19 Feb 2017, 11:12
ތިން މަސް ތެރޭގައި ގުރުއާންހިތުދަސްކުރި އޯޓިޒަމް ހުންނަ ކުއްޖެއްކަމަށްވާ އުމުރުން 14 އަހަރުގެ ލ. މާވަށް، މާބަގީޗާގޭ، އަލްހާފިޒް އަހުމަދު ނަބީހުއަށް ގުރުއާނުގެ އިލްމުން މާސްޓާސްއާއި ހަމައަށް ހިލޭ ކިޔެވުމުގެ ފުރުސަތު އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) ދީފިއެވެ.
އެ ޔުނިވާސިޓީގެ ޗާންސެލާ ޑރ. މުހައްމަދު ޝަހީމް އަލީ ސައީދު މިއަދު ސަން އަށް ވިދާޅުވީ ނަބީހުއަށް އެޔުނިވާސިޓީއިން ގުރުއާނާ ބެހޭއިލްމުން ސެޓްފިކެޓް ލެވަލްއިން ފެށިގެން މާސްޓާސް އާއި ހަމައަށް ހިލޭ ކިޔެވުމުގެ ފުރުސަތު ދިނުމަށް ނިންމާފައިވާ ކަމަށެވެ.
ނަބީހުއަކީ އުމުރުން ދެ އަހަރާއި ބައިން ފެށިގެން އަމިއްލަ ގުރުއާން ކުލާސްތަކަށްގޮސްގެން ގުރުއާން ކިޔެވުމަށް މަސައްކަތްކުރި ކުއްޖެކެވެ. ނަމަވެސް އޯޓިޒަމް ހުންނާތީ އޭނާ އެކުލާސްތަކުން ފުރުސަތެއް ނުދިނެވެ. އެންމެ ފަހުން އޭނާ ގުރުއާން ހިތުދަސްކުރީ ގެއަށް ޓީޗަރަކު ގެނެސްގެންނެވެ.
ނަބީހުގެ މަންމަ އައިމިނަތު މުހައްމަދު ސަން އަށް މިއަދު ބުނީ އައިޔޫއެމްޔޫގެ ފުރުސަތާއެކު ބޮޑު އުފަލެއް ލިބި އުންމީދުތަކުގައި ކުލަޖެހޭނެކަމުގެ ޔަގީންކަން ލިބިފައިވާ ކަމަށެވެ.
"ފުރަތަމަ ހުވަފެން ކާމިޔާބްވެއްޖެ، އެއީ ނަބީހް ގުރުއާން ހިތުދަސްކުރުން، ދެވަނަ ހުވަފެނުގެ ނަބީހް އެދާއިރާއިން ކުރިއަށްގެންދިއުން އެދޮރު ހުޅުވުންފަދަ،" ނަބީހް މަންމަ ބުންޏެވެ.
ގުރުއާން ހިތުދަސް ކުރުމަކީ ދެ ދުނިޔޭގައި ވެސް ސަވާބާއި ދަރުމަ ލިބޭ ކަމެކެވެ. ގުރުއާނާ ބެހޭ މަރުކަޒުން ބުނީ ހާފިޒުކަން ލިބުމާއެކު ނަބީހުއަށް ކޮންމެ މަހަކު 2000 ރުފިޔާގެ އެލަވަންސް އެއް ލިބޭނެ ކަމަށެވެ.