ރައީސްގެ ކުޅިވަރު ތަސައްވުރަކީ ސަރަހައްދީ ފެންވަރެއް ނޫން، ދުނިޔޭގެ ފެންވަރު

02 Mar 2017, 14:07

މިއަދަކީ ދިވެހި ފުޓްބޯޅަ އާއިލާއަށް ވަރަށް އުފާވެރި ދުވަހެކެވެ. ދިވެހި ފުޓްބޯޅަ އެހެން ހަރުފަތަކަށް ގެންދިއުމަށް އެފްއޭއެމް އާ ގުޅިގެން، ދިވެހި ސަރުކާރުން އިސްނަގައިގެން މިވަނީ މަސައްކަތްތަކެއް ފަށައިފައެވެ. އެގޮތުން ރައީސް ޔާމީންގެ ''ކުޅިވަރު ތަސައްވުރުގެ ތެރޭން" މިއަދު މިވަނީ ރާއްޖޭގެ ބޮޑެތި ފުޓްބޯޅަ ކްލަބުތަކަށް ސަރުކާރުގެ ކުންފުނިތައް މެދުވެރިކޮށް މާލީ އެހީ ލިބޭނޭގޮތް ހަމަޖައްސައިދީފައެވެ.

ކްލަބުތަކަށް މާލީ އެހީތެރިކަން ފޯރުކޮށްދޭ ކުންފުނިތައް ހަމަޖެއްސުމަށް މިއަދު ގަލޮޅު ދަނޑުގެ ވީއައިޕީގައި ބޭއްވި ގުރު ނެގުމުގެ ރަސްމިއްޔާތުގެ ތެރޭން -- ސަން ފޮޓޯ

އަދުގެ ސަރުކާރަކީ ޒުވާނުން ބާރުވެރިކުރުމުގެ ވައުދާއެކު އައި ސަރުކާރެކެވެ. އެގޮތުން ރާއްޖޭގައި ކުޅޭ ތަފާތު ކުޅިވަރުތައް ކުރިއަރުވައި ތަރައްގީ ކުރުމަކީ ރައީސް ޔާމީންގެ ރިޔާސީ ވައުދެކެވެ. ބައިނަލްއަގްވާމީ ފެންވަރުގައި ދިވެހީން ވާދަކުރާ ތަފާތު ކުޅިވަރު ތަކަކީ، ހަމައެކަނި ނަމަކަށް ވާދަކުރާ ކުޅިވަރުތަކެއްގެ ބަދަލުގައި ނަތީޖާ ނެރޭ ކުޅިވަރުތަކެއްގެ ގޮތުގައި ހެދުން އެއީ އަދުގެ ސިޔާސަތެވެ.

ކްލަބުތަކަށް މާލީ އެހީތެރިކަން ފޯރުކޮށްދޭ ކުންފުނިތައް ހަމަޖެއްސުމަށް މިއަދު ގަލޮޅު ދަނޑުގެ ވީއައިޕީގައި ބޭއްވި ގުރު ނެގުމުގެ ރަސްމިއްޔާތުގެ ތެރޭން -- ސަން ފޮޓޯ: އަޙްމަދު މުޖްތަބާ

"ރައީސް ޔާމީން ފާއިތުވެ ދިޔަ ދުވަސްތަކުގައި ތަފާތު އެތަކެއް ފަހަރުމަތީން، ކުންފުނިތަކުގެ ވެރީންނާ ބައްދަލުކުރައްވައި މިކަން ކުރެވޭނޭ ޕޮސިބިލިޓީސްތައް ހޯއްދަވައި ދެއްވުމަށް އެދި ވަޑައިގަންނަވަމުން ދިޔައީ، އޭރުވެސް އެމަނިކުފާނު އެދިވަޑައިގަންނަވަމުން ގެންދެވީ އެފްއޭއެމާ ގުޅިގެންނާއި އަދި މިކަމާ ރިލޭޓެޑް އެކިއެކި ވުޒާރާތަކާ ގުޅިގެންވެސް މިކަންތައް ކޮށްދެއްވާށޭ ވިދާޅުވަމުން ގެންދެވީ،" މިއަދު، ފުރަތަމަ ޑިވިޝަންގެ އަށް ކްލަބާ ހަވާލުވި އަށް ކުންފުނީގެ ފަރާތުން ވާހަކަ ދައްކަވަމުން މޯލްޑިވް ގޭސްގެ މެނެޖިންގ ޑިރެކްޓަރު އަބްދުﷲ މައުމޫން ވިދާޅުވިއެވެ.

