް ތައްޔާރުވަމުންނެވެ.
އެގޮތުން ފިލްމުގެ މުހިއްމު ބައިތަކުން ފެނިގެންދާ ތަރިންކަމަށްވާ، ޔޫސުފް ޝަފީއު (ޔޫއްޕެ)، އަލީ ސީޒަން، މުހައްމަދު މަނިކު އަދި އަހުމަދު ސައީދު މިހާރު ވަނީ ފިޓްނަސް ރަނގަޅުކޮށް، ޒުވާން ކެރެކްޓާއަށް ތައްޔާރުވުމުގެ ގޮތުން ޚާއްސަ ޖިމް ކްލާސްތަކެއް ފަށައިފަ އެވެ. އަދި "ނޯޓީ 40" އިން ހާއްސަ ފެނިލުމަކުން ފެނިގެންދާ ފިލްމުގެ އެއް ޕްރޮޑިއުސަރު ކަމަށްވާ ނިއުމާ ވެސް ދަނީ ހަށިގަނޑަށް ބަދަލުތަކެއް ގެންނަމުންނެވެ.
ފިލްމީތަރި ޔޫއްޕެ ޖިމްގައި -- ފޮޓޯ: ނޯޓީ 40
"ސަން" އާ ވާހަކަ ދައްކަމުން ނިއުމާ ބުނީ، އެ ފަސް ތަރިން ކުރިޔަށް އޮތް ތިން މަހުގެ ތެރޭގައި ހަށިގަނޑަށް ބޮޑެތި ބަދަލުތަކެއް ގެންނާނެ ކަމަށާއި ފިލްމުގައި ދެން ނަގާ މަންޒަރުތަކުގައި އެ ތަރިންގެ ޒުވާން އުމުރު ދައްކުވައިދޭނެ ކަމަށެވެ.
"ވަރަށް ބުރަ މަސައްކަތްތަކެއް ކުރަމުން މި ފަސް މީހުން މިދަނީ. އަދި ހާއްސަކޮށް ފިރިހެން ތަރިން އެބަޖެހޭ ހަށިގަނޑު ވަރަށް ރީތިކޮށް ބަހައްޓަން. އަޅުގަނޑުވެސް ޑައިޓްކޮށް ހަށިގަނޑަށް ބަލައިގެން އުޅެނީ،" ނިއުމާ ބުންޏެވެ.
ސީޒަން ލަންކާގައި ޖިމް ކުލާހުގައި -- ފޮޓޯ: ނޯޓީ 40
އޭގެ އިތުރުން ނިއުމާ ބުނީ ރާއްޖޭގެ ޖިމް ކުލާހެއްގައި ތިން ތަރިޔަކު ބައިވެރިވަމުންދާ އިރު ސީޒަން ވެސް ދަނީ ރާއްޖެއިން ބޭރުގައި ޖިމް ކުލާހެއްގައި ހަރަކާތްތެރިވަމުން ކަމަށެވެ.
އެންވިޝަން އެންޓަޓެއިންމެންޓާއި ޔޫއްޕެ ފްރޮޑަކްޝަންގެ ފަރާތުން އުފައްދާ "ނޯޓީ 40" އާ ގުޅޭ ގޮތުން އިތުރަށް ވާހަކަ ދައްކަމުން ނިއުމާ ބުނީ ފަސް ތަރިއެއްގެ ދެ އުމުރެއް ދައްކުވައިދޭ އި ފިލްމަކީ ބެލުންތެރިންނަށް ކަމުދާނެ ފިލްމަކަށް ވާނެ ކަމުގެ ޔަގީންކަންދޭ ކަމަށެވެ. އަދި މި ހަފްތާގެ ތެރޭގައި ފިލްމުގެ ފަސްޓް ލުކް ބެލުންތެރިންނަށް ދައްކާލުމަށް މަަސައްކަތް ކުރަމުންދާ ކަމަށް ވެސް ނިއުމާ ބުންޏެވެ.
ފިލްމީ ތަރި ސައީދު ޖިމްގައި -- ފޮޓޯ: ނޯޓީ 40
"އިރާދަކުރެއްވިއްޔާ މި ހަފްތާ ތެރޭގައި މިބަލަނީ ފިލްމުގެ ފަސްޓް ލުކް ދައްކާލެވޭތޯ. ދެން ބުނެލަން އޮތީ މި ފިލްމު ބެލުންތެރިންނަށް ވަރަށް ކަމުދާނެއޭ. އަޅުގަނޑުމެންގެ ކުރޫގައި ހިމެނޭ ހުރިހާ ތަރިން ވެސް ވަރަށް އެއްބާރުލުންދޭ މި ފިލްމު މޮޅު ފިލްމަކަށް ހަދަން،" ނިއުމާ ބުންޏެވެ.
ފިލްމީ ތަރި ސައީދު ޖިމް ކުލާހުގައި -- ފޮޓޯ: ނޯޓީ 40
މުޅި ޖުމްލަ ހަ ލަވަ ހިމެނޭ އެ ފިލްމުން ބެލުންތެރިންނަށް ތަފާތު ގިނަ ސަޕްރައިޒްތަކެއް ފެނިގެންދާނެ ކަމަށް ވެސް ނިއުމާ ބުންޏެވެ.
ފިލްމީ ދާއިރާގެ ތަޖުރިބާކާރު ތަރިންނާއި މުޅިން އަލަށް ފިލްމީ ދާއިރާއަށް ތައާރަފްވާ ތަރިންނާ އެކު ބޮޑު ކާސްޓެއް ފެނިގެންދާނެ " ނޯޓީ 40"ގެ ހުރިހާ މަސައްކަތެއް ނިމި ސްކްރީނަށް އަންނާނީ އަންނަ އޯގަސްޓު މަހުގެ ދެވަނަ ދުވަހު އެވެ.