19 Mar 2017, 11:52
މިހާރު ރާއްޖޭގައި ފެތުރެމުންދާ އެޗްވަންއެންވަން އިންފްލުއެންޒާއާ ގުޅިގެން ފަސްކޮށްފައިވާ، "މިނިވަން ޗެމްޕިއަންޝިޕް" ފުޓްބޯޅަ މުބާރާތް، މިހަފްތާގެ ބުރާސްފަތި ދުވަހު ފެށުމަށް ވިސްނަމުންދާ ކަމަށް އެފްއޭއެމްގެ ރައީސް ވިދާޅުވެއްޖެއެވެ.
އަތޮޅުތަކަށް ހާއްސަކޮށްގެން އެފްއޭއެމުން ކުރިއަށް ގެންދާ މިނިވަން ޗެމްޕިއަންޝިޕް ފުޓްބޯޅަ މުބާރާތާ ގުޅޭ ގޮތުން ސަން ސްޕޯޓްސް އާ ވާހަކަދައްކަމުން އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ، ސިއްހީ ދާއިރާތަކުގެ ލަފާގެ މަތިން ފަސްކުރެވިފައިވާ އަތޮޅު މުބާރާތް ބުރާސްފަތި ދުވަހު ފެށުމަށް އެކްސްކޯގައި މަޝްވަރާ ކުރެވިފައިވާ ކަމަށެވެ.
"އަޅުގަނޑުމެން ވިސްނަމުން މިދަނީ، އަންނަ ބުރާސްފަތީގައި މިނިވަން ޗެމްޕިއަންޝިޕް ފެށުމަށް. މިކަމާ ގުޅޭ ގޮތުން ސިއްހީ ދާއިރާތަކުގެ ލަފާވެސް ހޯދަމުން މިދަނީ،" ބައްސާމް ވިދާޅުވިއެވެ.
12 ނޮވެމްބަރ 2016: މިނިވަން ޗެމްޕިއަންޝިޕް ފުޓްބޯޅަ މުބާރާތުގެ ފައިނަލް މެޗުގެ ތެރެއިން: ގައުމީ ފުޓްބޯޅަ ދަނޑުގައި ތ. ތިމަރަފުއްޓާއި ބ. އޭދަފުށި ބައްދަލުކުރި އެ މެޗު 1-0 ގެ ނަތީޖާއަކުން ކާމިޔާބު ކޮށް އޭދަފުށި ވަނީ މުބާރާތުގެ ޗެމްޕިއަންކަން ހޯދާފައި ---ސަން ފޮޓޯ: އަފްރާހް
އަތޮޅުތަކުގެ ފުޓްބޯޅަ މުބާރާތް ފެށުމަށް ކުރީން ހަމަޖެހިފައި އޮތީ، މި މަހުގެ 15 ވަނަ ދުވަހު އެވެ. ނަމަވެސް، ނިމިދިޔަ ހަފްތާގައި ރާއްޖޭގެ އެކި ކަންކޮޅުތަކުގައި ހަލުވިކަމާއެކު އަރިދަފުހާއި ހުމުގެ ރޯގާއެއް ފެތުރެމުން ދިއުމާ ގުޅިގެން ރައްކާތެރި ކަމުގެ ފިޔަވަޅެއްގެ ގޮތުން އެފްއޭއެމުން ވަނީ، އެ އެސޯސިއޭޝަނުން ކުރިއަށް ގެންދާ މިސީޒަންގެ މާލޭ ލީގާއި، އިންޓާ ސްކޫލް ފުޓުބޯޅަ މުބާރާތް މެދުކަނޑާލައި، މިނިވަން ޗެމްޕިއަންޝިޕް މުބާރާތް ފަސްކޮށްފައެވެ.
ސަން ސްޕޯޓްސްއަށް އެނގިފައިވާ ގޮތުގައި، މިނިވަން ޗެމްޕިއަންޝިޕް ފުޓްބޯޅަ މުބާތް ބުރާސްފަތި ދުވަހު ފަށާނޭކަން، މިއަދު ނުވަތަ މާދަމާގެ ވަގުތެއްގައި އެފްއޭއެމުން ރަސްމީކޮށް އިއުލާނުކުރާނެއެވެ.
މިފަހަރުގެ މިނިވަން ޗެމްޕިއަންޝިޕް ފުޓްބޯޅަ މުބާރާތުގައި ޖުމުލަ 81 ރަށަކުން ވާދަކުރާނެއެވެ. އެ މުބާރާތް ފެށިގެންދާނީ އަތޮޅު ބުރުންނެވެ. އަތޮޅު ބުރުގެ ޗެމްޕިއަން އަދި ރަނަރަޕް ޓީމު ޒޯން ބުރަށް ދަތުރުކުރާނެ އެވެ. އަދި ޒޯން ބުރުގެ ޗެމްޕިއަން ޓީމުތައް ފައިނަލް ބުރަށް ދަތުރުކުރާނެ އެވެ.
އެންމެ ފަހުން ބޭއްވި މިނިވަން ޗެމްޕިއަންޝިޕް ކާމިޔާބު ކުރީ ބ. އޭދަފުށްޓެވެ. އެ ޓީމު އެ މުބާރާތް ކާމިޔާބު ކުރީ މިދިޔަ އަހަރުގެ ނޮވެމްބަރު މަހު، ގައުމީ ފުޓްބޯޅަ ދަނޑުގައި ކުޅުނު ފައިނަލް މެޗުގައި ތ. ތިމަރަފުށި 1-0 ލަނޑުން ބަލިކޮށްގެންނެވެ.