02 Feb 2017, 13:44
ވޮޝިންޓަން (ފެބްރުއަރީ 2): އެމެރިކާ އާއި މެކްސިކޯއާ ދެމެދު ރާނާނެ ކަމަށް ރައީސް ޑޮނަލްޑް ޓްރަމްޕް ވިދާޅުވެފައިވާ ފާރުގެ އަގު މެކްސިކޯއިން ނުދޭ ނަމަ އެމެރިކާގެ ކޮންމެ ގެއަކުން އެފާރަށް 120 ޑޮލަރު ހަރަދު ކުރަން ޖެހޭނެ ކަމަށް ކަމާ ބެހޭ ކޮމިޓީއަކުން ބުނެފި އެވެ.
އެމެރިކާ ސަރުކާރުގެ ބަޖެޓާ ބެހޭ މައްސަލަތައް ބަލާ މިނިވަން ޖަމްއިއްޔާއެއް ކަމަށްވާ ކޮމިޓީ ފޯ އަ ރެސްޕޮންސިބުލް ފެޑެރަލް ބަޖެޓުން އެފަދައިން ބުނެފައި ވަނީ މެކްސިކޯގެ އެހީއާ ނުލައި އެމެރިކާއިން ފާރު ރާނާ ނަމަ ދައުލަތުގެ ދަރަންޏަށް 15 ބިލިއަން ޑޮލަރު އިތުރުވާނެ ކަމަށް ގާނޫނު ހަދާ މަޖިލީހުގައި ހިމެނޭ ރިޕަބްލިކަން ޕާޓީގެ މެމްބަރުން ވިދާޅުވުމާ ގުޅިގެންނެވެ.
އެހެންކަމުން އެމެރިކާގެ އެންމެ ފަހުގެ ބޯހިމެނުމަށް ބެލުމަށް ފަހު އެއީ އެގައުމުގެ ޓެކްސް ދައްކާ ކޮންމެ ގެއަކުން 120 ޑޮލަރު ކަމަށް ކޮމިޓީން ބުންޏެވެ.
އެމެރިކާ އާއި މެކްސިކޯގެ ބޯޑަރުގައި ފާރެއް ރޭނުމަށް ރައީސް ޓްރަމްޕް ވަނީ މިހަފްތާ ތެރޭގައި އަމުރު ކުރައްވައިފަ އެވެ. އަދި އެ ފާރުގެ އަގު ހޯދާނީ މެކްސިކޯ އިން އެތެރެކުރާ މުދަލުން ނަގާ ޓެކްސް އިން ކަމަށް ވައިޓް ހައުސް އިން ބުނެފައިވާ އިރު ގާނޫނު ހަދާ މަޖިލީހުގެ ރައީސް ޕޯލް ރަޔާން ވިދާޅުވި ގޮތުގައި ފާރު ރޭނުމަށް އަށް ބިލިއަން ޑޮލަރާއި 14 ބިލިއަން ޑޮލަރުގެ ފައިސާ ހަރަދު ކުރަން ޖެހޭނެ އެވެ.
ޓްރަމްޕުގެ އަމުރާ ގުޅިގެން މެކްސިކޯގެ ރައީސް އެންރީކޭ ޕެންޔާ ނިއޭޓޯ ވަނީ ފާރުގެ އަގު އެގައުމުން އަދާ ނުކުރާނެ ކަމަށް ވިދާޅުވެފަ އެވެ. އަދި ޓްރަމްޕާ އެކު ބާއްވަން ހަމަޖެހިފައިވާ ބައްދަލުވުމެއް ކެންސަލް ކުރައްވާފަ އެވެ. (އިންޑިޕެންޑެންޓް)