07 Feb 2017, 10:49
ބޭންކް އޮފް މޯލްޑިވްސް (ބީއެމްއެލް)ގެ 4،000 ވަނަ ޕޮއިންޓް އޮފް ސޭލްސް (ޕީއޯއެސް) ޓާމިނަލް އއ. ރަސްދޫގައި ގާއިމުކޮށްފި އެވެ.
ބީއެމްއެލްގެ 4،000 ވަނަ ޕީއޯއެސް މާޗަންޓަކީ އއ. ރަސްދޫގެ ރޯޔަލް އިން ގެސްޓް ހައުސެވެ. އެތަނުގައި ބީއެމްއެލްގެ ޕީއޯއެސް ގާއިމު ކުރުމަށް އިއްޔެ ވަނީ ކުޑަ ރަސްމިއްޔާތެއް ބާވައިފަ އެވެ.
އެ ރަސްމިއްޔާތުގައި ބީއެމްއެލުން ވަނީ ގެސްޓް ހައުސްގެ މެނޭޖްމަންޓަށް ހަނދާނީ ފިލާއެއް ދީފައެވެ.
ބީއެމްއެލްގެ ޑެޕިއުޓީ ސީއީއޯ މުހައްމަދު ޝަރީފް ވިދާޅުވީ، ބީއެމްއެލްގެ ޕީއޯއެސް ނެޓްވޯކާ 4،000 ވަނަ ފަރާތަކުން ގުޅުމަކީ އެ ބޭންކުން މުހިންމު ލަނޑުދަނޑިއެއް ހާސިލުވުން ކަމަށެވެ.
"މިއީ ބީއެމްއެލުން ވިޔަފާރިތަކަށް ފުޅާ ދާއިރާއެއްގައި ފޯރުކޮށްދޭ ޚިދުމަތްތަކުގެ ތެރޭގައި ހިމެނޭ އެއް ޚިދުމަތް. ރަސްދޫއަށް މި ޚިދުމަތް ތަޢާރަފް ވުމާ ގުޅިގެން ވިޔަފާރިވެރިންނަށާއި މިރަށުގެ އިޤްތިސާދަށް ކުރިއެރުން އަންނާނެ ކަމަށް އަޅުގަނޑު ޤަބޫލު ކުރަން،" ޝަރީފް ވިދާޅުވި އެވެ.
ބީއެމްއެލްގެ ޕީއޯއެސް ޓާމިނަލްތަކުން ދުނިޔޭގެ މަޝްހޫރު ހުރިހާ ކާޑުތައް ބަލައިގަނެ އެވެ. އަދި ވިޔަފާރި ކުރުމަށްފަހު ފައިސާ ދެއްކޭނެ އެވެ.