18 Mar 2017, 19:44
ރާއްޖެއިން ޓީބީ ނައްތާލުމަށްޓަކައި ކުރަންޖެހޭ މަސައްކަތްތަކާ ގުޅޭ ގޮތުން، ގްލޯބަލް ފަންޑާއި ސްޓޮޕް ޓީބީ ޕާޓްނާޝިޕްގެ ބޭފުޅުންނާ އެކު މަޝްވަރާ ކުރަން ފަށައިފިއެވެ.
ހެލްތް މިނިސްޓްރީން ނެރުނު ބަޔާނެއްގައި ބުނީ، އެ މިނިސްޓްރީގެ ދައުވަތަކަށް ސްޓޮޕް ޓީބީ ޕާޓްނާޝިޕްގެ އެގްޒެކެޓިވް ޑައިރެކްޓަރު ޑރ. ލުޗިކާ ޑިޓުއީ އާއި ގްލޯބަލް ފަންޑުގެ ފައިޓް އެއިޑްސް، ޓީބީ އެންޑް މެލޭރިއާގެ އެގްޒެކެޓިވް ޑައިރެކްޓަރު ޑރ. މާކް ޑައިބުލް މިހާރު މާލެއަށް ވަޑައިގެންފައިވާ ކަމަށެވެ. އަދި އެބޭފުޅުންނާ އެކު މިއަދާއި މާދަމާ މަޝްވަރާ ބައްދަލުވުންތަކެއް ކުރިއަށް ގެންދަން ހަމަޖައްސާފައިވާ ކަމަށްވެސް ބަޔާނުގައި ވެއެވެ.
އެ ބައްދަލުވުންތަކުގެ ތެރޭގައި ހެލްތް މިނިސްޓްރީން ތައްޔާރުކޮށްފައިވާ، ރާއްޖެއިން ޓީބީ ނައްތާލުމާ ގުޅޭ ގޮތުން ތައްޔާރުކޮށްފައިވާ ޓީބީ ޕްރޮގްރާމް ރިވިއު ކުރުމާއި ރާއްޖޭގައި މަސައްކަތް ކުރާ ބިދޭސީންގެ ތެރޭގައި ޓީބީ ފެތުރޭ މިންވަރު ދަނެގަތުމާ މެދުވެސް މަޝްވަރާ ކުރެވޭނެ އެވެ.
އޭގެ އިތުރުން، ރާއްޖޭގައި މަސައްކަތް ކުރާ މަދަނީ ޖަމިއްޔާތަކާއި ކަމާ ގުޅޭ އެހެން އިދާރާތަކާ އެކުވެސް އެ ބޭފުޅުން ބައްދަލު ކުރައްވައި މަޝްވަރާ ކުރަން ހަމަޖެހިފައިވާ ކަމަށްވެސް އެ މިނިސްޓްރީން ބުންޏެވެ.
ދާދި ފަހުން ރާއްޖެއިން މީސްލްސްއާއި ރުބެއްލާ ނައްތާލުމަށްޓަކައި އެމްއާރު ވެކްސިން ޖެހުމުގެ ގައުމީ ކެމްޕެއިނެއް ހެލްތް މިނިސްޓްރީން ފެށިއެވެ. ނަމަވެސް ރާއްޖޭގައި މިހާރު ފެތުރެމުންދާ އެޗްވަންއެންވަން ވައިރަސްއާ ގުޅިގެން އެ ކެމްޕެއިން ވަނީ މެދުކަނޑާލައިފައެވެ.