13 Feb 2017, 10:13
ވޮޝިންޓަން(ފެބްރުއަރީ 13): އެމެރިކާގެ ގައުމީ ސަލާމަތާ ބެހޭ ގޮތުން އެމެރިކާގެ ރައީސް ޑޮނަލްޑް ޓްރަމްޕް އެކަށައެޅުއްވި ސްޓްރެޓެޖީ އަކީ ބޮޑެތި ބާގަނޑުތަކެއް އުފެދިފައިވާ އެއްވެސް ބުރަދަނެއްނެތް ސްޓްރެޓެޖީ އެއްކަމަށާއި އެމެރިކާގެ ކޯޓުތަކުން ޓްރަމްޕްގެ ސްޓްރެޓެޖީ ހުއްޓުވާނެކަމަށް އެމެރިކާގެ ގިނަ ތަޖްރިބާކާރުން ދެކޭކަން ވޮޝިންޓަން ޕޯސްޓުން ހާމަކޮށްފި އެވެ.
ވޮޝިންޓަން ޕޯސްޓްގައި، އެމެރިކާގެ ތަޖްރިބާކާރެއްކަމަށްވާ ޑޭވިޑް އިގްނިޝަޝް ވިދާޅުވެފައިވަނީ އެމެރިކާގެ ގައުމީ ސަލާމަތް ހިމާޔަތްކޮށް އެމެރިކާގެ ރައްޔިތުން ޓެރަރިސްޓް ޙަމަލާތަކުން ސަލާމަތް ކުރެވޭނީ އިސްލާމީ 7 ގައުމެއްގެ ރައްޔިތުން އެމެރިކާއަށް ވަނުން މަނާކޮށްގެންކަމަށް ޓްރަމްޕާއި އޭނާގެ ޓީމުން ދެކޭ ދެކުމަކީ އެއްވެސް އަސާސެއްގެ މައްޗަށް ބިނާވެފައިވާ ކަމެއްނޫނެވެ.
އެމެރިކާގެ ރައްޔިތުން ޓެރަރިސްޓް ޙަމަލާތަކުން ސަލާމަތް ކުރުމަށް ކަމަށް ވިދާޅުވެ އެގައުމުތަކުގެ ރައްޔިތުން އެމެރިކާއަށް ވަނުން މަނާކުރުމުގެ އަމުރު ޓްރަމްޕް ނެރުއްވި އިސްލާމީ ގައުމުތަކަކީ އިރާގު، ސޫރިޔާ، ލީބިޔާ، ސޮމާލިޔާ، އީރާން، ސޫދާން އަދި ޔަމަންއެވެ.
އެމެރިކާއަށް މިހާތަނަށް ދީފައިވާ ޓެރަރިސްޓް ހަމަލާތަކުގައި މިއިން އެއްވެސް ގައުމެއްގެ ރައްޔިތަކު ބައިވެރިވެފައިނުވާއިރު އެމެރިކާގެ ގައުމީ ސަލާމަތަށް މިގައުމުތަކުގެ ރައްޔިތުން ނުރައްކާވަނީ ކޮންސަބަބަކާ ގުޅިގެންކަން ޓްރަމްޕަށް ސާފުކޮށް ދެވިފައިނުވާކަމަށް އިގްނިޝަޝް ވިދާޅުވިއެވެ. މީގެތެރެއިން އިރާގު، ސޫރިޔާ، ލީބިޔާ، ސޮމާލިޔާ، ޔަމަން އަކީ ޓެރަރިޒަމާ އިދިކޮޅު ހަނގުރާމައިގެ ނަމުގައި އެމެރިކާ އިސްލާމީ ގައުމުތަކާ ދެކޮޅަށް ހިންގާ ސްޓޭޓް ޓެރަރިޒަމްގެ ހަމަލާތަކުގެ ސަބަބުން ހަލާކުވެ ރައްޔިތުން ހާލުގައި ޖެހިފައިވާ ގައުމުތަކެވެ.
މިއާއެކު، އެމެރިކާއަށް ޓެރަރިސްޓް ހަމަލާތައް ދިނުމުގައި ބައިވެރިވެފައިވާ ބައެއް މުސްލިމުން ނިސްބަތްވާ އިސްލާމީ ގައުމުތައް ޓްރަމްޕްގެ މިލިސްޓްގައި ނުހިމެނީ ކީއްވެތޯވެސް އިގްނިޝަޝް ވަނީ ސުވާލު އުފައްދަވާފައެވެ.
