15 Feb 2017, 18:47
މިއަހަރުތެރޭގައި ރާއްޖޭގެ ހުރިހާ އަތޮޅެއްގައި ހިންގާ ސީއެސްއާރު ހަރަކާތްތަކަށް އެހީތެރިކަން ފޯރުކޮށްދިނުމަށް ބޭންކް އޮފް މޯލްޑިވްސް (ބީއެމްއެލް) އިން ނިންމައިފި އެވެ.
ބީއެމްއެލްއިން ރާއްޖޭގެ ރަށްރަށުގައި މުޖުތަމައުއަށް ފައިދާ ކުރާ ކަންތައްތަކަށް އެހީތެރިކަން ފޯރުކޮށްދިނުމަށް ނިންމާފައިވާކަން އިއުލާނުކޮށްފައިވަނީ މިއަދު ދ. ކުޑަހުވަދޫގައި ކުރިއަށް ގެންދިޔަ "އަހަރެންގެ ބޭންކް" ކެމްޕެއިންގެ ރަސްމިއްޔާތެއްގަ އެވެ.
ބީއެމްއެލް އިން ބުނީ، އަމިއްލަ ފަރާތްތަކުންނާއި މަދަނީ ޖަމިއްޔާތަކުން، ރަށްރަށުގައި ހިންގާ މުޖުތަމައުއަށް ފައިދާ ހުރި ހަރަކާތްތަކަށް ފަންޑު ހޯދުމަށް އެއަތޮޅެއްގެ ބޭންކް ބްރާންޗަށް ޕްރޮޕޯސަލް ހުށަހެޅޭނެ ކަމަށެވެ.
ބީއެމްއެލް އިން ބުނީ، މިއަހަރު ތެރޭގައި ރާއްޖޭގެ ހުރިހާ އަތޮޅަކަށް ވެސް ސީއެސްއާރުގެ ދަށުން އެހީތެރިކަން ފޯރުކޮށްދޭނެ ކަމަށެވެ.
"އަހަރެންގެ ބޭންކް، ދިވެހިންގެ ބޭންކް" ކެމްޕެއިންގެ ދަށުން މުޖުތަމައުއަށް ފައިދާ ހުރި ގިނަ ކަންތައްތަކެއް ބީއެމްއެލުން ދަނީ ކުރަމުންނެވެ. އެ ގޮތުން އިއްޔެ ވަނީ ކެއާ ސޮސައިޓީއަށް 150000 ރުފިޔާގެ ފައިސާގެ އެހީ ވެދީފަ އެވެ. އޭގެ އިތުރުން ލޭ ހަދިޔާ ކުރުމުގެ ޕްރޮގްރާމާއި، ސާފުކުރުމުގެ ޕްރޮގްރާމް ފަދަ ގިނަ ކަންތައްތަކެއް އެ ބޭންކުން ދަނީ ކުރަމުންނެވެ.
ބީއެމްއެލުން ބުނީ އެ ކެމްޕޭނަކީ، ބޭންކާއި މުޖުތަމައުއާ އޮތް ގުޅުން އިތުރަށް ބަދަހިކޮށް މުޅި ރާއްޖެއަށް ކުރިއަށް ގެންދާ ކެމްޕޭނެއް ކަމަށެވެ. އަދި ބީއެމްއެލްއިން މީގެ ކުރިން ސީއެސްއާރު ހަރަކާތްތަކަށް ބޭންކުން ހޭދަކުރާ ވަރު މިއަރު ދެގުނައަށް އިތުރު ކުރާނެ ކަމަށެވެ.
އޭގެ އިތުރުން ބޭންކުގެ ހިދުމަތްތައް ފުޅާ ކުރުމަށް ޖުމްލަ 300 މިލިއަން ރުފިޔާގެ އިންވެސްޓްމެންޓެއް ކުރާނެ ކަމަށް ވެސް އެ ބޭންކުން ވަނީ ހާމަކޮށްފަ އެވެ.