21 Mar 2017, 09:19
ނިޔުޔޯކް (މާޗް 21) : އެންމެ އުފާވެރިކަމާ އެކު ރައްޔިތުން ދިރިއުޅޭ ގައުމުގެ ލިސްޓުގެ އެންމެ ކުރިން އުތުރު ޔޫރަޕްގެ މުއްސަނދި ގައުމެއް ކަމަށްވާ ނޯވޭ ޖާގަ ހޯދައިފި އެވެ.
ދުނިޔޭގައި އެންމެ އުފާވެރިކަމާ އެކު ރައްޔިތުން ދިރިއުޅޭ ގައުމުތަކުގެ ލިސްޓަކީ އިންސާނުންގެ ދިރިއުޅުމާ ބެހޭ ތަފާތު އެތައް މައުލޫމާތުތަކެއް ހޯދައިގެން އދ. ން ކޮންމެއަހަރަކު ތައްޔާރުކުރާ "ވޯލްޑް ހެޕިނަސް ރިޕޯޓް" ގައިވާ ލިސްޓެކެވެ. މި އަހަރުގެ "ވޯލްޑް ހެޕިނަސް ރިޕޯޓް"ގައި ހިމެނޭ ލިސްޓުގެ އެއްވަނާގައި ވަނީ ނޯވޭ އެވެ. މިލިސްޓުގެ އެކަކުން ފެށިގެން 10 އަކާހަމައަށް ވެސް ޖާގަލިބިފައި ވަނީ ޔޫރަޕްގެ ގައުމުތަކަށާއި ކެނެޑާއާއި އޮސްޓްރޭލިޔާ އަދި ނިއުޒިލޭންޑް އަށެވެ.
ޔޫރަޕްގެ ގައުމުތަކުގެ ތެރެއިން އެންމެ ކުރީގައި އުޅެނީ އުތުރު ޔޫރަޕްގެ ސްކެންޑެނޭވިޔާގެ ގައުމުތަކެވެ. ހުޅަނގު ޔޫރަޕްގެ ގައުމުތަކެއްނޫނެވެ. މިލިސްޓުގައިވާ ގޮތުން ދެ ވަނައަށް އެންމެ އުފާވެރިކަމާއި ހިތްހަމަޖެހުމާ އެކު މީހުން ދިރިއުޅޭ ގައުމަކީ ޑެންމާކެވެ. ތިންވަނައަށް އައިސްލެންޑެވެ. ހަތަރުވަނަ އަށް ސްވިޓްޒަލެންޑެވެ. ފަސްވަނައަށް ފިންލެންޑެވެ. ހަވަނައަށް ހޮލެންޑެވެ. ހަތްވަނައަށް ކެނެޑާ އެވެ. އަށްވަނައަށް ނިއުޒިލޭންޑެވެ. ނުވަވަނައަށް އޮސްޓްރޭލިޔާ އެވެ. ދިހަވަނަ އަށް ސްވިޑްން އެވެ. އެމެރިކާ އަށް ލިބިފައި ވަނީ 14 ވަނަ އެވެ. އިނގިރޭސިވިލާތަށް 19 ވަނަ އެވެ.
އިސްލާމީ ގައުމުތަކަށް ބަލާއިރު އެންމެ އުފާވެރިކަމާއި ހިތްހަމަޖެހުމާ އެކު މީހުން ދިރިއުޅޭ ގައުމުތަކުގެ ގޮތުގައި ވަނީ ގަލްފުގެ މުއްސަނދި އަރަބި ގައުމުތަކެވެ. މިގޮތުން ޔުނައިޓެޑް އަރަބް އިމަރޭޓްސް (ޔޫއޭއީ) އަށް 21 ވަނަ ލިބިފައިވާ އިރު ގަތަރަށް 35 ވަނަ، ސައޫދީ އަށް 37 ވަނަ، ކުވައިތަށް 39 ވަނަ އަދި ބަހްރައިންއަށް 41 ވަނަ ލިބިފައިވެ އެވެ.
