މެޗުގެ ކުޅުން ނިންމާލައިފި. މެޗު ނިމިގެންދިޔައީ 3-0 ލަނޑުން ނިއު ކުރީގައި އޮވެގެން.

ނިއުއިން އިތުރު ދެ ބަދަލެއް. ހަމްޕުގެ ބަދަލުގައި އަހްމަދު ސުހައިލް (ބަންޕުޗް). އަކޫގެ ބަދަލުގައި ނިޝާމް މުހައްމަދު ރަޝީދު.

'90- ނިއުއިން ބަދަލެއް. ގަލާޑޯގެ ބަދަލުގައި ކުޅެން ނުކުތީ އާދަމް އިޝާމް.

ގަލާޑޯ ދިން ބޯޅައަކުން ނިއުއަށް އެލަނޑު ކާމިޔާބުކޮށްދިނީ ސެންޓޭ. ޔޫވީގެ ޕެނަލްޓީ އޭރިޔާ ތެރޭ ހުސްކޮށް ހުރެ، ސެންޓޭ ވަނީ ވަރަށް ފަސޭހަކަމާއެކު ގޯލުގެ ތެރެއަށް ބޯޅަ ފޮނުވާލާފައި.

'88-ނިއުއިން ތިން ލަނޑުގެ ލީޑެއް ހޯދައިފި.

'85- ސެންޓޭ ދިން ބޯޅައަކުން ޔޫވީގެ ޕެނަލްޓީ އޭރިޔާ ބޭރުން ނިއުގެ އަކޫ ފޮނުވާލި ހަމަލާ ގޯލާ އަމާޒެއްނުވި.

'81- ސެންޓޭގެ އިތުރު ހަމަލާއެއް. ޔޫވީގެ ޕެނަލްޓީ އޭރިޔާ ތެރެއަށް ވަދެ، ސެންޓޭ އުފެއްދި ހަމަލާ ގޯލާ އަމާޒުވެފައެއް ނުވޭ.

'79- ސެންޓޭއަށް ހުސް ފުރުސަތެއް. ކުދުސް ކައިރިން ނައްޓާލުމަށްފަހު، ޔޫވީގެ ޕެނަލްޓީ އޭރިޔާ ތެރެއަށް ވަދެ، ސެންޓޭ ފޮނުވާލި ހަމަލާ ދިޔައީ ގޯލުގެ އަރިމަތީ ދަނޑިކައިރިން ބޭރަށް.

ސެންޓޭ ފޮނުވާލި ހިލޭ ޖެހުން ޔޫވީގެ ގޯލާ އަމާޒެއްނުވި.

'77- ޔޫވީގެ ހާފްގެ ތެރެއިން ސެންޓޭއަށް ޑޯޑޭ ކުރި ފައުލަކާ ގުޅިގެން ނުއިއަށް ހިލޭ ޖެހުމެއް.

'76- ޔޫވީގެ ފަހު ބަދަލު. މައިސާންގެ ބަދަލުގައި ކުޅެން ނުކުތީ އިބްރާހިމް ސަފްރާޒް.

'72- ނިއުގެ ޕެނަލްޓީ އޭރިޔާ ބޭރުން ބޯޅައިގައި ލިލީ ބޯޅައިގައި އަތްލުމުން ޔޫވީއަށް ލިބުނު ހިލޭ ޖެހުމުން ޒިވްކޮވިޗް ފޮނުވާލި ހަމަލާ، ނިއުގެ ޑިފެންޑަރުން ގައިގައި ޖެހި ބްލޮކްވެއްޖެ.

ސެންޓޭ ނަގައިދިން ކޯނަރަކުން ނިއުއަށް އެލަނޑު ކާމިޔާބުކޮށްދިނީ އެޓީމުގެ ބިދޭސީ ޑިފެންޑަރު މާކޮވިޗް ސްޓެވަން.

'70-ނިއުއިން އިތުރު ލަނޑެއްޖަހައި ލީޑު ފުޅާކޮށްފި.

ދެވަނަ ހާފުގެ ބާކީބައި ނިއުއިން ފުރިހަމަ ކުރަންޖެހޭނީ އެއް ކުޅުންތެރިޔަކު މަދުކޮށް.

'64-ނިއުގެ އޮގާވާއަށް ދެވަނަ ރީނދޫ ކާޑަކާއެކު ރަތް ކާޑެއް ދައްކައިފި.އޭނާއަށް ދެވަނަ ރީނދޫ ކާޑެއް ދެއްކީ ޔޫވީގެ ހާފްގެ ތެރެއިން ނޫރައްދީނަށް ކުރި ފައުލާ ގުޅިގެން.

'64- ޔޫވީގެ ޕެނަލްޓީ އޭރިޔާ ބޭރުން ގަލާޑޯ ފޮނުވާލި ހަމަލާ، ގޯލާ އަމާޒެއް ނުވި.

ނިއުގެ އަކޫ ދުރުން ފޮނުވާލި ހިލޭ ޖެހުން ކީޕަރު ރުސްލާން މަތަކޮށްފި.

