07 Feb 2017, 12:28
ޕަބްލިކް ސާވިސް މީޑިއާ (ޕީއެސްއެމް) އިން އިސްތިއުފާ ދެއްވި މަޝްހޫރު ޕްރެޒެންޓާ ހީނާ ވަލީދު ފޮރިން މިނިސްޓްރީގެ ޕޮލިޓިކަލް ޑިރެކްޓަރުގެ މަގާމަށް ރައީސުލްޖުމްހޫރިއްޔާ އައްޔަން ކުރައްވައިފި އެވެ.
ޕީއެސްއެމްގެ ޑެޕިއުޓީ ނިއުސް ހެޑްގެ މަގާމުގައި ހުންނެވި ހީނާ ޕީއެސްއެމުން މިދިޔަ ހަފްތާގައި އިސްތިއުފާ ދެއްވައި މީޑިއާ ދާއިރާ ދޫކޮށްލާފައި ވަނީ 17 އަހަރަށް ފަހު އެވެ.
"ސަން"އަށް އެނގިފައިވާ ގޮތުގައި މިދިޔަ އާދިއްތަ ދުވަހުން ފެށިގެން ހީނާ އަންނަނީ ފޮރިން މިނިސްޓްރީގައި މަސައްކަތް ކުރަމުންނެވެ. އޭނާ އެ މަގާމަށް އައްޔަން ކުރެއްވީ ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމެވެ.
ހީނާ އިސްތިއުފާ ދެއްވުމާ ގުޅޭ ގޮތުން އޭނާ ސަން އަށް ވިދާޅުވެފައި ވަނީ އަމިއްލަ ބޭނުމަކަށް ޕީއެސްއެމުން މިދިޔަ ހަފްތާގައި އިސްތިއުފާ ދެއްވާފައިވާ ކަމަށެވެ. ދެން މީޑިއާއެއްގައި މަސައްކަތް ކުރެއްވުމުގެ ވިސްނުން އޭނާ ނުގެންގުޅެ އެވެ.
"އަޅުގަނޑު އިސްތިއުފާ ދިނީ އެއްވެސް މައްސަލައެއް ޕީއެސްއެމްގައި އޮވެގެނެއް ނޫން، ދިރިއުޅުމަށް އަންނާނެތާ ބަދަލުތައް،" ހީނާ ވިދާޅުވި އެވެ.
މީޑިއާގެ ދާއިރާ މަތީ ތައުލީމު ހާސިލްކޮށްފައިވާ ހީނާގެ ވިސްނުން ހުރީ ދެން ވެސް ކިޔަވަން ދިއުމަށެވެ. ނަމަވެސް މީޑިއާ ދާއިރާ އިން ތައުލީމް ހާސިލް ކުރުމުގެ ވިސްނުން މިހާރު ހީނާ ނުގެންގުޅެ އެވެ.
ޕީއެސްއެމުން ހީނާ އިސްތިއުފާ ދެއްވާފައިވާއިރު މިފަހަކުން ގިނަ އަދަދެއްގެ ސީނިއާ ބަޔަކު ވަނީ އެ މީޑިއާ ދޫކޮށްލާފަ އެވެ.