ކިމް ޖޮންގް އުންގެ ބޭބެގެ މަރާ ގުޅުން ހުރި ކަމުގެ ތުހުމަތުގައި އަންހެނަކު ހައްޔަރުކޮށްފި

15 Feb 2017, 18:04

ކުއަލަލަމްޕޫރު (ފެބްރުއަރީ 15): އުތުރު ކޮރެއާގެ ލީޑަރު ކިމް ޖޮންގް އުންގެ ބޭބެ، ކިމް ޖޮންގް ނަމްގެ މަރާ ގުޅުން ހުރި ކަމުގެ ތުހުމަތުގައި މެލޭޝިއާއިން އަންހެނަކު ހައްޔަރުކޮށްފި އެވެ.

މެލޭޝިއާގެ ފުލުހުން ނެރުނު ބަޔާނެއްގައިވާ ގޮތުން އުމުރުން 28 އަހަރުގެ އެ އަންހެން މީހާ އިއްޔެ ހައްޔަރު ކުރީ ކުއަލަލްޕޫރު އިންޓަނޭޝަނަލް އެއާޕޯޓުގެ ސީސީޓީވީ ފުޓެޖް ބެލުމަށް ފަހުގަ އެވެ. އަދި ވެރި ރަށުން ހައްޔަރު ކުރި އެ އަންހެން މީހާގެ އަތުގައި އޮތީ ވިއެޓްނާމްގެ ޕާސްޕޯޓެއް ކަމަށް ފުލުހުން ބުނެ އެވެ.

ކިމް ޖޮން ނަމް ދަތުރު ކުރައްވަމުން ދިޔައީ ކިމް ޗޮލްގެ ނަމުގައި ކަމުން މެލޭޝިއާގައި އަވަހާރަވީ އޭނާ ކަން އެގައުމުން އަދި ރަސްމީކޮށް ޔަގީންކޮށްދީފައި ނުވެ އެވެ.

ނަމަވެސް ދެކުނު ކޮރެއާއިން ވަނީ މެލޭޝިއާގައި އަވަހާރަވީ ކިމް ޖޮންގް ނަމް ކަން ކަށަވަރުވާ ކަމަށް ބުނެފަ އެވެ. ކިމް އަވަހާރަކޮށްލީ ޒަހަރުދީގެން ކަމަށް ބެލެވޭ ކަމަށް އެގައުމުގެ ޖާސޫސީ އިދާރާއިން ބުނެފައިވާ ކަމަށް ރިޕޯޓުތަކުގައިވެ އެވެ.

ކިމް ޖޮންގް ނަމްގެ މަރާ ބެހޭ ގޮތުން އުތުރު ކޮރެއާއިން އަދި ވަކި އެއްޗެކޭ ބުނެފައި ނުވެ އެވެ. ނަމަވެސް މެލޭޝިއާގައި ހުންނަ އެގައުމުގެ އެމްބަސީގެ އޮފިޝަލުން ވަނީ ކިމްގެ ހަށިކޮޅު އޮތް ހޮސްޕިޓަލަށް ޒިޔާރަތް ކުރައްވާފަ އެވެ.