02 Feb 2017, 17:26
ދައުލަތުގެ މުއައްސަސާތަކަށް މުސާރަދިނުން އޮޓޮމޭޓިކް ސިސްޓަމަށް ބަދަލުކޮށް، އެ މިނިސްޓްރީގެ ހިދުމަތްތަކަށް އެދެން ކޯލް ސެންޓަރަކާއެކު ހޮޓްލައިނެއް ގާއިމު ކުރަން ނިންމައިފި އެވެ.
ދައުލަތުގެ އިދާރާތަކުން މުސާރަ ހޯދުމަށް މީގެ ކުރިން ފިނޭންސް މިނިސްޓްރީއަށް އަންނަންޖެހެ އެވެ. މުސާރަ ލިބެނީ ފިނޭންސުން ދޫކުރާ ޗެކްތައް ބޭންކްތަކަށް ހުށަހަޅައިގެންނެވެ.
ފިނޭންސް މިނިސްޓްރީގެ ފައިނޭންޝަލް ކޮންޓްރޯލާ ފާތުމަތު ރަޒީނާ ވިދާޅުވީ، މުސާރާގެ ކަންތަކުގައި ފިނޭންސަށް އަންނަން ނުޖެހޭނެ ކަމަށާއި ސިސްޓަމްކޮށް މައުލޫމާތުތައް ފޮނުވުމުން އެކަން ހަމަޖެހޭނެ ކަމަށެވެ.
މީގެ ކުރިން މުސާރަ ދިނުމުގެ ކަންތަކަށް ހަތް ވަރަކަށް ދުވަސް ހޭދަވާއިރު އަލަށް ގެނައި ބަދަލުތަކާއެކު އެކަން އަވަސްވެގެންދާނެ ކަމަށް ރަޒީނާ ވިދާޅުވި އެވެ.
ފިނޭންސް މިނިސްޓަރު އަހުމަދު މުނައްވަރު ވިދާޅުވީ މާޗު މަހުން ފެށިގެން އެ މިނިސްޓްރީގެ ހިދުމަތްތަކަށް އެދުމަށް ކޯލް ސެންޓަރެއް ގާއިމް ކުރާނެ ކަމަށެވެ.
ޕޭމަންޓް ކަންތަކާއި އެ މިނިސްޓްރީ މެދުވެރިކޮށް ހޯދާ އެހެން ހިދުމަތްތައް ކޯލް ސެންޓަރު މެދުވެރިކޮށް ކުރިއަށް ގެންދެވޭނެ ކަމަށް މިނިސްޓަރު ވިދާޅުވިއެވެ.