04 Feb 2017, 16:05
މޯލްޑިވްސް މީޑިއާ ކައުންސިލް (އެމްއެމްސީ)އިން ހުސްވެފައިވާ މެމްބަރުކަމުގެ ގޮނޑިއަށް ރާއްޖެ ޓީވީން ކުރިމަތިލި އެ ސްޓޭޝަންގެ ނިއުސް ޑައިރެކްޓަރު އަލީ ޔޫސުފް އިންތިހާބުވެއްޖެ އެވެ.
ތިރީސްހަތަރު ވޯޓުގެ ތަފާތުން އަލީ އެ އިންތިހާބު ކާމިޔާބު ކުރީ "ޗެނަލް 13"ގެ ސްޓޭޝަން އިންޗާޖް މުހައްމަދު ނިޔާޒާ ވާދަކޮށެވެ.
މިއަދު ބޭއްވި އެ އިންތިހާބުގައި 98 މީޑިއާއަކުން ވޯޓަލާފައިވާއިރު އަލީ ޔޫސުފް ވަނީ 66 ވޯޓް ހޯދާފަ އެވެ. ނިޔާޒަށް ލިބިފައިވަނީ 32 ވޯޓެވެ.
މީޑިއާ ކައުންސިލް ބައި އިލެކްޝަން ކާމިޔާބް ކުރި އަލީ(ކ) އާއި އޭނާއާއި ވާދަކުރި ނިޔާޒު(ވ)-- ސަން ފޮޓޯ: މުހައްމަދު އަފްރާހް
މީޑިއާ ކައުންސިލްގެ ބައި އިލެކްޝަނެއް ބާއްވަން ޖެހުނީ އެ ކައުންސިލްގެ މެމްބަރެއްގެ ގޮތުގައި ހުންނެވި މުހައްމަދު އަފްޒަލް އިސްތިއުފާ ދެއްވުމުންނެވެ.
ފަނަރަ މެމްބަރުންގެ މައްޗަށް އެކުލެވޭ މީޑިއާ ކައުންސިލުގެ ހަތަރު ވަނަ ދައުރަށް 13 މެމްބަރަކު މިދިޔަ މަހު ވަނީ އިންތިހާބުކޮށްފަަ އެވެ. އެ ކައުންސިލަކީ މީޑިއާތަކުން އިންތިހާބުވާ އަށް މެމްބަރުންނާއި އާންމުންގެ ތެރެއިން އިންތިހާބުވާ ހަތް މެމްބަރުންގެ މައްޗަށް އެކުލެވޭ 15 މެމްބަރުންގެ ކައުންސިލެކެވެ.
މީޑިއާ ކައުންސިލްގެ މަގުސަދަކީ މީޑިއާގެ މިނިވަން ކަން ދެމެހެއްޓުމާއި މީޑިއާ ރެގިއުލޭޓް ކުރުމެވެ.