"ފާއިތުވެދިޔަ 34 ވަރަކަށް އަހަރު އަޅުގަނޑުމެންނަށް އަބަދުވެސް ދެކެވެމުން އައީ، ކުޅިވަރު ކުރިއަރުވާ ވާހަކަ. ހާއްސަކޮށް ފުޓްބޯޅައިގެ ކަންތައްތަކުގަ މުޅިންވެސް އަޅުގަނޑުމެންނަށް ދެކެވިފަހުރި ވާހަކަ، ކުޅިވަރު ކުރިއަރުވާށޭ، ޓީމުތައް ކުރިއަރުވާށޭ މިކަންތައްތަކަށް. އެކަމަކު މާލީގޮތުން އެހީތެރިކަމެއް ފޯރުކޮށްދޭނޭ ހަމަ އެއްވެސް ދިމާލެއް ނުލިބޭ."

ވޭތުވެ ދިޔަ އަހަރު ތަކުގައި ރާއްޖޭގެ ފުރަތަމަ ޑިވިޝަންގެ ކްލަބުތައް ހިންގަމުން ދިޔައީ ވަރަށް ދަތި އުނދަގޫ ހާލެއްގައެވެ. ބައެއް ކްލަބުތަކުން ކުޅުންތެރީންނަށް މުސާރަ ނުދެވި، ޓީމުތައް އިނދަޖެހެމުން ދިޔައިރު، ބޮޑެތި ޚަރަދުކޮށްގެން ކުޅުންތެރީން ގެނެސްގެން އުޅޭ ކްލަބުތަކަށް އަދިވެސް އުޅެނީ ހިންދަމާ ނުލެވިގެންނެވެ. އެހެން ނަމަވެސް މިއަދަށް ފަހު އެ ހާލަތުން ކްލަބުތައް އަރައިގަންނާނޭ މަގު ތަނަވަސްވެގެން ދިޔައީއެވެ.

މާލޭ ލީގުގައި ވާދަކުރާ އަށް ކްލަބަށް އެހީތެރިވެދޭނޭ ކުންފުނިތައް ކަނޑައެޅުމަށް މިއަދު ގައުމީ ފުޓްބޯޅަ ދަނޑުގެ ވީއައިޕީގައި ކުރިއަށް ގެންދިޔަ ގުރުނެގުމުގެ ރަސްމިއްޔާތަށް ފަހު، ކުންފުނިތަކުން ބުނީ، "މިއަދުން ފެށިގެން ދެން ކްލަބުތަކުން ސްޕޮންސަރުން ހޯދަން، އާދޭސްކުރާން ނުޖެހޭނެ" ކަމަށެވެ.

"ހަމަ ކޮންމެ ފަހަރަކުވެސް ޖަލްސާތައް ނިންމާފަ ހަމަ އަނެއްކާވެސް ސްޕޮންސަރ ސިޓީތައް ހިފައިގެން އެކިއެކި ތަންތަނަށް ދަނީ. މި މަހު ދީފިއްޔާ ދެން އަންނަ މަހު ވިސްނާލާނީ، ދެން އަންނަމަހު ދެވޭނޭ ގޮތެއް ނެތް އެކަހަލަ ގޮތަކަށް ދިޔައީ،" މޯލްޑިވް ގޭސްގެ އެމްޑީ ވިދާޅުވިއެވެ.

"ނަމަވެސް މިއަދުގެ ރައީސުލްޖުމްހޫރިއްޔާގެެ ވިޜަންގެ ދަށުން އަޅުގަނޑުމެންނަށް ޔަގީވެގެން މި ދިޔައީ، ކްލަބުތަކެއް ދެން އިތުރަކަށް ފައިސާ ހޯދަން ތަންތަނަށް ދާކަށް ނުޖެހޭނެ."

ކުންފުނިތަކުން ބުނީ، މިއަދުންފެށިގެން ދެމެހެއްޓެނިވި ގޮތެއްގައި ކްލަބުތަކަށް އެހީތެރިކަން ފޯރުކޮށްދިނުމުގެ ޒިންމާ އެ ކުންފުނިތަކުން އުފުލާނޭ ކަމުގެ ޔަގީންކަން ދޭ ކަމަށެވެ.

"މިއީ ހަމަ އެކަނި ކްލަބުތަކުގެ ކުޅުންތެރީންގެ މުސާރައާ ހަމައިން ނިމޭކަމެއް ނޫން. އެއަށްވުރެވެސް ބޮޑުކޮށް ހަގީގަތުގައި ރައީސުލްޖުމްހޫރިއްޔާ ވިސްނަވާފައި ވަނީ. އަޅުގަނޑުމެންނާ އެންމެ ފަހުން ބައްދަލުކުރެއްވި ދުވަހު ވިދާޅުވީ، ތިމަންނަ ބޭނުންވަނީ މި ފެށި ފެށުމާއެކު، ސަރަހައްދީ ފުޓްބޯޅައެއް ނޫނޭ، ދުނިޔޭގެ ފެންވަރުގައި ވެސް ދިވެހި ރާއްޖެއަކީ ކުޅިވަރުގެ ގޮތުން ހަމަ ނަން ފާހަގަކޮށްލެވޭ ވަރުގެ ގައުމަކަށް، ކުޅުންތެރީންތަކެއް ތިބި ބަޔަކަށް ހައްދަވައި ދެއްވާށޭ،" މޯލްޑިވް ގޭސްގެ އެމްޑީ މައުމޫން ވިދާޅުވިއެވެ.