'62- ޔޫވީގެ ހާފްގެ ތެރެއިން ސެންޓޭއަށް ކުރި ފައުލާ ގުޅިގެން އައްމަޑޭއަށް ރީނދޫ ކާޑެއް ދައްކައި، ނިއުއަށް ހިލޭ ޖެހުމެއް ދީފި.

'62- ނިއުގެ ޕެނަލްޓީ އޭރިޔާ ތެރެއަށް ވަދެ، ޔޫވީގެ ނާވީ ނުރައްކާ ކުރުމުގެ ކުރިން ލިލީ އެ ބޯޅަ ދިފާއުކޮށްފި.

ޔޫވީގެ ޒިވްކޮވިޗް ފޮނުވާލި ހިލޭ ޖެހުން ގޯލާ އަމާޒެއްނުވި.

'60- ނިއުގެ ހާފްގެ ތެރެއިން ޑޯޑޭއަށް ކުރި ފައުލާ ގުޅިގެން މާކޮވިޗްއަށް ރީނދޫ ކާޑެއް ދައްކައި، ޔޫވީއަށް ހިލޭ ޖެހުމެއް ދީފި.

ކޮކީ ބަދަލުކުރުމުން މިހާރު ޔޫވީގެ ކެޕްޓަން ބޭންޑް އަޅައިގެން ކުޅެމުންދަނީ ޝުއައިބް.

މެޗުގެ ދެވަނަ ހާފަށް ނުކުތްއިރު ވެސް ޔޫވީން ވަނީ ބަދަލެއް ގެނެސްފައި. ކެޕްޓަން ކޮކީގެ ބަދަލުގައި ދެވަނަ ހާފަށް ކުޅެން ނުކުތީ ނާވީ މުހައްމަދު.

ސެންޓޭ ދިން ބޯޅައަކުން ނިއުއަށް ލީޑު ހޯދައިދިނީ ގަލާޑޯ. ޔޫވީގެ ޕެނަލްޓީ އޭރިޔާ ތެރޭ ހުސްކޮށް ހުރެ، އޭނާ ވަނީ ފަސޭހަކަމާއެކު ގޯލަށް ބޯޅަ ފޮނުވާލާފައި.

'51-ނިއުއިން ލީޑު ހޯދައިފި.

'48- ޔޫވީން ބަދަލެއް. އަނިޔާވުމުގެ ސަބަބުން އަލީ ޝަރީފްގެ ބަދަލުގައި ކުޅެން ނުކުތީ ހަސަން ފައިރޫޒް.

'46- ނިއުއަށް ލަނޑުޖަހާނެ ރަނގަޅު ފުރުސަތެއް. ޔޫވީގެ ޕެނަލްޓީ އޭރިޔާ ތެރެއިން ގަލާޑޯ ފޮނުވާލި ހަމަލާ، ކީޕަރު ރުސްލާން ވަނީ މަތަކޮށްފަ.

މެޗުގެ ދެވަނަ ހާފުގެ ކުޅުން ފަށައިފި. ކިކްއޯފް ކުރީ ޔޫވީން.

މެޗުގެ ފުރަތަމަ ހާފުގެ ކުޅުން ނިންމާލައިފި. ފުރަތަމަ ހާފު ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރުވެގެން.

'+45- ނިއުގެ ގަލާޑޯގެ އިތުރު ހަމަލާއެއް. ޔޫވީގެ ޕެނަލްޓީ އޭރިޔާ ބޭރުން ގަލާޑޯ ފޮނުވާލި ބާރު ހަމަލާ، ކީޕަރު ރުސްލާން ވަނީ މަތަކޮށްފައި.

'+45- އަކޫ ދިން ރީތި ބޯޅައެއް ނިއުގެ ޕެނަލްޓީ އޭރިޔާ ތެރެއިން ސެންޓޭއަށް ނުލިބި، ގޯލްކިކްއަކަށް ބޭރުވެއްޖެ.

ފުރަތަމަ ހާފުގެ އިތުރު ވަގުތުގެ ގޮތުގައި ހަތަރު މިނެޓްގެ ކުޅުން ދައްކައިފި.

'44- ނިއުއަށް ރަނގަޅު ފުރުސަތެއް. ޔޫވީގެ ޕެނަލްޓީ އޭރިޔާ ބޭރުން ގަލާޑޯ ފޮނުވާލި ހަމަލާ، އަމާޒުވީ ކީޕަރު ރުސްލާންއާ ދިމާލަށް.

'41- ގަލާޑޯ ދިން ބޯޅައަކުން ޔޫވީގެ ޕެނަލްޓީ އޭރިޔާ ބޭރުން ސެންޓޭ ވައަތު ފައިން ފޮނުވާލި ހަމަލާ ގޯލާ އަމާޒެއް ނުވި.

'39- ގަލާޑޯ ދިން ބޯޅަ، އޮގާވާއަށް ލިބުމުގެ ކުރިން ޔޫވީގެ ޕެނަލްޓީ އޭރިޔާ ތެރެއިން ކީޕަރު ރުސްލާން ހޯދައިފި.