ގަލްފުގެ އަރަބި ގައުމުތަކަކީ ތެލުގެ މުއްސަނދިކަން އިންތިހާއަށް ލިބިފައިވުމުގެ ސަބަބުންނާއި އާބާދީ ކުޑަވުމުގެ ސަބަބުން ރައްޔިތުންގެ ގިނަބަޔަކު ވަރަށް ތަނަވަސްކަމާއި މުއްސަނދިކަމުގައި ދިރިއުޅެމުންގެންދާ ގައުމުތަކެކެވެ. އިސްލާމީ އެހެން ގައުމުތަކަށް ބަލާއިރު ތުރުކީއަށް ލިބިފައި ވަނީ 69 ވަނަ އެވެ. އިންޑޮނީޝިޔާ އަށް 81 ވަނަ އެވެ.
މިލިސްޓުގައިވާ އަޖައިބު ކުރުވަނިވި ކަމަކީ ތެލުގެ ގޮތުން މުއްސަނދި ގައުމެއް ނަމަވެސް މިހާރު ހަނގުރާމަ ހިނގަމުންދާ ގައުމެއްކަމަށްވާ ލީބިޔާއާށް 68 ވަނަ ލިބިފައިވާތީ އެވެ. އެހެންކަމުން އުފާވެރިކަމާއި ހިތްހަމަޖެހުމުގައި ލީބިޔާއަށް ވަނީ ތުރުކީއާއި އިންޑޮނީޝިޔާއަށް ވުރެ މަތީ ވަނައެއް ލިބިފަ އެވެ.
މިލިސްޓުގައި ހޮންގްކޮށްގް އަށް ލިބިފައި ވަނީ 71 ވަނަ އެވެ. ޕޯޓްގަލްއަށް 89 ވަނައެވެ. ގްރީސް އަށް 87 ވަނަ އެވެ. އިސްރާއީލު ވެރިވެގެންފައިވާ ފަލަސްތީނުގެ ސަރަހައްދުތަކަށް ލިބިފައި ވަނީ 108 ވަނަ އެވެ.
މިލިސްޓުގެ އެންމެ ފަހަތުގައިވާ ގައުމުތަކުގެ ތެރޭގައި ހިމެނެނީ އެފްރިކާގެ ގައުމުތައްކަމަށްވާ ސެންޓްރަލް އެފްރިކަން ރިޕަބްލިކް އާއި ބުރުންޑީ އާއި ޓެންޒެނިޔާއާއި ސޫރިޔާއާއި ރުވަންޑާއާއި ޓޯގޯ އާއި ލައިބީރިޔާއާއި ދެކުނު ސޫދާން އާއި ޔަމަންއެވެ. އެންމެ ފަހަތުން ޖާގަލިބިފައި ވަނީ ސެންޓްރަލް އެފްރިކަން ރިޕަބްލިކް އަށެވެ. އެއަށް ފަހު ބުރުންޑީއާއި ޓެންޒެނިޔާއާއި ސޫރިޔާއަށެވެ.
"ވޯލްޑް ހެޕިނަސް ރިޕޯޓް" ނެރުމަށް އދ. އިން ބޭނުންކުރާ މައުލޫމާތުތަކުގެ ތެރޭގައި ހިމެނެނީ މިނިވަންކަމާ އެކު ދިރިއުޅުމުގެ ފުރްސަތު ލިބިފައިވުމާއި ސިއްހީ ޚިދްމަތްތަކާއި މާލީ ތަނަވަސްކަމާއި ގެދޮރާއި އެނޫން ވެސް ދިރިއުޅުމުގެ އަސާސީ ބޭނުންތައް ފަސޭހައިންލިބުމުގެ ތަނަވަސްކަމާއި އިޖްތިމާއީ އަދާލަތު ފަދަ ކަންކަމެވެ.