މިއަދު މާލޭ ލީގުގައި ވާދަކުރާ އަށް ކްލަބަށް ކުންފުނިތައް ކަނޑައެޅިގެން ދިޔައިރު، އެ ކްލަބުތަކަށް ކުންފުނިތަކުން ދޭ ޔަގީން ކަމަކީ، ހަރުދަނާކޮށް ޒިންމާދާރު ކަމާއެކު ކްލަބުތައް ހިންގާ ނަމަ، އެހީތެރިވެދޭން ކުންފުނިތަކުން ތައްޔާރަށް އޮތްކަމުގެ ޔަގީންކަމެެވެ.

"އަޅުގަނޑުމެން ކުންފުނިތަކުން މިތިބީ، މާލީ އެހީތެރިކަން ފޯރުކޮށްދޭށޭ. ތިބޭފުޅުންގެ ޒިންމާއެކޭ، މިކަން ކުރުމަށްޓަކައި އަޅުގަނޑުމެންނާ ގުޅިގެން، ރައީސުލްޖުމްހޫރިއްޔާ ބޭނުންފުޅުވެލައްވާ ވިޝަން ހާސިލްކުރުމަށްޓަކައި މަސައްކަތްކޮށްދެއްވާށޭ. ހަމަ ރެޔާ ދުވާލު ކެނޑި ނޭޅި މަސައްކަތް ކޮށްދެއްވާށޭ، ވަރަށް ރަނގަޅު މޮޅު ކުޅުންތެރީންތަކެއް އުފައްދަން."

ކްލަބުތަކަށް ގުރުއަތުން ދިމާވި ކުންފުނިތައް

ނިއުރޭޑިއަންޓް ސްޕޯޓްސް ކުލަބް - އެލައިޑް އިންޝުއަރެންސް
މާޒިޔާ ސްޕޯޓްސް އެންޑް ރެކްރިއޭޝަން - މޯލްޑިވްސް ޓޫރިޒަމް ޑިވެލޮޕްމެންޓް ކޯޕަރޭޝަން (އެމްޓީޑިސީ)
ކުލަބް އީގަލްސް - މާލޭ ވޯޓާ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ)
ވިކްޓަރީ ސްޕޯޓްސް ކުލަބް - މޯލްޑިވްސް ގޭސް
ޓީސީ ސްޕޯޓްސް ކުލަބް - މޯލްޑިވްސް އެއާޕޯޓް ކޮމްޕެނީ ލިމިޓެޑް (އެމްއޭސީއެލް)
ގްރީން ސްޓްރީޓް - މޯލްޑިވިއަން
ކްލަބް ވެލެންސިއާ - ފިއުލް ސަޕްލައި މޯލްޑިވްސް
ޔުނައިޓެޑް ވިކްޓަރީ - ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)

މާލޭ ލީގުގެ ކްލަބުތަކަށް ގުރުއަތުން ދިމާވި ކުންފުނިތައް-- ސަން ފޮޓޯ: އަހްމަދު މުޖްތަބާ

މިއަދު ވެވުނު އެއްބަސްވުމާއެކު މާލޭ ލީގުގައި ވާދަކުރާ އަށް ކްލަބަށް ކުންފުނިތައް މެދުވެރިކޮށް ކޮންމެ ކްލަބަކަށް ދެ މިލިއަން ރުފިޔާ ލިބޭނެއެވެ. އަދި ޕްރިމިއާ ލީގުގައި ވާދަކުރާ އަތޮޅުތެރޭގެ ހަތަރު ޓީމަށް ކުންފިނުތައް މެދުވެރިކޮށް 1.5 މިލިއަން ރުފިޔާ ދިނުމަށް ހަމަޖެހިފައިވެ އެވެ. އަތޮޅުތެރޭގެ ހަތަރު ޓީމާ ހަވާލުވާނޭ ކުންފުނިތައްވެސް ވަރަށް އަވަހަށް އެނގިގެން ދާނެއެވެ.

މިއީ ދިވެހި ކުޅިވަރު އާއިލާއަށް އުފާވެރި އަދި އުންމީދީ ދުވަހެކެވެ. ޚާއްސަކޮށް ފުޓްބޯޅައަށް އުފާވެރި ދުވަހެކެވެ. ސަރުކާރާއި، ސަރުކާރު ހިއްސާވާ ކުންފުނިތަކުގެ މިސްރާބު ހުރީ ރައީސް ޔާމީންގެ ކުޅިވަރު ތަސައްވުރު ހަގީގަތަކަށް ހެދުމަށް އެންމެނާ ގުޅިގެން މަސައްކަތްކުރުމަށެވެ.