ޓްރަމްޕްގެ ގައުމީ ސަލާމަތާބެހޭ ސްޓްރެޓެޖީއާ ބެހޭގޮތުން ވާހަކަ ދައްކަވަމުން އެމެރިކާގެ އެހެން ތަޖްރިބާކާރެއްކަމަށްވާ ބިޓާނީ އެލިން ވިދާޅުވެފައިވަނީ، މިސްޓްރެޓެޖީ ބިނާވެފައިވަނީ ނަސްލީ އިމްތިޔާޒާއި އެމެރިކާ ގަބޫލުކުރާ ޑިމޮކްރެޓީކް ހަމަތަކާ ޚިލާފަށްކަމުގައެވެ. އެހެންކަމުން ޓްރަމްޕްގެ ސްޓްރެޓެޖީ ތަންފީޒު ކުރުމަށްޓަކައި އޭނާ ނެރުއްވާ ޑިކްރީ ތަކާއި ރިޔާސީ ގިނަ އަމުރުތައް އެމެރިކާގެ ކޯޓުތަކުން ހުއްޓުވާނެ ކަމަށް ބެލެވޭ ކަމުގައެވެ.
ޓްރަމްޕްގެ ގިނަ ސިޔާސަތުތަކަކީ އޭނާ ނިސްބަތްވެ ވަޑައިގަންނަވާ ރިޕަބްލިކަން ޕާޓީގެ ކޮންގްރެސްގެ މެންބަރުންގެވެސް ތާއީދުނެތް ސިޔާސަތު ތަކަކަށްވާތީ ޓްރަމްޕަށް ގޮންޖައްސަވާ އެމެރިކާގެ ފަނޑިޔާރުންނާ ދެކޮޅަށް އެއްވެސް ފިޔަވަޅެއް އެޅުމުގެ ސިޔާސީ ބާރު ޓްރަމްޕަށް ލިބިވަޑައިނުގަންނަވާނެކަން ބިޓާނީ އެލިން ދެކެވަޑައިގަންނަވައެވެ.
އެމެރިކާގެ ގައުމީ ސަލާމަތް ހިމާޔަތް ކުރުމަށްކަމަށްބުނެ ޓްރަމްޕް އެކަށައެޅުއްވި ސްޓްރެޓެޖީ ތަންފީޒު ކުރުމަށްޓަކައި އިސްލާމީ 7 ގައުމެއްގެ ރައްޔިތުން އެމެރިކާއަށް ވަނުން މަނާކުރުމަށް އޭނާ ނެރުއްވި ރިޔާސީ އަމުރު ވޮޝިންޓަންގެ ކޯޓަކުންވަނީ ބާތިލްކޮށްފައެވެ.
މި ބާތިލްކުރުމާ ދެކޮޅަށް މައްސަލަ ކޯޓުގައި އިސްތިއުނާފް ކުރުމަށް ޓްރަމްޕް ހުށަހެޅުއްވުމުން ކޯޓުންވަނީ އެމައްސަލަ ބަލައިގަތުމަށްވެސް ދެކޮޅު ހަދައިފައެވެ. ދެން ޓްރަމްޕަށް އޮތީ އެމެރިކާގެ ސްޕްރީމް ކޯޓަށް މައްސަލަ ގެންދެވުމެވެ. ނޫނީ މުސްލިމުން އެމެރިކާއަށް ވަނުން މަނާކުރުމުގެ އެހެން ރިޔާސީ އަމުރެއް ނެރުއްވުމެވެ.
ވައިޓް ހައުސް އިންވަނީ ބައެއް ގައުމުތަކުގެ މުސްލިމުން އެމެރިކާއަށް ވަނުން މަނާކުރުމުގެ އެހެން ރިޔާސީ އަމުރެއް ނެރުއްވުމަށް ޓްރަމްޕް މަސައްކަތް ކުރައްވަމުން ގެންދަވާކަން ހާމަކޮށްފައެވެ. ނަމަވެސް ޓްރަމްޕް ނެރުއްވަން އުޅުއްވާ ދެވަނަ އަމަރުވެސް ކޯޓުން ނުހުއްޓުވާނެކަމުގެ ޔަގީންކަން ނެތްކަމަށް ބިޓާނީ ވިދާޅުވިއެވެ. (ވޮޝިންޓަން ޕޯސްޓް)