06 Feb 2017, 15:23
އެސްއޯއެފް ޕްރައިވެޓް ލިމިޓެޑްގެ ކިބައިން 10.7 މިލިއަން ޑޮލަރު (165 މިލިއަން ރުފިޔާ) ހޯދުމަށް ދައުވާކުރި މައްސަލައިގެ އަޑުއެހުމަށް އެމްއެމްޕީއާރްސީން ހާޒިރުނުވުމުން ސިވިލް ކޯޓުން މައްސަލަ ބޭރުކޮށްލައިފިއެވެ.
ސިވިލް ކޯޓުން މިއަދު ކުރި ހުކުމްގައި ބުނެފައި ވަނީ އެމްއެމްޕީއާރްސީގެ ބަދަލުގައި ކޯޓަށް ހާޒިރުވާނެ ފަރާތެއްގެ ގޮތުގައި އެކުންފުނިން ކަނޑައަޅާފައިވާ ގއ. ދެއްވަދޫ، އަހުމަދު ނާޒިމް މުހައްމަދަށް މިއަދު ކޯޓަށް ހާޒިރުވުމަށް އަމުރު އެ ކޯޓުން ވަނީ ފޮނުވާފައި ކަމަށެވެ.
ނަމަވެސް މަގުބޫލު އުޒުރެއް ނެތި އެ އަމުރުގައިވާ ގަޑިއަށް ނާޒިމް ކޯޓަށް ހާޒިރުވެފައިނުވާތީ ކޯޓަށް މީހުން ހާޒިރުކުރުމުގައި އަމަލުކުރަންވީގޮތުގެ ގަވާއިދުގެ 29 ވަނަ މާއްދާގެ (ހ) ގެ އެއްވަނަ ނަންބަރަށް ރިއާޔަތްކޮށް އެ މައްސަލައިގެ ދައުވާ ފޯމް ބާތިލްކުރީ ކަމަށް އެ ހުކުމްގައި ވެއެވެ.
އެމްއެމްޕީއާރްސީން ދައުވާ ކުރީ އެ އެއްބަސްވުންތަކުގެ ދަށުން އެ ކުންފުންޏަށް އެސްއޯއެފް އިން ދޭންޖެހޭ 10.7 މިލިއަން ޑޮލަރު ދިނުމަށް އިންކާރުކޮށްފައިވާތީ ޝަރީއަތް މެދުވެރިކޮށް އެ ފައިސާ އެކީ އެއްފަހަރާ ހޯދުމަށެވެ.
ސަރުކާރުގެ އޮފިޝަލަކު ވިދާޅުވީ އެ ފައިސާ އަކީ ހަމައެކަނި އެމްއެމްޕީއާރްސީގެ ކުރީގެ ވެރިން އެސްއޯއެފް އަށް ދިން ކަމަށް ލިޔެކިޔުމުން އެނގެން ހުރި ފައިސާ އެކަނި ކަމަށެވެ.
އެމްއެމްޕީއާރްސީގެ ޚިޔާނާތުގައި ބައިވެރިވި ކަމަށް ތުހުމަތު ކުރެވޭ އެސްއޯއެފްގެ މައި ހިއްސާރު، މުހައްމަދު އައްލާމް ލަތީފް ހޯދުމަށް އިންޓަޕޯލުން ވަނީ ރެޑްނޯޓިސް ނެރެފައެވެ.