22 Feb 2017, 13:58
ރ. ދުވާފަރުގައި އުމުރުން ދުވަސްވީ މީހެއްގެ މޫނަށް ކެމިކަލް ޖެހި މައްސަލާގައި އަދިވެސް މީހަކު ހައްޔަރު ނުކުރާ ކަމަށް ފުލުހުން ބުނެފިއެވެ.
މޫނަށް ކެމިކަލް ޖެހުމުގެ ސަބަބުން ޒަހަމް ވެފައިވަނީ ދުވާފަރު ނީލަމްގޭ، އިބްރާހިމް މުހައްމަދު، 71، އެވެ. އޭނާއަށް ލިބުނު ޒަހަމްތަކަށް އިއްޔެ މެންދުރު މާލެ ގެނެސް އައިޖީއެމްއެޗުގައި ވަނީ ފަރުވާން ދޭން ފަށާފައެވެ.
އެ މައްސަލައާ ގުޅޭ ގޮތުން ފުލުހުންގެ މީޑިއާ އޮފިސަލް ވިދާޅުވީ ތަހުގީގު ކުރިއަށްދާ ކަމަށާއި ނަމަވެސް އަދިވެސް އެއްވެސް މީހަކު ހައްޔަރު ނުކުރާ ކަމަށެވެ.
އިބްރާހިމް މުހައްމަދުއަށް އައިޖީއެމްއެޗުގައި ފަރުވާ ދެމުންދާއިރު އޭނާގެ އާއިލާގެ ފަރާތުން ވާހަކަ ދެއްކި މީހަކު ބުނީ ކެމިކަލް ޖެހުމުގެ ސަބަބުން އޭނާގެ މޫނަށް ކޮންމެވެސް ވަރެއްގެ ގެއްލުންތަކެއް ލިބިފައިވާ ކަމަށާއި ކަނާއަތު ލޮލަށް ކެމިކަލް އެޅުމުގެ ސަބަބުން ލޮލުގައި ބޭސްގަނޑެއް އަަޅާފައިވާ ކަމަށެވެ.
"އިއްޔެ އައިޖީއެމްއެޗަށް ގެނައި އިރު ދެ ލޯ ވެސް ނުހުޅުވޭ. ނަމަވެސް މިހާރު ވަނީ ވާއަތުލޯ ހުޅުވިފައި. ކަނާއަތު ލޮލަށް ލިބުނު ގެއްލުން އިނގޭނީ ބޭސްގަނޑު ނެގުމަށްފަހު،" އޭނާ ބުންޏެވެ.
މިދިޔަ އަހަރުގެ ޑިސެމްބަރު މަހު ފަހުކޮޅުގައި ށ. ޅައިމަގުގައި ވެސް ވަނީ އަންހެނެއްގެ މޫނަށް ކެމިކަލް ޖަހައިފައެވެ. އެ މައްސަލައާ ގުޅިގެން ދެ މީހަކު ފުލުހުން ވަނީ ހައްޔަރުކޮށްފައެވެ.