'32- ހޮކޭ ދިން ރީތި ބޯޅައަކުން ޔޫވީގެ ޕެނަލްޓީ އޭރިޔާ ތެރެއިން ސެންޓޭ ނުރައްކާ ކުރުމުގެ ކުރިން ކުދުސް އެބޯޅަ ހޯދައިފި.

ހޫނުގަދަވުމުގެ ސަބަބުން ވޯޓާ ބްރޭކްއަކަށް ކުޅުން މެދުކަނޑާލުމަށްފަހު އަލުން ކުޅުން ފަށައިފި.

'20- އަމިއްލަ ހާފްގައި ހުރެ، ނިއުގެ ނުހާދު ދިން ބޯޅައަކުން ޔޫވީގެ ޕެނަލްޓީ އޭރިޔާ ތެރެއިން ސެންޓޭ ފޮނުވާލި ހަމަލާ މައިސާން ބްލޮކްކޮށްފި. އެ ބޯޅަ ކީޕަރު ރުސްލާން ވަނީ އެއްވެސް އުނދަގުލެއް ނެތި ހޯދާފައި.

'19- ޔޫވީގެ ހާފްގެ ތެރެއިން ކޮކީއަށް ކުރި ފައުލާ ގުޅިގެން ނިއުގެ އޮގާވާއަށް ރީނދޫ ކާޑެއް ދައްކައިފި.

މެޗުގެ 15 މިނެޓްގެ ކުޅުން ނިމުނުއިރު، ބޯޅަ ހިފަހައްޓައިގެން ރަނގަޅަށް ނިއުއިން ކުޅުނު ނަމަވެސް އެޓީމަށް ނުރައްކާތެރި ހަމަލާއެއް ޔޫވީގެ ގޯލަށް ފޮނުވާލެވިފައެއް ނުވޭ. ޔޫވީއަށް ފުރަތަމަ 15 މިނެޓްގެ ތެރޭގައި އެންމެ ރަނގަޅު ފުރުސަތެއް ލިބުނީ ކޮކީއަށް. ނިއުގެ ޕެނަލްޓީ އޭރިޔާ ތެރެއިން ކޮކީ އުފެއްދި ހަމަލާގެ ހުރަހަކަށްވީ ކީޕަރު އިމްރާން.

'14- ޔޫވީއަށް ރަނގަޅު ފުރުސަތެއް. ނިއުގެ ޕެނަލްޓީ އޭރިޔާ ބޭރުން ކޮކީ ފޮނުވާލި ހަމަލާ ކީޕަރު އިމްރާން ވަނީ މަތަކޮށްފަ. ރީބައުންސް ބޯޅައިން ނިއުގެ ޕެނަލްޓީ އޭރިޔާ ތެރެއިން ކުދުސް ފޮނުވާލި ހަމަލާ، ލިލީ ގައިގައި ޖެހި ވަނީ ބްލޮކްވެފައި.

'13- ކޮކީ ދިން ބޯޅަ، ޒިވްކޮވިޗްއަށް ލިބުމުގެ ކުރިން ނިއުގެ ނުހާދު ދިފާއުކޮށްފި.

'2- ޔޫވީގެ ޕެނަލްޓީ އޭރިޔާ ތެރެއިން ސެންޓޭ އުފެއްދި ހަމަލާގައި ބާރެއް ނެތް. އެ ބޯޅަ ޔޫވީގެ ކީޕަރު ރުސްލާން ވަނީ ފަސޭހަކަމާއެކު ހޯދާފައި.

މެޗުގެ ކުޅުން ފަށައިފި. ކިކްއޯފް ކުރީ ނިއުއިން.

ޔޫވީގެ ފުރަތަމަ 11:

• އަމީރޯވް ރުސްލާން - ގޯލްކީޕަރު

• އިބްރާހިމް މައިސާން
• މުހައްމަދު ނަޒާމް
• ހުސައިން ސިމާޒް (ކޮކީ) - ކެޕްޓަން
• ޒިވްކޮވިޗް ތިހޯމިރް ހާވަޓްސްކޯ
• އަހްމަދު މުހައްމަދު (އައްމަޑޭ)
• ވުކޮބްރާތު ޑޯޑޭ
• ކުދުސް އޮމަލޭޑް ކެލާނީ
• އިބްރާހިމް ނޫރައްދީން
• އަލީ ޝަރީފް (އައްޔަ)
• ހުސައިން ޝުއައިބު

ނިއު ރޭޑިއަންޓްގެ ފުރަތަމަ 11:

• އިމްރާން މުހައްމަދު - ގޯލްކީޕަރު / ކެޕްޓަން

• މާކޮސް ސްޓެވަން
• އަހްމަދު އަބްދުﷲ (ލިލީ)
• ބޯސްޓްރާ ޖަމާލް ރޮމާނޯ
• އަލީ ފާސިރު (ސެންޓޭ)
• އޮގާވާ ކެއިސޫކޭ
• ގަލާޑޯ ވަލްޑޭސް އެޑްރިއަން
• ހަމްޒާ މުހައްމަދު (ހަމްޕު)
• އަކްރަމް އަބްދުލްޣަނީ (އަކޫ)
• އަހްމަދު ނުހާދު
• މުހައްމަދު ރަޝީދު (ހޮކޭ)