10 Feb 2017, 13:46
ދެބައޮޑުވާ މީހުންނާއި ދޭތެރެޖައްސާ މީހުންނަކީ އެމީހުންގެ ދީން ވިއްކާލާފައިވާ ބައެއް ކަމަށާއި އެ މީހުންނަކީ އެހެން މީހުންގެ ރުހުން ހޯދުމަށްޓަކާ މާތްﷲގެ ކޯފާގެ ތެރެއަށް ވެއްޓިގެންފައިވާ ބައެއް ކަމަށް މިއަދުގެ ހުކުރު ހުތުބާގައި ބުނެފިއެވެ.
"ދެބިއޮޑުވުމާއި އެކަމުގެ ނުރައްކާތެރިކަން"ގެ މައްޗަށް މިއަދު ދިން ހުތުބާގައި ބުނެފައި ވަނީ، މާތްﷲ އިސްލާމްދީން ބާވައިލެއްވީ ލޯތްބާއި އެކުވެރިކަމާއި އެއްބަނޑުއެއްބަފައިކަމުގެ މަތީގައި ހަރުދަނާ މުސްލިމު މުޖުތަމައެއް ގާއިމް ކުރެއްވުމަށްޓަކާ ކަމަށެވެ.
އެހެންކަމުން މުސްލިމުންގެ ތެރޭގައި އުހުއްވަތްތެރިކަން ދެމެހެއްޓުމަކީ ކޮންމެ މުސްލިމެއްގެ މައްޗަށް ވާޖިބުވެގެންވާ ކަމެއް ކަމަށްވާއިރު، އެކަކު އަނެކަކަށް އިހްތިރާމް ކުރުމާއި ގަދަރު ކުރުމާއި އެކަކު އަނެކަކު ރައްކާތެރިކޮށް ހިމާޔަތް ކުރަންވާނެ ކަމަށް ބުނެފައިވެއެވެ.
އެގޮތުން ދެބައޮޑުވުމުގެ ނުރައްކާތެރިކަން ފާހަގަކޮށް ހުތުބާގައި ބުނީ އެއީ ހިތުގެ ބަލިތަކުގެ ތެރޭގައި ހިމެނޭ ނުރައްކާތެރި ބައްޔެއް ކަމަށާއި ދުލުގެ އާފަތްތަކުގެ ތެރޭގައި ބޮޑު އާފަތް ކަމަށެވެ.
ޒަމާނީ ޓެކްނޮލޮޖީ އާއި މުވާސަލާތީ ތަރައްގީގެ ސަބަބުން އެ ބަލި ވަރަށް ބާރަށް ފެތުރެމުންދާ ކަމަށާއި އޭގެ ވަކިތައް އިތުރަށް ތޫނުވެ، މުޖުތަމައުގެ އަފްރާދުންގެ ޒަހަމްކޮށް ކަތިލައި، ހަތުރުވެރި ކުރަމުންދާ ކަމަށް ބުނެފައިވެއެވެ.
ދެބައޮޑުވުމަކީ މީސްތަކުންގެ މެދުގައި ދޭތެރެޖެއްސުމަށް އެކެއްގެ ނުބައި ވާހަކަ އަނެކެއްގެ ގާތުގައި ދެއްކުމެވެ. ދޭދޭ ފަރުދުންގެ ދެމެދުގައި އޮންނަ ރަނގަޅު ގުޅުން ފަސާދަ ކުރުމެވެ. ރުޅިވެރިކަން އުފައްދާ މުޖުތަމައު ނާމާންކުރުމެވެ.
"ދެބައޮޑުވަމަކީ ދެފުށް ދެ ގޮތް މީހެކެވެ. ތަފާތު މީހުންގެ ގާތަށް ދާނީ ތަފާތު ފޭރާމެއްގައި ތަފާތު މޫނުތަކަކާއިގެންނެވެ. އޭނާގެ މަސްލަހަތާ އެއްގޮތަށް އޭނާގެ ކުލަ ބަދަލުކޮށްލާނެއެވެ. އޭނާގެ އަމާޒަށް ވާސިލުވުމަށްޓަކައި އޭނާގެ ރާގުތައް ބަދަލުކޮށްލާނެއެވެ."
"މަޖިލިސްތަކުގައްޔާއި ބައްދަލުވުންތަކުގައްޔާއި ވައިބާ ގުރޫޕްތަކުގައި އޭނާގެ މަސައްކަތަކަށް ވާނީ މީހުންގެ އަބުރު ކަތިލުމެވެ. އެއްބަޔަކު އަނެއް ބަޔަކާ ޖެއްސުމެވެ. ކުށެއް ނެތް މައުސޫމް މީހުންނަށް ލަނޑުދީ އެކަމާމެދު އުފާފާޅުކޮށް ހަޖޫ ކިޔުމެވެ،" ހުތުބާގައި ބުނެފައިވެއެވެ.
ހުތުބާގައި ބުނީ، މި ޒަމާނުގައި ހަބަރުފަތުރާ ވަސީލަތްތަކާއި ސޯޝަލް މީޑިއާއާ މެދު ސަމަލުވާން ޖެހިފައިވާ ކަމަށެވެ. މީހަކު ބުންޏޭ ބުންޏޭ ކިޔާފައި ލިޔާ ހަބަރުތަކާއި ވަކި މައްސަލައަކާމެދު ފާޅުކުރާ ހިޔާލުތަކާއި ފާޑުކިޔުންތަކާމެދު ސަމާލު ނުވެއްޖެނަމަ ދެބައޮޑުވުމުގެ ދަންތުރާގައި ޖެހި، މި މާތް އުއްމަތް ބައިބައިވެގެން ގޮސްދާނެ ކަމަށެވެ.
"ދެބައޮޑުވާ މީހާގެ ދޫ ވަރަށް ރީތި ކުރާނެއެވެ. އެކަމަކު އޭނާގެ ހިތަކީ އަނދައަނދާހުރި އުނދުނެއްފަދަ އެއްޗެކެވެ. މުރޫއަތްތެރިކަމެއް ނެތް މީހެކެވެ،" ހުތުބާގައި ބުނެފައިވެއެވެ.
މިއަދުގެ ހުތުބާ ނިންމާލީ މީހުންގެ ވާހަކަ ދެއްކުމުގެ ކުރިން އެކަމާމެދު ވިސްނާލުމަށް އެންމެހާ މުސްލިމުންނަށް ނަސޭހަތްތެރިވެފަ އެވެ. އަދި ބުއްދިވެރިއަކީ އާހިރަތަށްޓަކައި މަސައްކަތްކުރާ މީހާ ކަމަށާއި އެހެން މީހުންގެ އައިބުތައް ހޯދުމުގެ ކުރިން ތިމާގެ އައިބުތައް ވަންހަނާ ކުރެވޭތޯ އުޅޭ މީހާ ކަމަށް ބުނެފައިވެ އެވެ.