10 Mar 2017, 11:43
އަވަހާރަ ކޮށްލާފައިވާ ރާއްޖޭގެ މަޝްހޫރު ދީނީ އިލްމުވެރިޔާ ޑރ. އަފްރާޝީމުގެ ދީނީ ހިދުމަތްތައް އަދިވެސް ރާއްޖޭގައި ދެމި އެބަ އޮތް ކަމަށާއި ކުރިއަށް އޮތް ތަނުގައި ވެސް ދެމި އޮންނާނޭ ކަމަށް އިސްލާމިކް މިނިސްޓަރު ޑރ. އަހުމަދު ޒިޔާދު ބާގިރު ވިދާޅުވެއްޖެ އެވެ.
ޑރ. އަފްރާޝީމްގެ ހަނދާނުގައި އެމަނިކުފާނުގެ އުފަން ރަށް، ރ. އުނގޫފާރުގައި އަޅާ އިސްލާމީ މަރުކަޒުގެ ބިންގާ އެޅުމަށް އިއްޔެ އެ ރަށުގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރު ވިދާޅުވީ، މިއަދުވެސް ދީނީ އެކި ރޮނގުތަކުން ތައުލީމް ހާސިލް ކުރަމުންދާ ދަރިވަރުން ޑރ. އަފްރާޝީމްގެ ފޮތްތަކުން ފިލާވަޅު ލިބިގަންނަމުންދާ ކަމަށެވެ. އަދި ޑރ. އަފްރާޝީމްގެ ފޮތްތަކުން ރާއްޖޭގެ ކުތުބުހާނާތައް ފަޅު ފިލުވަމުންދާ ކަމަށް ވިދާޅުވިއެވެ.
"ޑރ. އަފްރާޝީމްގެ ދީނީ ހިދުމަތްތައް އަދިވެސް ދެމި އެބަ އޮތް. އިރާދަ ކުރެއްވިއްޔާ އަބަދުވެސް ދެމި އޮންނާނެ. މިއަދު ބިންގާ އެޅިގެން ދިޔަ މަރުކަޒާއެކު އެކަން ޔަގީންވެ ކަށަވަރު ވެގެން ހިނގައްޖެ،" އިސްލާމިކް މިނިސްޓަރު ވިދާޅުވިއެވެ.
ޑރ. އަފްރާޝީމް އަވަހާރަކޮށްލާފައި ވަނީ 2012 ވަނަ އަހަރުގެ އޮކްޓޯބަރު މަހުގެ ފުރަތަމަ ދުވަހުގެ ރޭ ޓީވީއެމްގެ ދީނީ ޕްރޮގްރާމެއްގައި ބައިވެރިވެވަޑައިގަތުމަށް ފަހު، އެމަނިކުފާނު ދިރިއުޅުއްވާ ހ. ފުންވިލުގެ އަށް ވަދެވަޑައިގަންނަވަނިކޮށް އެ ރޭ 11:30 އާއި 1:00އާ ދެމެދުގެ ވަގުތެއްގަ އެވެ.
އެމަނިކުފާނުގެ ހަނދާނުގައި އުނގޫފާރުގައި އަޅާ އިސްލާމީ މަރުކަޒަކީ މާލެއިން އުތުރުގައި އަޅާ ފުރަތަމަ އިސްލާމީ މަރުކަޒެވެ.
ރަސްމިއްޔާތުގައި ވާހަކަފުޅުދައްކަވަމުން މިނިސްޓަރު ޒިޔާދު ވިދާޅުވީ، އުނގޫފާރުގައި އަޅާ އިސްލާމީ މަރުކަޒަކީ ރައީސް ޔާމީނާއި ޑރ. އަފްރާޝީމްގެ ގާތް ގުޅުން ރަމްޒު ކޮށްދޭ ބިނާއެއް ކަމަށެވެ. އަދި އެ ބިނާ ވެގެންދާނީ ޑރ. އަފްރާޝީމްގެ އާއިލާއަށާއި އެ ރަށުގެ ރައްޔިތުންގެ އިތުރުން މުޅި އަތޮޅަށް ލިބިގެންދާނެ ޝަރަފެއް ކަމަށް ވިދާޅުވިއެވެ.
"މި ބިނާއަކީ މި ސަރުކާރުން އުމްރާނީ ތަރައްގީއާ އެއްވަރަށް ރައްޔިތުންގެ ރޫހާނީ ތަރައްގީއަށް ވެސް އިސްކަން ދޭ ކަމުގެ ވަރުގަދަ ދަލީލެއް. ރާއްޖޭގެ އުތުރަށް އިސްލާމީ ނޫރު ފަތުރާލަދޭނެ ނޫރަކަށް އިރާދަކުރެއްވިޔާ މި މަރުކަޒު ވެގެންދާނެ،" މިނިސްޓަރުގެ ވާހަކަފުޅުގައި ވިދާޅުވި އެވެ.